Manipud Kadagiti Agbasbasa

Pumanaw Dagiti Annak iti Pagtaengan Naliwliwaak kadagiti serye a “No Panawanen Dagiti Annak ti Pagtaengan.” (Enero 22, 1998) Tallo a tawenen sipud idi pimmanaw iti pagtaengan ti tallo kadagiti uppat nga annakmi. Nupay pinadakkelko ida buyogen iti pananginanama a dumtengto ti tiempo a pumanawda, pulos a diak impagarup a ti tallo ket naggigiddan a pimmanaw! Talaga nga apresiarek ti pannakaseknan ti Watch Tower Society iti rikrikna dagiti nagannak.

M. S., Japan

Agdama nga agserserbikami ken baketko kas spesial pioneer, wenno amin-tiempo a managebanghelio, iti deppaar ti nakayanakanmi nga estado. Talaga nga epektibo ti balakadyo no kasano a maipakitami kadagiti nagannak kadakami a nupay adayokami, kaskasdi nga ay-ayaten ken dungdunguenmi ida.

M. M. S., Brazil

Agtawenak iti 11. Diak idi matmatan a dagiti trabaho iti balay ti mangsanay kaniak iti panagbiagko inton nataenganak. Ngem dagitoy nga artikulo ti timmulong kaniak nga agpanunot iti naiduma. Pagyamanan iti pannakaseknanyo kadakami nga agtutubo.

D. U., Yugoslavia

Dagiti Gorilia Makaparagsak a basaen ti artikulo a “Panangsarungkar Kadagiti ‘Mountain Gorilla.’” (Enero 22, 1998) Pulos a diak impagarup a maasitgan unay ti tao dagiti gorilia a dida madangran. Kadagiti sine, masansan a maipabuyada kas narungsot nga animal. Pagyamanan iti kasta nga ekselente nga artikulo.

R. P., Venezuela

Panagbeddal Agyamanak unay iti artikulo a “No Kasano a Maparmekko ti Kinabeddal.” (Enero 22, 1998) Nangnangruna a makaparagsak kaniak ti kapadasan ni Sven Sievers, tangay mapaspasarak met dayta. Iti unos dagiti tawen, tinulongannak ti Teokratiko nga Eskuelaan ti Panagministro nga agbalin a nasaysayud a pumapalawag.

E. Z. S., Brazil

Ti Teokratiko nga Eskuelaan ti Panagministro ket linawas a maang-angay kadagiti Kingdom Hall dagiti Saksi ni Jehova iti lugaryo.​—ED.

Dayawek ti kinapositibo ni Sven Sievers iti laksid ti panagsublisubli ti panagbeddalna. Iti kongregasionmi, adda kabsat a marigrigatan gapu iti panagbeddalna. Buyogen iti ad-adda a panagraem ken pannakaseknan ti pannakisaritakton kenkuana.

K. K., Japan

Beddalak met sipud pay idi ubingak. Maitutop ti nadakamatyo idi kinunayo a masapul nga ikagumaan ti maysa a tarusan imbes a kaasian ti beddal. Pagyamanan iti daytoy nga artikulo.

E. C., Italia

Ibubusor Dagiti Nagannak Kaaw-awatko ti Enero 22, 1998 a ruar ken binasak ti “Agimtuod Dagiti Agtutubo . . . Kasano Ngayen no Busoren Dagiti Dadakkelko ti Pannakiasawak?” Impagarupko a kamaliak iti panangbusorko iti pannakiasawa ti balasangko. Ngem ti artikulo inramanna dagiti pakadanagak​—tangay ubing pay, ti manamnama a personalidad ti agbalinto nga asawana, ti posible a pannakisangolna iti di manamati, ti posibilidad ti AIDS, ken ti nakaidumaan iti kultura. Ikarkararagko a sapay koma ta matukay daytoy nga artikulo ti puso ti balasangko.

N. B., Estados Unidos

Nagsayaat ketdin ti pannakaisuratna nga artikulo! Maysa a sensitibo a tema ti dinakamatyo ket nagsayaat ti panangsalaysayyo iti dayta. Nadakamat ti adu a nadumaduma nga isyu, a tumulong iti bumabasa a maaddaan iti nalawa a kapanunotan kadagitoy a banag.

S. C., Estados Unidos

Walo a tawenen a managebanghelioak iti amin a tiempo. Kristiano met dagiti nagannak kaniak, ket dikam agkakatunosan idi gapu iti inkeddengko a panagasawak. Pagyamanan unay iti panangipaayyo iti daytoy makatulong nga impormasion.

T. C. F., Tanzania