Nagduduma a Langa Dagiti Biktima ti Gubat
“NAIDUMA dagiti gubat itatta no idilig kadagiti napalpalabas . . . Dagiti ordinario nga umili, imbes a dagiti soldado,” ti umad-adu a biktima, kuna ti “Perspective,” maysa a programa nga iyan-anunsio ti UN Radio. Kas pagarigan, bayat ti umuna a gubat sangalubongan, 5 a porsiento laeng iti amin a napapatay ti sibilian. Nupay kasta, iti maikadua a gubat sangalubongan, ti bilang dagiti napapatay a sibilian ket immadu a nagbalin nga 48 a porsiento. Kinuna ti UN Radio nga itatta, “gistay amin a mapappapatay iti dangadang ket sibilian—90%—ken kaaduan kadagitoy ti babbai, ubbing ken natataengan.”
Sigun ken Olara Otunnu, ti Special Representative for Children and Armed Conflict ti sekretario-heneral ti UN, “adda mapattapatta a dua a milion nga ubbing ti napapatay kadagiti naarmasan a panagdadangadang sipud pay idi 1987.” Kayatna a sawen, adda nasurok nga 450 nga ubbing a biktima ti gubat iti kada aldaw iti naglabas a 12 a tawen! Mainayon pay, iti isu met laeng a panawen, nasurok nga innem a milion nga ubbing ti nakaro ti pannakadangranda wenno permanenten ti pannakabaldadoda.
Insingasing ni Mr. Otunnu ti panangipasdek kadagiti sona ti talna kas maysa a pamay-an tapno malapdan ti UN ti umad-adu a bilang dagiti ubbing a matmatay iti gubat. “Dagiti lugar nga ad-adu dagiti ubbing, kas kadagiti eskuelaan, ospital, ken pagay-ayaman, ket maibilangda koma a sona a saan a mapaggugubatan.” Nupay kasta, innayon ti UN Radio nga “umuna unay, ti pananglapped iti gubat” ti kaepektibuan a pamay-an para iti UN tapno masiertona a di mabiktima ti gubat dagiti ordinario nga umili. Wen, tapno awan matmatay iti gubat, talaga a kasapulan a pukawen ti gubat a mismo. Mapasamakto aya dayta?
Gapu iti nabayagen a pakasaritaan ti sangatauan iti gubat, nainkalintegan ti marikna ti kaaduan a tattao a nikaanoman dinto maiyeg ti tao ti talna iti intero a daga. Nupay kasta, ikari ti Sao ti Dios, ti Biblia, nga aramidento ni Jehova a Dios dayta: “Pagsardengenna dagiti gubgubat inggana iti ungto ti daga.” (Salmo 46:9) Kaanonto a mapasamak daytoy? Ket apay a masiguradom a pumudnonto ti kari ti Dios a sangalubongan a talna? No kayatmo a masungbatan dagitoy a saludsod, pangngaasim ta agsuratka kadagiti agipabpablaak iti daytoy a magasin nga usarem ti kaasitgan kenka a direksion a nailista iti panid 5, wenno mapanka wenno agtelepono iti Kingdom Hall dagiti Saksi ni Jehova nga asideg kenka. Awan dagiti obligasion ken bayadan—direkta a sungbat laeng.
[Picture Credit Line iti panid 31]
UN PHOTO 156450/J. Isaac