Kasapulam ti Umdas a Turog!

Adda kadi asinoman a di umanamong a napateg ti nargaan a turog tapno mataginayon ti kinasalun-at? Nalabit nga awan. Ngem ti pannaturog ket saan unay a napateg iti adu a tao. “Ngem sagabaem dayta kabigatanna,” kuna ni Shawn Currie, maysa a klinikal a sikologo ken katulongan a propesor iti University of Calgary, idiay Canada. No kurang ti turogmo, nalaklakaka a masuron ken lumdaang pay ketdi no dadduma.

“Matmatan dagiti sientista a ti pannaturog ti mangpaganaygay manen iti utek, ken agtultuloy ti panagsursuro bayat ti pannaturog,” kuna ti periodiko a Calgary Herald. Kuna ni propesor Currie: “No rabii, mapabileg ti memoriam ken maipempen a nalaing iti panunotmo ti aniaman a nasursurom iti agmalmalem. Kinapudnona, maapektaran ti panagsursurom no awan tiempom nga aginana.” Kunana pay a “no umdas ti turogmo, mabalin nga adda maitulongna tapno sumalun-at ti emosionmo.”

Kasano ngay ti kapaut ti umdas a pannaturog? Nupay kunaen ti adu nga eksperto a kaaduanna a walo nga oras ti kasapulan, kuna ni Currie: “Nagduduma ti kapaut ti pannaturog a kasapulan dagiti tattao.” Gapu iti dayta, insingasingna nga ikagumaan koma ti maaddaan iti nargaan a turog. Ngem kasano a maaramid daytoy, nangruna kadagiti alimbasagen? Adtoy ti sumagmamano a singasing:

◼ Agdiguska iti nabara a danum sakbay a maturogka.

◼ Agehersisioka iti kalkalainganna sumagmamano a daras iti kada lawas; ngem dika agehersisio iti makabannog unay sakbay a maturogka.

◼ Pagtalinaedem a natalna, nasipnget, ken napariir ti siledmo.

◼ Ikagumaam ti agriing iti isu met la nga oras iti kada agsapa tapno mataginayonmo ti regular a pannaturog.

Gapu ta nabatad a makapasalun-at, agmasiribka koma ken tagipatgem ti nargaan a pannaturog.