Maysaak Idi a Barayuboy nga Anak

Kas insalaysay ni Meros William Sunday

Sipud kinaubingko, naisuro kaniak nga ayatek ti Dios; ngem idi agtawenak iti 18, nagbalinak a rebelioso ket pimmanawak iti pagtaenganmi. Iti 13 a tawen, nagbiagak a kas iti barayuboy nga anak iti pangngarig ni Jesus. (Lucas 15:11-24) Naglakoak iti droga ket dandanik dinadael ti biagko. Palubosandak a mangisalaysay iti makagapu a binaliwak ti estilo ti panagbiagko ken nagawidak.

NAIPASNGAYAK idi 1956, ket siak ti maikadua iti siam nga annak dagiti Kristiano a dadakkelmi. Nagnaedkami idiay Ilesha, maysa nga ili ti makin-abagatan a laud a Nigeria. Dimmakkel ni tatangko kas Katoliko, ngem idi 1945, isu ket inikkan ni ulitegna iti libro a The Harp of God.a Kalpasan a nabasana dayta, rinugianna ti makitimpuyog kadagiti Saksi ni Jehova. Idi 1946, nabautisaran ni tatangko ket simmaruno met ni nanangko di nagbayag kalpasanna.

Malagipko pay no kasano a pudpudno ni Jehova kaniak bayat ti kinaubingko ken no kasano ti kinaregtak idi iti panangasaba a kaduak dagiti nagannakko. Inyadalannak ni Tatang iti Biblia. Sagpaminsan met nga inyadalannak ni Alice Obarah, nga asawa ti agdaldaliasat a manangaywan iti lugarmi. Kayat ti dadakkelko nga agbalinak nga amin-tiempo a ministro. Nupay kasta, insingasing ni Nanang nga agturposak pay iti haiskul.

Ngem apaman a nangrugiak nga ageskuela idi agtawenak iti 16, di nainsiriban a nakigayyemak kadagiti kaeskuelak a saan a mangraraem kadagiti prinsipio ti Biblia. Anian a nagdakkel a kinamaag dayta! Di nagbayag, nangrugiak nga agsigarilio ken agaramid iti imoral. Naamirisko a ti baro nga estilo ti panagbiagko ket maikontra iti nasursurok kadagiti Nakristianuan a gimong, isu nga insardengkon ti makigimong ken mangasaba. Nariribukan dagiti dadakkelko, ngem diakon maseknan iti rikna ti sabsabali.

Pimmanawak iti Pagtaenganmi

Kalpasan ti dua laeng a tawenko iti haiskul, pimmanawak iti pagtaenganmi ket nakipagnaedak kadagiti gagayyemko iti lugarmi. No dadduma, sililimed nga umunegak iti balaymi, gammatak ti aniaman a mabalinko nga alaen a taraon, sa pumanawak a dagus. Nakaunget ni Tatangko isu nga insardengnan ti agbayad iti matrikulak, bareng no agbalbaliwak.

Nupay kasta, agarup iti dayta met la a tiempo, naipaayanak iti scholarship. Adda taga-Scotland a mangbaybayad iti matrikulak ken no dadduma, ikkannak pay kadagiti regalo, agraman kuarta. Kabayatanna, dua kadagiti kakabsatko a lallaki ti nagsardeng metten a makitimpuyog kadagiti Saksi ni Jehova. Amin dagitoy ti nangyeg iti di mailadawan a ladingit kadagiti dadakkelko. Namin-adu nga aglulua ni Nanang a nagpakpakaasi kaniak. Nupay mariknak idi ti agbain, kaskasdi a saanak a nagbalbaliw.

Kadagiti Dadakkel a Siudad

Kalpasan ti panagturposko iti eskuelaan idi 1977, napanak idiay Lagos ket naaddaanak iti trabaho. Di nagbayag kalpasanna, ilegal a nakagun-odak iti kuarta ket gimmatangak iti taksi. Gapu ta ad-adun ti kuartak, nangrugiak nga agdroga ken masansan nga addaak kadagiti nightclub ken balay dagiti balangkantis. Di nagbayag, naumaak iti biag idiay Lagos, isu nga idi 1981, immakarak idiay London. Manipud sadiay, napanak idiay Belgium ket nagadalak iti Pranses ken paset-tiempo a nagtrabahuak iti restawran. Ngem binusbosko ti kaaduan a tiempok iti panangibiahe kadagiti lugan ken elektroniko nga alikamen nga agturong ditoy Nigeria.

