No Kasano a Maparmekko ti Kinabeddal

Kas insalaysay ni Sven Sievers

BEDDALAKON nanipud pay idi ubingak. No subliak ti napalabas, apresiarek ti panangtaming dagiti dadakkelko iti parikut. No agbeddalak idi, kanayon nga ikagumaanda nga ipamaysa a denggen ti kayatko nga ibaga imbes a korehirenda ti panagsaok. Sigun kadagiti speech therapist, dagiti nagannak a kanayon a mangdillaw iti panagbeddal ti anakda mabalin a pakaruenda ti depekto.a

Ni nanangko nagbalin a maysa a Saksi ni Jehova idi agtawenak iti tallo. Idi tin-edyerak inkeddengko a tuladen ti ulidanna ket natulonganak a mangadal a naan-anay iti Biblia. Idi Hulio 24, 1982, nabautisaranak kas dedikado nga adipen ti Dios iti maysa a kombension idiay Neumünster, Alemania. Kalpasanna, immakarak idiay South Africa, a sadiay intuloyko ti nakipaset iti trabaho a panangasaba iti publiko, a naibilin a pakiramanan dagiti amin a pudno a Kristiano. (Mateo 28:19, 20) Mabalin a pampanunotenyo, kasano a tinamingko dayta kas maysa a beddal?

Dagiti Gunggona ti Kinapositibo

Masapul nga admitirek a no dadduma marigatanak a mangsalimetmet iti kinapositibo, ngem nakitak a ti kinapositibo dakkel a tulong iti kasasaadko. Iti kinapudnona, iti aniaman a pamay-an kanayon a mabaelak ti makikomunikar. No diak agsao, makikomunikarak babaen ti panagsurat wenno basta ipakitak dagiti literatura ti Biblia kadagiti sabsabali. Ti kinapositibo tulongannak a mangparmek iti rigat ti panangirugi iti pannakisarita. Ikagumaak a pagbalinen a nakasimsimple ti introduksionko. Iti pangrugian ti pannakisarita, bay-ak nga agsao ti bumalay inggat’ mabalin. Kayat dagiti tattao ti agsao, ket daytoy ikkannak iti gundaway a mangammo iti panagpampanunotda. Kalpasanna, ituloyko ti pannakisarita kadagiti bambanag a paginteresanda, nga ipaganetgetko ti mensahe ti Biblia. Ti panangipamaysa iti ibagbagada tulongannak a manglipat iti parikutko iti panagsao, ket manmano nga agbeddalak.

Ti kinapositibo tulongannak met nga agkomento kadagiti Nakristianuan a gimong. Natakkuatak a no mamin-aduak a makipaset iti saritaan iti Biblia, ad-adda a mairuam dagiti agdengngeg ken ti konduktor kaniak ket dumngegda iti ibagak imbes nga iti pamay-an ti panangibagak iti dayta.

Tapno masagrapko ti balligi, masapul ti kanayon a panangikagumaanko. Daytoy lapdannak a mangay-ay iti bagik ken agbalin a di matagtagari. Kanayon a parparmekek ti panangay-ayko iti bagik. Kunada a no matnag ti maysa a tao iti kabalio, nasken nga agsakay manen iti kabalio tapno dina mapukaw ti panagtalekna iti bagina. Isu a no sumardengakon nga agsao no agkomkomentoak agsipud ta agbeddalak, arigna padasek ti agsakay manen iti kabalio, babaen ti panagsaok iti sumaganad unay a gundaway.

No Kasano a Makatulong ti Dadduma

No masapul nga umawagak iti telepono wenno agkiddawak iti impormasion kadagiti ganggannaet, pudno nga apresiarek dagiti nataktika a tulong. Ngem masobraan ti dadduma a tattao ti tarigagayda a tumulong, ket tratuendak a kas maysa nga ubing a di makabael nga agdesision.

Apresiarek met ti tulong ti naayat a baketko, ni Tracy. Sakbay nga agtignay kas “pannakangiwat[ko],” pagsaritaanmi a detalyado ti kasasaad ket ammonan no ania ti kayatko a maaramid. (Idiligyo ti Exodo 4:10, 14, 15.) Iti kasta, ipakpakitana ti panagraemna kaniak kas asawana, ket mariknak nga iturturongko pay laeng ti biagko.

Ti sabali pay a dakkel a tulong ket ti Teokratiko nga Eskuelaan ti Panagministro. Iti daytoy a linawas a gimong, makiraman dagiti estudiante iti panagbasa ti Biblia iti publiko ken panangipaay kadagiti ababa a palawag kadagiti topiko ti Biblia. Masdaawak a makatakkuat a masansan a makabasaak ken makapagsao a naimbag iti sanguanan ti tallaong. No diak nagpalista iti eskuelaan, nalabit pulos a diak maammuan a kabaelak daytoy.

No adda naituding a pasetko iti Teokratiko nga Eskuelaan ti Panagministro, makaparegta a nangnangruna no impamaysa ti instruktor ti dimngeg iti imbagak ket saan nga iti pamay-an ti panangibagak. Nagunggonaanak unay iti Giya iti Teokratiko nga Eskuelaan ti Panagministro,b nupay no ti dadduma a paset daytoy a libro iparangna ti dakdakkel a karit kadagidiay beddal imbes a kadagidiay normal ti panagsaoda. Kas pagarigan, gapu iti kaadu ti panagbeddal no dadduma, diak maturpos ti palawagko iti naikeddeng a tiempo. Makaparegta unay kaniak, nupay kasta, no itampok ti instruktor dagiti punto a nabaelak nga imparang.

