Ti Church of England—Awanan Panagkaykaysa
BABAEN TI MANNURAT TI AGRIINGKAYO! IDIAY GRAN BRITANIA
TI MAIKA-13 a Lambeth Conference ti Church of England ket naangay idiay Canterbury idi 1998 iti asideg ti 900 ti tawennan a katedralna. Iti panagbitlana iti komperensia, kastoy ti kapaliiwan ni Obispo William E. Swing: “Masapul nga isardengen ti relihion ti panagbalinna a konsumision ken rugiannan ti mangted iti solusion. Awanto a pulos ti talna kadagiti nasion no awan ti talna kadagiti relihion.”
Nakadkadlaw ti kinaawan panagkaykaysa dagiti relihion kas ti kinaawan panagkaykaysa dagiti agkakarelihionan ken dagiti kleroda. Nagkitakit ti maysa nga obispo a tumabuno iti komperensia, a maang-angay iti kada sangapulo a tawen nanipud idi 1948, ta dimmar-ay ngamin dagiti babbai nga obispo. Binusor ti dadduma a timmabuno ti pannakipaset dagitoy a babbai kadagiti saritaan maipapan iti Biblia.
Nupay ti pannakaorden dagiti babbai ti kangrunaan a napagdedebatean iti komperensia idi 1988, ti homoseksualidad ti kangrunaan a napagdedebatean idi 1998. Nagbanaganna, nagnunumuan dagiti obispo a ti homoseksualidad ket “maikontra iti kasuratan.” Apay a kasta ti inkeddengda?
Ti maysa a makagapu ket mabalin a magagaran dagiti Anglicano a mangpabileg iti relasionda iti Iglesia Katolika Romana. Ket naamirisda a dida manamnama a makisarita ti relihionda iti Iglesia Katolika Romana no itultuloyda nga “anamongan ti homoseksualidad kadagiti kleroda.” Ti maysa pay a nabatad a makagapu ket mabalin a ti panagamakda iti Islam. No nangipaulogda idi iti resolusion a mangpanuynoy kadagiti homoseksual a papadi, kaipapanan dayta ti kunaen dagiti Africano nga obispo a “panagpatingga ti ebanghelikal a pannakisarita” kadagiti estado nga Islam.
Ipadamag ti The Sunday Telegraph ti maysa pay nga isyu a nakaigapuan ti kinaawan panagkaykaysa iti komperensia: “Iti adu a paset ti Africa, ti kangrunaan a kuestion dagiti misionero isut’ poligamia.” Iti panangutobna iti problema a sarsarangten dagiti Anglicano idiay Africa, kinuna ti maysa nga obispo: “No adda agdonar iti nagdakkel a gatad iti Simbaan ngem adu ti asawana, ania ti aramiden dagiti obispo nga Anglicano?” Idi nadlawna ti manamnama a pagtungpalan ti debate, impadamag ti The Times iti London: “Awanto latta ti makuna dagiti Anglicano nga obispo maipapan iti poligamia.”
Ita pay laeng a nagdedebatean dagiti Anglicano nga obispo ti relasionda iti Islam. “Nakaro ti panagginnura dagiti Kristiano ken Muslim idiay Nigeria,” kinuna ti obispo iti Kaduna, Nigeria. Imbagana a nasurok a 10,000 ti natay kadagiti narelihiosuan a rinnupak iti pagilianna. Malapdan laeng ti narelihiosuan a gubat idiay Africa no magun-odan ti nasaysayaat a pannakaawat kadagiti patpatien ti Islam.
Ania ti masakbayan ti 70 a milion a tattao iti intero a lubong, a sigun iti maysa a mapagsusupiatan a pattapatta, ket miembroda iti relihion nga Anglicano?a Makapaupay ti kasasaad, ta impadamag ti The Times: “Ti komperensia ti namagsiddaaw iti adu nga agpalpaliiw ken nakipaset ta no dadduma ad-adda a kaasping dayta ti panagtataripnong ti napolitikaan a partido imbes a ti panagtataripnong ti Nakristianuan a relihion tapno aglualoda.”
Di pakasdaawan a kinuna ti The Sunday Times a ‘timmaud ti guranggura ken panagsakit ti nakem iti dayta a komperensia.’
[Footnote]
a Sigun iti The Times, daytoy a bilang a 70 a milion ket “kasla nakaskasdaaw” ngem “ti manmano a maibaga ket 26 a milion kadagitoy ti miembro ti Church of England. Maysa a milion laeng ti makimismisa ita ditoy [Britania], ti dadduma ket agkunkuna laeng nga Anglicanoda.”
[Ladawan iti panid 24]
Ti 900 ti tawennan a Canterbury Cathedral