Sinuratan ni Tatang ti sanga nga opisina dagiti Saksi ni Jehova idiay Belgium ket kiniddawna a sapulendak ken ikagumaandak nga iyadalan iti Biblia. Ngem kada umay dagiti Saksi iti pagtaengak, agkedkedak a dumngeg kadakuada. Nangrugiak a tumabuno iti simbaan ket kada malpas ti misa, mabalinmi ti mangan, uminum, ken makipaset iti nagduduma nga isport.

Biag kas Aglaklako iti Droga

Idi 1982, nangibiaheak ditoy Nigeria iti nakanginngina a lugan ken napanak a mismo iti sangladan tapno sigurado a mairuar dayta. Ngem natakuatan ti Customs ti Nigeria a palso dagiti dokumento ti pannakaibiahe dayta, isu a naibaludak iti agarup 40 nga aldaw. Nagpiansa ni Tatang tapno makaruarak. Gapu ta kasapulak ti kuarta tapno malpasen ti kasok, nagsubliak idiay Belgium nga addaan iti sumagmamano a produkto, agraman ti sumagmamano a kilo ti marijuana. Kalpasan a naabsueltoak iti kasok a panangpeke iti dokumento ti panagangkat, impamaysak ti panagnegosio iti droga.

Iti naminsan a biahek, naarestoak idiay Netherlands. Dagiti opisial ti imigrasion pinapanawdak iti pagilian, nga inlugandak iti eroplano nga agturong iti Nigeria. Iti biahe, naam-ammok ti dadduma nga aglaklako iti droga, ket nagtutulagkami nga agtitinnulongkami iti negosio a droga. Idi Enero 1984, immakarak iti sabali a pagilian ti Africa. Gapu ta makapagsaoak iti Pranses, ti lenguahe a maus-usar sadiay, di nagbayag nagayyemko dagiti polis, soldado, ken opisial ti imigrasion. Nabaelanmi ngarud ti agangkat iti rinibu a kilo a marijuana nga agturong iti dayta a pagilian.

Naaresto ken Naibalud

Nupay kasta, naisagmakak manen. Nakitulagak iti maysa a kapitan iti militar tapno tumulong kaniak iti pannakaiserrek dagiti tagilakok babaen ti eropuerto iti dayta a pagilian. Ngem naladaw a simmangpet isu a naarestoak. Kinabkabildak dagiti polis ken pinarigatdak iti kasta unay isu a naawananak iti puot. Inyospitaldak sadak pinanawan sadiay, ta impagarupda no matayakon. Ngem nakalasatak sa kalpasanna naidarumak, nasentensiaan, ken naibaludak.

Idi makaruarak iti pagbaludan, ti gayyemko a nangitalkak iti balayko inlakona amin a sanikuak sa nagtalaw. Tapno adda pagbiagko, dagus a nangrugiak nga aglako iti marijuana. Ngem sangapulo nga aldaw kalpasanna, naarestoak manen ken naibaludak iti tallo a bulan. Idi makaruarak, masakitak unay nga uray la dandaniak manen natay. Ngem naipamuspusak ti nagawid.

Intuloyko ti “Negosiok”

Idiay Lagos, nakipagkitaak iti dadduma kadagiti kakaduak iti negosio, ket napankami idiay India, a gimmatanganmi iti heroin nga aggatad iti agarup $600,000 (agarup ₱30,900,000.00). Manipud Bombay (Mumbai itan), immakarkami idiay Switzerland, kalpasanna idiay Portugal, ken kamaudiananna idiay Espania. Tunggal maysa kadakami ket nakaganansia iti dakkel sa nagsublikami idiay Lagos babaen ti nagduduma a ruta. Idi arinunos ti 1984, naglakoak manen iti droga. Arapaapko ti agbalin a milionario saakto agnaeden idiay Estados Unidos.

Idi 1986, innalak amin ti kuartak ket gimmatangak iti puro a heroin idiay Lagos. Impanko dayta iti sabali a pagilian, ngem inikutan dayta ti naagum a negosiante ti droga a di pulos nagbayad kaniak. Gapu iti amakko nga amangan ta papatayendak, nagsubliak idiay Lagos ket awan a pulos ti nangibagbagaak iti napasamak. Nadidigraak, agpadpada iti pinansial ken emosional. Iti kaunaan a gundaway, nagtugawak ket inut-utobko ti panggep ti biag. ‘Apay a kastoy ti mapaspasamak kaniak?’ inyimtuodko iti bagik.

