Manipud Kadagiti Agbasbasa

Uniberso Nagustuak unay ti serye a “Ti Uniberso​—Nairana Aya a Rimsua?” (Oktubre 8, 2000) Makapainteres unay a maammuan no kasano a nakaur-urnos a pinarsua ni Jehova a Dios ti amin a banag. Silalawag nga ipakita ti artikulo a produktonatayo ti panamarsua ket saan a ti ebolusion.

E. V., Estados Unidos

Kinatalged ti Panageroplano Pagyamanan iti artikulo a “Panamagbalin a Nataltalged ti Panageroplano.” (Setiembre 22, 2000) Nupay kasta, nadlawko a saan a Boeing 747 ti naretrato a disso nga ayan ti piloto a kas iti nadakamat no di ket Boeing 777.

M. R., Czechia

Saankami a nakaala kadagiti retrato ti Boeing 747 a simulator. Dayta ti gapuna a dinakamat ti artikulo a ti 747 a simulator ket “kaasping ti makita.”​—ED.

Stock Market Pagyamanan iti balanse nga artikulo a “Nainsiriban Kadi ti Agpuonan iti Stock Market?” (Oktubre 8, 2000) Nasursurok babaen ti kapadasan a masapul nga agannadak kadagiti mapagduaduaan a pamalatpatan maipapan iti stock. Masansan a mangiturongda iti dakdakkel a pakalugian. Sakbay a gumatangka kadagiti stock, nainsiriban no usigem ti pangkaaduan a kasasaad ti stock market.

N. B., Alemania

Diak anamongan ti imbagayo a ti panagipuonan iti stock market ket saan a panagtalek ti maysa a tao iti “dios ti Naimbag a Gasat.” (Isaias 65:11) Makuna a panagsugal ti panagpuonan ti maysa a tao iti kellaat nga agbalbaliw a sistema a saan a piho ti pamay-an ti panagandarna.

P. B., Estados Unidos

Talaga a dakkel ti posibilidad a malugika no agpuonanka iti stock market. Ket kas iti aniaman a negosio, rumsua latta dagiti saan a piho a kasasaad. Nupay kasta, di umiso ti panangibaga a ti panagnegosio iti stock market ket panagsugal. Ti panagsugal ramanenna ti panangisukat iti kuarta nga awan ti aniaman a kasukatna a pudno a tagilako. Nupay kasta, ti maysa nga stock irepresentarna ti aktual a bingaymo kas maysa kadagiti makinkua iti dayta a negosio. Maibilang ngarud a ti panagnegosio iti stock ket panaggatang ken panaglako kadagiti lehitimo a tagilako.​—ED.

Naidestiero Idiay Siberia Napabilegak iti kinamatalek ni Stepan ken ti dadduma pay a matalek a Kristiano a kakabsat a nadakamat iti pakasaritaan ni Alexei Davidjuk, a napauluan “Ti Kangrunaan a Pakaseknak​—Panagtalinaed a Nasungdo.” (Oktubre 8, 2000) Nakatulong kaniak ti nadakamat a makagapu iti panangliput ti maysa a kabsat​—“agsipud ta insardengnan a basaen ken patien ti Biblia.” Dagitoy a sasao ti nangpabaro iti determinasionko a mangitultuloy iti regular a panagadalko iti Nasantuan a Kasuratan.

A. V., Georgia

Aglablabes nga Isports Nabiit pay nga inikkandak iti gundaway a makipaset iti hang gliding. Makagargari ti tukon, ngem kayatko idi a maammuan ti panangmatmat ti Biblia maipapan iti dayta a banag. Sumagmamano nga aldaw kalpasanna, naawatko ti sungbat babaen ti artikulo nga “‘Aglablabes nga Isports’​—Sarakusokem Aya ti Peggad?” (Oktubre 8, 2000) Kasla makapaamanga a kapadasan ti makipaset iti hang gliding. Ngem nakapatpateg ti relasionko ken Jehova ket diak kayat nga isarsarak ti bagik babaen ti pannakipasetko iti dayta.

M.M.S., Brazil

Kinunayo a “posible a babaen ti maysa a sirmata” ti panangsulisog ni Satanas ken Jesus. Saan kadi a dagiti sulisog ket aktual a kapadasan?

C.G.H., Estados Unidos

Narigat a maawatan ti sumagmamano nga aspeto iti salaysay ti Biblia no maipaulog a literal. Kas pagarigan, awan ti bantay nga umdas ti kangatona tapno pangipakitaan ni Satanas ken Jesus iti “amin a pagarian ti lubong ken ti dayagda.” Ken mabalin a saan met nga ipalubos ni Jesus nga isut’ literal nga ‘ipan ti Diablo iti nasantuan a siudad,’ wenno isaadna “iti pannakabaluarte ti templo.” (Mateo 4:5-8) No kasta, nalawag nga adda sirmata a nausar. No kasano man ti pannakaiparangna, aktual a sinulisog ni Satanas ni Kristo. Ti panagkitakit ni Jesus nga agpasulisog ti pammaneknek iti di maisin a kinatarnawna.​—ED.