“Mataykan!”

KAS INSALAYSAY NI LEANNE KARLINSKY

Ti panangbirokko iti kasayaatan a magun-odan a pannakaagas a di mayalisonan iti dara idiay España

NO MAKAPAGBIAHEKA iti sadinoman a lugar iti lubong, sadino ti piliem a papanan? Para kaniak, simple laeng ti sungbat. Mangisursuroak iti Español iti eskuelaan, ken kaduak ni lakayko a ni Jay, ken ti barok a ni Joel a tumabtabuno iti kongregasion dagiti Saksi ni Jehova nga agus-usar iti lenguahe nga Español, idiay Galax, Virginia, E.U.A. Tartarigagayak ngarud ti mapan idiay España. Isu a mabalin a mapanunotmo a kasta unay ti ragsakko idi imbaga dagiti nagannak kaniak nga itugotdak sadiay! Nupay diak kakuyog ni lakayko ken ti barok, dandani pumayson ti arapaapko bayat a kaduak ti nagannak kaniak a limmugan iti direkta a biahe nga agturong idiay Madrid. Apaman a simmangpetkami idi Abril 21, inkeddengmi ti mapan idiay Estella, maysa a bassit nga ili ti Navarre, iti amianan nga España. Komportableak iti makinlikud a tugaw isu a dagus a nairidepak.

Ti simmaganad a nalagipko isu ti panagiddak iti tay-ak, a pakasisirapan ti matak iti lawag ti init. ‘Sadino ti ayanko? Kasano a nakadanonak ditoy? Agtagtagainepak kadi?’ Bayat a mapampanunotko dagitoy a saludsod, maawatakon ti nakaam-amak a kinapudno. Adda dakes a napasamak, ket saan a tagtagainep daydi. Nagirsagirsay ti kannigid a manggas ti kawesko, ket diak makuti dagiti takiag ken sakak. Kalpasanna, naammuak a naidungpar ti luganmi iti bangen ti kalsada ket naipuruakak iti lugan bayat a natnag iti 20 a metro a dike. Naimbag laengen ta awan a pulos ti malagipko ken uray dagiti dadakkelko iti aksidente.

Nagpaarayatak, ket maysa a tsuper ti trak ti dagus nga immay. Bimmaba iti dike nga ayan ti lugan, a nakakulongan dagiti nagannak kaniak. “Ibagam nga agapura ti ambulansia!” impukkawna iti kaduana. “Grabe ti kasasaad dagiti tattao iti kotse!” Kalpasanna nagsubli iti nakapaiddaak. Diak makakuti, ket buyogen iti naimbag a panggep a pinadasna nga unnaten ti sakak. Nagriawak gapu iti ut-ot, ta idi la a nariknak a nakaro gayam ti pannakadangranko.

Di nagbayag addaakon iti siled ti emerhensia iti lokal nga ospital idiay Logroño. Siaasi nga impakaammo dagiti polis kadagiti Saksi ni Jehova iti dayta a lugar no sadino ti ayanko ken no ania ti napasamak. Di nagbayag, adun kadagiti naitimpuyog iti kongregasion ti Estella ken Logroño ti immay iti sibayko, agraman ti Hospital Liaison Committee iti dayta a lugar. Kinapudnona, iti intero a kaaddak iti daytoy nga ospital, dagiti ingungotek a padak a Kristiano nga idi laeng a naam-ammok ti agmalmalem ken agpatpatnag a sisasagana ken kayatda nga ipaay dagiti kasapulak. Siaayat met nga inaywananda dagiti nagannak kaniak, isu a nagsayaat ti pannakapaimbagda tapno makaruardan iti ospital agarup makalawas kalpasan ti aksidente.

Idi agarup ala una ti parbangon ti Mierkoles, immay dagiti doktor tapno operaenda ti nablo a padingpadingko. Imbagak iti doktor a diak kayat ti mayalisonan iti dara.a Nupay nagkedked pinatganna ti kiddawko. Imbagana a mabalin a matayak. Nupay kasta, nalasatak ti operasion ket nakitak a saan a nadalusan dagiti sugatko, ken di pay nasukatan dagiti bendana.

Iti Biernes, bimmaba ti darak agingga iti 4.7, ket kumapkapsutak. Immanamong ti doktor nga ikkannak iti alternatibo a panangagas​—pannakaineksion iti erythropoietin (EPO), a mapakuyogan iti iron ken dagiti suplemento a mangpaadu iti nalabaga a selula ti dara.b Simmangpet idin da Jay ken Joel. Nagsayaat ketdin ta makitak ni lakayko ken ti barok!

Iti agarup 1:30 ti parbangon, imbaga ti maysa a doktor ken Jay a nakaalan ti ospital iti bilin ti korte nga iyalisonannak iti dara no kumaro ti kasasaadko. Imbaga ni Jay kenkuana a diak kayat ti mayalisonan iti dara uray ania ti mapasamak. “No kasta matayen!” kinuna ti doktor.

Nakisarita ni Jay iti Hospital Liaison Committee maipapan iti panangyakarda kaniak iti sabali nga ospital​—daydiay mangraem iti pagayatak. Dina kayat a sawen a kumontra ti amin nga adda iti daytoy nga ospital. Maysa a doktora, kas pagarigan, ti nangipanamnama kaniak a siguraduenna a maagasanak buyogen ti amin a panagraem a maitutop kaniak. Ngem di nagbayag, dadduma a doktor ti nangpilit kaniak. Insaludsodda, “Kayatmo kadi ti matay ket mapanawam ti pamiliam?” Pinatalgedak a kayatko ti kasayaatan a pannakaagas a magun-odak a di mayalisonan iti dara. Saan a natignay dagiti doktor a tumulong. “Mataykan!” awanan-asi a kinuna a mismo ti maysa.

Nakasarak ti Hospital Liaison Committee ti maysa nga ospital idiay Barcelona a mayat a mangagas kaniak a di mayalison iti dara. Anian a nagduma dagitoy dua nga ospital! Idiay Barcelona, dua a nars ti nangbuggo a siiinayad kaniak ken impariknada a nasayaat ti kasasaadko. Idi suksukatanda dagiti bendak, nadlaw ti maysa kadagiti nars a berde ken timmangkenen ti dara. Imbagana a mabain ta kasta ti panangtrato kaniak dagiti kailianna.

Di nagbayag, maag-agasanakon iti wagas a rumbeng koma a nairugi pay la idiay ospital ti Logroño. Nakaskasdaaw dagiti resulta. Iti sumagmamano nga aldaw saanen nga agpeggad dagiti napateg a paset ti bagik, ket ngimmaton ti hemoglobin-ko agingga iti 7.3. Idi rimmuarak iti ospital, ngimmaton agingga iti 10.7. Idi kasapulan a maoperaak pay iti ospital ditoy Estados Unidos, daytat’ ngimmaton agingga iti 11.9.

Agyamanak iti panangikagumaan dagiti doktor ken nars a situtulok a makitunos iti pagayatan dagiti pasienteda, anamonganda man wenno saan ti pagayatan ti pasienteda. No raemen dagiti kameng ti ospital ti pammati ti pasiente, ag-agasanda ti intero a tao​—ket iti kasta mangipapaayda iti kasayaatan a panangagas a magun-odan.

[Dagiti Footnote]

[Ladawan iti panid 12]

Kaduak ti asawak ken ti barok

[Ladawan iti panid 13]

Dua a miembro ti Hospital Liaison Committee