Kinaawan Pagtaengan—Sangalubongan a Parikut
BABAEN ITI MANNURAT TI AGRIINGKAYO! IDIAY POLAND
“NAANGDOD, nakadungdungrit, mammartek, awanan sanikua, awanan am-ammo, nakapimpimanda!” Makapakellaat ti kasta a pannakailadawanda. Ngem sigun kadagiti boluntario a tumultulong kadagiti awanan pagtaengan idiay Czestochowa, Poland, kasta ti gagangay a panangmatmat ti tattao kadagidiay awanan pagtaengan.
Sigun iti report iti The Economist sumagmamano a tawen ti napalabasen, adu kadagiti rinibu nga ubbing iti kalsada ti agnanaed iti sirok dagiti kalsada iti Ulaanbaatar, Mongolia, iti daldalan nga agturong kadagiti imburnal wenno sistema a mangpaimeng iti siudad. Nupay masdaawda a makaammo maipapan kadagitoy nga ubbing nga awanan pagtaengan, adu a taga-Mongolia ti agkuna a “ti kinasadut unay ti tattao a mangaywan kadagiti annakda ti makagapu iti kastoy a kasasaad,” sigun iti pagiwarnak.
Iti sabali a paset ti lubong, dagiti ubbing iti kalsada ket papatayen ti bunggoy dagiti agkunkuna a vigilante. Apay? Kastoy ti inlawlawag ti maysa a publikasion ti United Nations: “Idiay Latin America, adu a tattao iti korte, polisia, media, negosio, ken kaaduan a kagimongan ti mamati a dagiti ubbing iti kalsada ti mangdadael iti nasayaat a kababalin ti sibilisado a kagimongan.” Kastoy ti nailanad iti dayta met la a publikasion: “Sigun kadagiti damag, tallo nga ubbing iti kalsada ti promedio a mapapatay iti kada aldaw iti estado ti Rio de Janeiro.”
Dagiti awanan pagtaengan “pagbutngen ken pagdanagendakami . . . , ngem tattaoda met a mabisbisin a kas kadakami. Aduda, ket talaga nga awan dagiti nasken a kasapulanda tapno maaddaanda iti maitutop a panagbiag.” Kasta ti kuna ti maysa a Web page nga inaramid dagiti boluntario a tumultulong kadagiti awanan pagtaengan idiay Czestochowa. Kinuna pay dayta a nagipadamag: “Sapay koma . . . ta addanto mangngaasi a tumulong iti daytoy dakkel a pakasapulan.” Ania a talaga ti kasapulan, ken kasano kadakkel dayta?
[Ladawan iti panid 2, 3]
Maysa a grupo ti ubbing nga awanan pagtaengan ti agnanaed iti daytoy nga imburnal
[Credit Line]
Jacob Ehrbahn/Morgenavisen Jyllands-Posten