“Dagiti Napusek a Siudad”
“Agkaraakar dagiti tattao itatta, ket mapan iti siudad ti kaaduan kadagiti pumanaw iti pagtaengan tapno agsapul iti nasaysayaat a biag.”
KASTA ti kinuna ti introduksion ti maysa nga artikulo iti publikasion a Foreign Affairs a napauluan “Dagiti Napusek a Siudad Kadagiti Napanglaw a Pagilian.” Sigun iti dayta nga artikulo, adu a tattao ti “maallukoy gapu kadagiti naraniag a silaw, wenno mapilitanda nga agtalaw iti probinsia gapu iti rigat iti politika, ekonomia, kagimongan, ken pannakadadael ti ekolohia.”
Ngem kasano kapartak ti idadakkel dagiti siudad? Pattapattaen ti dadduma a sumangpet kadagiti siudad ti makapakellaat a nasurok a sangamilion iti kada lawas! Kadagiti napanglaw a pagilian, nasurok a 200 a siudad ti addaanen iti populasion a nasurok a maysa a milion. Agarup 20 ti addaanen iti sangapulo a milion! Ket di manamnama a bumaba. Alaentayo a pagarigan ti siudad ti Lagos, Nigeria. Sigun iti report ti Worldwatch Institute, “inton 2015, ti Lagos ket pagtaenganton ti dandani 25 a milion. Dayta idi ti maika-13 a kadakkelan a siudad iti lubong ngem agbalinton a maikatlo a kadakkelan a siudad.”
Patien ti adu nga eksperto a dakes daytoy a pagilasinan para iti masakbayan. Namakdaar ni Federico Mayor, dati a direktor heneral iti United Nations Educational, Scientific, and Cultural Organization, nga inton 2035, “tallo a ribu a milion pay ti agindegton kadagiti adda itan a dadakkel a siudad.” Tapno maaywanan daytoy nakaad-adu a tattao, “masapul nga agibangontayo iti sangaribu a siudad a pagindegan ti tallo a milion iti sumaganad nga uppat a pulo a tawen, duapulo ket lima iti kada tawen.”
Kunaen pay dagiti eksperto a makadadael kadagiti siudad iti intero a lubong ti napartak nga iyaadu ti populasion dagiti siudad. Ket karaman iti dayta dagiti siudad iti narang-ay nga industrialisado a lubong. Ngem ania aya dagiti parikut a sangsanguen ti adu a siudad, ken ania ti mabalin nga epekto daytoy kenka? Adda kadi dagiti manamnama a solusion? Sukimaten dagiti sumaganad nga artikulo dagitoy a nagpapateg nga isyu.