Damdamag iti TV​—Kasano Kaadu iti Dayta ti Agpayso a Damdamag?

Kalpasan ti panangusig ti maysa a grupo nga agsipsiput iti media kadagiti 102 a lokal a padamag iti TV manipud iti 52 a kabesera a siudad idiay Estados Unidos tapno maammuan ti linaon ken wagas ti pannakaiparangda, natakuatan nga 41.3 a porsiento laeng kadagiti programa ti naglaon iti damdamag. Ania ti linaon ti dadduma a padamag?

Adda 30.4 a porsiento a komersial a maipabuya iti lokal a padamag iti TV. Kinapudnona, ad-adu ti oras a maipaay iti komersial iti dadduma nga estasion a nasurbey ngem iti damdamag. Maysa pay, masansan a napno dagiti damag iti awan serbina a banag, kuna ti report a nangsumario kadagiti natakuatan ti panagadal.a Iti sidong ti paulo nga “Awan Serbina a Banag,” ti report paglalasinenna ti “oras a nausar iti tungtongan dagiti agipadpadamag, dagiti anunsio ken pakaammo maipapan iti sumaganad a damag wenno pabuya, ti ‘makaay-ayo’ wenno minamaag a damag ken dagiti damag maipapan kadagiti nalatak a tao.” Kastoy ti pagarigan dagiti awan serbina a damag: “Nakaal-alas a Kompetision iti Tenor,” “‘Nakaskasdaaw’ a Panaglugan ti Reporter iti Roller Coaster,” ken “Umad-adu ti Gumatang iti Palaman ti Sandwich Kadagiti Supermarket.”

Ania ti mangbukel iti agpayso a damdamag? Dagiti damag maipapan iti krimen ti kaaduan a damag ti TV, a buklen ti 26.9 a porsiento iti oras a pannakaipadamagda. “Kinaagpaysona, ‘no ti damag ket maipapan iti pammapatay, maibilang dayta a kangrunaan a damag’ ti pagilian iti TV . . . Mabalin a bimmassit ti napasamak a krimen iti E.U. bayat ti napalabas a sumagmamano a tawen, ngem saan a bimmassit dayta kadagiti damag iti telebision ti pagilian.” Apay? Sigun kadagiti nagaramid iti panagadal, “dramatiko dagiti mapasamak a krimen ken makaawis kadagiti tattao.”

Kalpasan ti pannakaipadamag dagiti krimen, maipadamag metten dagiti didigra, kas iti uram, panagdinnungpar dagiti lugan, layus, ken panagbettak (12.2 a porsiento iti damdamag), a sarunuen ti damdamag maipapan iti isports (11.4 a porsiento). Kalpasanna, maipadamag ti maipapan iti salun-at (10.1 a porsiento), gobierno (8.7 a porsiento), ken ti ekonomia (8.5 a porsiento). Bassit laeng a tiempo (manipud 1.3 agingga iti 3.6 a porsiento) ti maipaay kadagiti topiko a kas iti edukasion, aglawlaw, arte, ken siensia. Iti kasumbangirna, agpromedio ti 10 a porsiento ti amin a damag ti maipapan iti paniempo. “Kayat ti amin a pagsasaritaan ti paniempo ket saan a mailaksid ti damdamag iti TV,” kuna dagiti managsirarak. Ibagada pay: “Aniaman a kita ti paniempo, nasayaat man wenno dakes, napudot wenno nalamiis, panagtutudo wenno kalgaw, gutugotenna ti nasaknap a panangiwaragawag ti TV.”

Iti positibo a pamay-an, kuna ti report nga umad-adu a periodista ken agbuybuya ti makadlaw a masapul ti panagbalbaliw. Nupay kasta, aminen ti panagadal a saan a nalaka nga ibanag ti panagbalbaliw agsipud ta “ti negosio ken kinaagum mabalin a kanayon a pagpeggadenda ti de kalidad a panagiwarnak.”

[Footnote]