TV—Mannanakaw iti Tiempo?
NO ADDA nangitukon kenka iti maysa a milion a pisos no la ket ta isardengmo ti agbuya iti telebision, aramidem kadi? Sumagmamano a tawenen ti napalabas, kinuna ti 1 iti kada 4 nga Americano a napagsaludsodan a saanda nga aramiden dayta. Iti sabali a surbey, nayimtuod kadagiti lallaki no ania ti kangrunaan a kayatda. Insungbat ti kaaduan a kayatda a masagrap ti talna ken kinaragsak. Ngem maikadua laeng dayta, ta ti kangrunaan a kayatda ket dakkel a telebision!
Ti telebision ket magusgustuan dagiti tattao iti intero a lubong. Iti damo a pannakapasayaat ti telebision idi 1931, kinuna ti tserman ti Radio Corporation of America: “Apaman a naan-anay a mapasayaat ti telebision, nainkalintegan laeng a namnamaentayo nga aminton a tattao ti agbuya iti dayta.” Kasla nalabes idi dagita a sasao, ngem saan itan. Ti bilang dagiti telebision iti intero a lubong ket agarup 1.5 a bilion, ket umad-adu pay dagiti agbuybuya. Kayat man dayta ti dadduma wenno saan, dakkel ti paset ti telebision iti biag dagiti tattao.
Nagadu a tiempo ti busbusbosen dagiti tattao iti panagbuyada iti telebision. Iti nabiit pay a sangalubongan a panagadal, naammuan nga iti promedio, nasurok la bassit a tallo nga oras ti busbusbosen dagiti tattao iti panagbuyada iti telebision iti inaldaw. Dagiti taga-Amianan nga America agbuyada iti uppat ket kagudua nga oras iti inaldaw, bayat a ti kapautan ket dagiti Hapones a lima nga oras kada aldaw. Nagadu dagita nga oras no magupgop. No uppat nga oras kada aldaw nga agbuyatayo iti telebision, agdagupto dayta iti sangapulo a tawen inton agtawentayo iti 60. Kaskasdi, awan la ketdi kadatayo ti mayat a maikitikitto dagitoy a sasao iti lapida ti tanemtayo: “Ditoy a naitanem ti ay-ayatentayo a gayyem, a nangbusbos iti apagkanem iti biagna iti panagbuya iti TV.”
Pagragsakan kadi dagiti tattao ti panagbuyada iti telebision isu nga adu nga oras ti busbusbosenda iti dayta? Adu ti agkuna a makonsiensiada no awan unay ti makagunggona a maar-aramidda gapu iti nakaad-adu a panawen a busbusbosenda nga agbuybuya iti TV. Kuna ti dadduma nga adiktoda iti TV. Siempre, saanka a maadikto iti TV a kas iti pannakaadikto ti maysa iti droga, nupay adda dagiti pagpadaanda. Mangbusbos dagiti adikto iti adu unay a tiempo iti panagdrogada. Nupay kayatda a kissayan dayta a tiempo wenno isardeng ti bisioda, saanda a maaramid dayta. Baybay-anda dagiti napateg nga aktibidadda iti kagimongan ken iti pamiliada gapu iti panagdrogada, ket sagabaenda dagiti epektona no isardengda dayta. Mapasaran amin dagitoy ti tattao a nalabes ti panagbuyada iti telebision.
“Ti pannangan iti adu unay a diro saan a nasayaat,” insurat ni masirib nga Ari Solomon. (Proverbio 25:27) Dayta a prinsipio ket agaplikar met iti panagbuya iti telebision. Nupay nagadu ti nasayaat a mabuya iti telebision, ti nalabes a panagbuya iti dayta kissayanna ti tiempo a rumbeng a mabusbos koma iti pamilia, lapdanna ti panagbasa ken pananggun-od dagiti estudiante iti nangangato a marka, ken maysa a pakaigapuan ti nalabes a kinalukmeg. No napaut unay ti panagbuyam iti TV, nainsiriban a panunotem no ania dagiti magunggonam iti dayta. Nakapatpateg ti tiempotayo isu a ditay koma saysayangen. Nainsiriban met a panunotentayo no ania dagiti buybuyaentayo. Usigentayo dayta a suheto iti sumaganad nga artikulo.