Dakdakkel a Pribilehio iti Panagserbi

Idi napalabas, naikkanak ti pribilehio nga agbasa iti Nakristianuan a publikasion nga ad-adalenmi kadagiti gimongmi. Naikkanak met ti pribilehio a mangikondukta iti panagadal no awan ti sabali a kualipikado a ministro, ket ita kanayonen nga ar-aramidek dayta. Nupay no iti damo agnerbiosak, nariknak a tinulongannak ti Dios a mangitungpal iti kasta a nakaitudingan.

Iti adu a tawen, nupay kasta, limitado dagiti gundawayko nga agbasa wenno mangisuro iti entablado ti kongregasion. Kaawatan daytoy, ta addada tiempo a nabayagak unay a mangyebkas iti pampanunotek tapno maawatandak. Isu nga inusarko ti amin a kabaelak a mangtaming a naan-anay kadagiti dadduma a trabaho. Idi damo, nagserbiak a kas katulongan a mangaywan iti abasto ti kongregasion a magasin a Pagwanawanan ken Agriingkayo! Kalpasanna, idi natudinganak a ministerial nga adipen, inaywanak dagiti abasto a Biblia, libro, ken dadduma pay a literatura. Kalpasanna, natudinganak a mangsukimat kadagiti kard ti teritoria a mausar iti trabahomi a panangasaba iti publiko. Ti panangipamaysa kadagitoy a trabaho, nga ikagkagumaak nga aramiden ida a sipapasnek ti nangyeg rag-o kaniak.

Iti napalabas a walo a tawen, nakapagserbiakon a kas amin-tiempo nga ebanghelisador a kadua ni Tracy. Pudno a binendisionannak met ni Jehova iti daytoy a benneg. Kinapudnona, no dadduma pampanunotek no us-usaren ni Jehova ti pagkapuyak a kinabeddal. Kadagiti lima a tattao a natulongak nga agbalin a dedikado a Kristiano, dua ti beddal.

Malagipko pay laeng a buyogen ti rag-o daydi aldaw a natudinganak nga agserbi kas panglakayen ti kongregasion. Nupay ti abilidadko a mangisuro iti entablado ket limitado, padpadasek nga ipamaysa ti personal a panangtulong kadagiti sabsabali. Ti kinabeddal dina limitaran ti abilidadko a mangaramid iti Nainkasuratan a panagsirarak tapno tulongan dagiti miembro ti kongregasion a mangsarsaranget kadagiti nakaro a parikut.

Iti napalabas a lima a tawenen, simmansan ti pannakaawisko nga agpalawag. Malaksid iti panagpalawag iti Teokratiko nga Eskuelaan ti Panagministro, nabaelak a tinaming dagiti ababa nga anunsio kadagiti dadduma a gimong. In-inut a rimmang-ay ti laingko nga agsao. Ngem idi kuan, kimmaroak manen. Madandanaganak, impagarupko a ‘saanakon a maikkan iti aniaman a paset,’ ngem iti siddaawko, adda manen ti naganko iti sumaganad nga eskediul! Kinuna ti mamangulo a manangaywan iti kongregasionmi a no diak makasaon gapu iti panagbeddalko, basta kumitaak laeng kenkuana ket isun ti umuli iti entablado tapno sublatannak. Inusarko daytoy a naayat a tukon iti naminsan wenno namindua, ngem diak inaramid ti kasta kadagiti kallabes a bulan. Bayat a rimmang-ay ti panagsaok, naikkanak kadagiti at-atiddog a paset, agraman dagiti palawag publiko. Nabigbigko laeng a naan-anay ti irarang-ayko idi nakiddaw a makipasetak iti dua a demostrasion iti maysa nga asamblea sirkito dagiti Saksi ni Jehova iti nabiit pay.

Kinapudnona, diak naan-anay a maawatan no apay a simmayaat ti panagsaok. Kasta met, mabalin a kumapuyto manen iti masanguanan. Kinapudnona, nupay kasla adda rinang-ayan ti panagsaok iti entablado, adda dagiti ikakarok no personal a makisaoak kadagiti tattao. Isu a daytoy ket saan nga estoria ti panagballigik gapu ta naparmekkon ti kinabeddal. No kumaroak, palagipak ti bagik a masapul a bigbigek dagiti limitasionko ket ‘agbalinak a napakumbaba a makipagna iti Dios.’​—Mikias 6:8.

Aniaman ti iyeg ti masanguanan, itultuloyko ti mangikagumaan, ta ammok nga iti umadanin a baro a lubong ti Dios, naan-anayton a maparmek ti kinabeddal. “Ti dila dagiti beddal,” kuna ti Biblia, “nasiglatdanton nga agsao a silalawag.” Agtalekak a pumaysonto daytoy iti literal ken naespirituan ken uray “ti dila daydiay umel agpukkawto a siraragsak.”​—Isaias 32:4; 35:6, NW.

[Dagiti Footnote]

[Dagiti ladawan iti panid 15]

Dakam ken ni baketko a Tracy