Kalintegan nga Awanan Rebbengen?
“TI PUNDASION ti wayawaya, kinahustisia ken talna ditoy lubong ket ti panangbigbig iti nainkasigudan a dignidad ken dagiti agpapada ken manayon a kalintegan ti amin a miembro ti natauan a pamilia.” Kasta ti ipatuldo ti preambulo ti Universal Declaration of Human Rights, a naselebraran ti maika-50 nga anibersariona idi Disiembre 1998. Ngem itay nabiit, insingasing ti 24 a dati a presidente ken primero ministro, a pannakabagi ti amin a kontinente, a malaksid iti dayta a deklarasion, rumbeng nga adaptaren ti United Nations ti sapasap a deklarasion dagiti natauan a rebbengen. Apay a patien dagiti adu a kasapulan ti kasta a proyekto?
“Kanayon nga agkuykuyog dagiti kalintegan ken rebbengen. Nakalkaldaang ta kalpasan ti kagudua a siglo, nalipatanen wenno saanen a mayataday daytoy a kinapudno. Adu ti agkiddaw a mapatgan dagiti kalinteganda, a dida marikna a rumbeng a kanayon nga aramidenda dagiti nainaig a rebbengenda,” ilawlawag ni Propesor Jean-Claude Soyer, miembro ti European Commission for Human Rights. Adu ti maap-apektaran gapu iti daytoy a di panangaramid kadagiti rebbengen. “Nalawag a tartarigagayan, nangnangruna dagiti ubbing, ti maysa a kita ti mamagtutunos a plano, maysa a grupo dagiti mabigbigbig a raragpaten a mangtaming ken mangparmek kadagiti puersa ti kinaagum, kinamanagimbubukodan, di panangisakit, nga agparang a mangdomdominar iti lubong. . . . Daytoy nagdakkelan a debate maipapan iti pannakasapul iti sangalubongan nga etika ket panangbigbig nga adda kurang,” kuna ti pagiwarnak ti Paris nga International Herald Tribune. Isu a pagsasaritaan dagiti politiko, teologo, ken pilosopo ti “sangalubongan a proyekto ti etika,” kas pangawag ti United Nations Educational, Scientific, and Cultural Organization iti dayta, tapno mapunnuan ti kurang ken maammuan dagiti natauan a rebbengen. Nupay kasta, adda sumagmamano a rigat a napasaranda.
Nupay medio nalaka nga ammuen no ania dagiti natauan a kalintegan a rumbeng a masalakniban, saan a kanayon a nalaka a madepinar no ania ti rumbeng a sapasap a maakseptar kadagiti natauan a rebbengen. Nupay kasta, dadduma kadagiti prinsipio iti naisingasing a Declaration of Responsibilities ket nagtaud iti di agkupas ken sapasap a Nabalitokan a Bilin, nga inted ni Jesus dua ribu a tawenen ti napalabas: “Isuamin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.”—Mateo 7:12.
Nupay masansan a ti Biblia ti nakaadawan dagiti linteg a mangsalsalaknib kadagiti natauan a kalintegan, ipatuldona ti kapanunotan maipapan iti personal a rebbengen. “No ti maysa ammona ti agaramid iti umiso ket kaskasdi dina aramiden dayta, basol dayta kenkuana,” kuna ni adalan a Santiago. (Santiago 4:17) Kas iti panangsapul idi ni Jesus kadagiti pamay-an a mangaramid iti naimbag kadagiti sabsabali, ikagkagumaan met dagiti pudno a Kristiano ti agaramid iti naimbag iti padada a tattao. Tangay saanda a kontento a basta aramidenda dagiti kalinteganda, maawatanda nga adda rebbengen a kakuykuyog dagiti kalinteganda ken sungsungbatantayo amin iti Dios dagiti mismo nga ar-aramidentayo.