Manipud Kadagiti Agbasbasa
Maika-20 a Siglo Nagsayaat ti Disiembre 8, 1999 a ruar! Nagunggonaanak unay iti dayta, nangruna iti serye a “Ti Maika-20 a Siglo—Tawtawen ti Dakkel a Panagbalbaliw.” Makaisuro unay ken ababa. Pinaregtanak nga agbalin nga ad-adda a nasiput iti naespirituan kadagitoy a maudi nga al-aldaw.
M. V., Pilipinas
Panangkidnap Anian a nagsayaat a mensahe ti linaon ti serye a “Panangkidnap—No Apay a Sangalubongan a Pangta”! (Disiembre 22, 1999) Dimteng daytoy nga artikulo idi a sigagagar a buybuyaen ti intero a lubong ti agsasaganad a pasamak iti pannaka-hijack ti eroplano nga Indian Airlines idi Disiembre 24. Sapay koma ta basaen ken iyaplikar dagiti autoridad ti adu a singasing iti artikuloyo tapno makontrol ti panangkidnap!
A. S., India
Biktima ti Coma Pagyamanan iti kapadasan ni Michiko Ogawa. (“Pinabileg ti Namnama Tapno Makapagibtur Kadagiti Pakasuotan,” Disiembre 22, 1999) Lima la nga aldawko idi naaksidente ni lakayna. Nagrigat a panunoten nga awan ti puot ni Seikichi iti dandani intero a panagbiagko! Ni Michiko ket talaga a tinulongan ni Jehova a nangpadakkel iti dua a babbarona ken nangibtur iti daytoy a narigat a kasasaad.
L. N., Estados Unidos
Napikapik unay ti pusok gapu iti artikulo. Agsolsoloak nga agbibiag ket nabiit pay a naammuak nga adda kanserko. Kalpasan ti panangbasak iti daytoy nga artikulo, kayatko nga arakupen ni Michiko ken agyaman iti kinamatalekna ken Jehova agpapan pay kadagiti pakasuotan. Idi damo, iti kasasaadko, kayatko nga adda milagro a mapasamak. Ngem ita kas ken Michiko, kayatko laengen a maaramid ti pagayatan ni Jehova.
M. S., Estados Unidos
Panangagas a Di Mausar ti Dara Ti serye a “Panangagas ken Panagopera a Di Mausar ti Dara—Umad-adu ti Agkalikagum” (Enero 8, 2000) ket gapuanan ti adelantado a panagsirarak. Mangal-alaak iti kina-nars ken intedko ti magasin iti maysa a kaeskuelaak ken iti maysa kadagiti maestrak. Iti napalpalabas, impakita dagitoy a tattao a kagurgurada dagiti Saksi ni Jehova. Ngem naragsakanda a nangawat kadagitoy nga artikulo agraman ti dadduma pay nga impormasion maipapan kadagiti Saksi ni Jehova.
R. P., Switzerland
Dua kadagiti annakko ti naaksidente iti kotse idi 1998. Nadangran unay ti gurong ti barok. Namin-adu nga imbagana a dina kayat ti mayalisonan iti dara! Ngem di kabaelan ti ospital ti mangagas a di mausar ti dara. Nayakar iti sabali nga ospital, ngem di kayat dagiti addaan rebbengen a mangagas nga operaen malaksid no makadanon ti hematocrit-na iti 35. (Bimmaban agingga iti 8.1.) Binaybay-anda, a kas man la ur-urayenda a matay ti barok. Ngem bayat nga impakatda dagiti pamay-an ti panangagas a di mausar ti dara—inngatoda ti gurongna, naineksionan iti erythropoietin, ken dadduma pay—ngimmato ti hematocrit-na iti 35.8! Nagballigi ti operasion, ngem ti pannakaitantan ti pannakaagasna ti nakaigapuan iti adu a permanente a pannakadangranna. Sapay koma ta naikalikagum a basaen ti tunggal doktor, siruhano, ken anesthesiologist dagitoy nga artikulo.
L. L., Estados Unidos
Makaliwliwa a maammuan nga adu a doktor ti situtulok a makitinnulong kadagiti Saksi ni Jehova. Dagus nga ipanko daytoy a magasin iti doktorko. Ammok nga apresiarennanto daytoy.
U. M., Estados Unidos
Dimteng ti artikulo iti mismo a tiempo ti nayeskediul a pannakaoperak. Idi bimmaba ti blood count-ko gapu iti nakaro a panagsayasay, inusarko daytoy a magasin a nangilawlawag kadagiti agtartrabaho iti ospital ken kadagiti miembro ti pamiliak no apay a diak agpayalison iti dara. Agyamanak ken Jehova ta nakaungarakon a naan-anay.
C. B., Estados Unidos