Panagsublik iti Dios

Maysa a rabii, di nagbayag kalpasanna, nagkararagak ken Jehova tapno tulongannak. Pagammuan ta kabigatanna, nagtuktok iti ridawko ti maysa a nataenganen nga agassawa. Dagitoy ket Saksi ni Jehova. Sitatalna a nagimdengak kadakuada ken nangalaak iti magasin. “Saksi ni Jehova dagiti dadakkelko,” inlawlawagko. “Ni Alice Obarah idi ti mangyad-adal kaniak iti Biblia.”

Kinuna ti lakay a ni P. K. Ogbanefe: “Am-ammomi unay ti agassawa nga Obarah. Agserserbida itan iti sanga nga opisina ti Nigeria a masarakan idiay Lagos.” Indagadagda a makipagkitaak kadagiti agassawa nga Obarah. Naparegtaak unay idi nakipagkitaak iti agassawa nga Obarah. Kalpasan dayta, ni Kabsat Ogbanefe ti nangyadal kaniak iti Biblia, ket di nagbayag, rinugiak a balbaliwan ti imoral nga estilo ti panagbiagko. Saan a nalaka dayta agsipud ta nabayagen nga agdrogdrogaak ket nagrigat nga isardeng. Ngem determinadoak a mangdalus iti biagko.

Nupay kasta, nagadu ti sulisog ken pakarigatan! Dagiti agkunkuna a gagayyemko umayda iti balayko ket makasulisog dagiti tukonda. Adda tiempo nga agsigarilio ken makaaramidak manen iti imoral. Sipapasnek a nagkararagak iti Dios. Di nagbayag, nabigbigko a yantangay dagiti gagayyemko iti lubong ti nangiwawa kaniak, awan ngarud ti maitulongda ita kaniak. Naamirisko a tapno rumang-ay ti espiritualidadko, nasken a panawak ti Lagos. Ngem mabainak nga agawid idiay Ilesha. Idi agangay, nupay kasta, nagsuratak kada Tatang ken manongko ket dinamagko no mabalinko ti agawid.

Impanamnama ni Tatang a pakaragsakanda ti panagawidko, ken kinuna ni manongko a tulongannak iti pinansial. Isu a nagawidak, sangapulo a tawen kalpasan a pinanawak dagiti dadakkelko. Sibabara nga inawatdak. “Pagyamanan, Jehova!” kinuna ni nanangko. Idi simmangpet ni tatangko iti dayta a rabii, kinunana, “Tulongannaka ni Jehova.” Iti kaaddami amin a sangapamiliaan, nagkararag ni tatangko, a kiniddawna a tulongannak ni Jehova itan ta nagawidak tapno aramidek ti pagayatanna.

Pangsubbot iti Napukaw a Tiempo

Intuloyko ti nagadal iti Biblia ket nagbiitak a rimmang-ay isu a nabautisaranak idi Abril 24, 1988. Dagus a nagbalinak nga aktibo unay iti ministerio. Idi Nobiembre 1, 1989, inrugik ti agserbi kas payunir—maysa nga amin-tiempo nga ebanghelisador. Idi 1995, naawisak a tumabuno iti maikasangapulo a klase ti Ministerial Training School idiay Nigeria. Kalpasanna, idi Hulio 1998, nadutokanak kas agdaldaliasat a manangaywan, a sumarsarungkar kadagiti kongregasion dagiti Saksi ni Jehova. Makatawen kalpasanna, naaddaanak iti naragsak a kapadasan—ti pannakasarakko ken Ruth, a nagbalin nga asawak ken katakunaynayko iti panagdaliasat.

Rimmang-ay met iti naespirituan ti dadduma a kameng ti pamiliak. Maysa kadagiti manongko, a simmardeng met idi nga agserbi ken Jehova ti nagsubli iti pudno a panagdayaw ket nabautisaran. Maragsakanak ta nakita ni Tatang ti panagsublimi iti kinapudno. Siraragsak a nagserbi ni Tatang kas ministerial nga adipen iti kongregasion agingga iti ipapatayna idi 1993, idi agtawenen iti 75. Agtultuloy ni Nanang iti naregta a panagserbina ken Jehova idiay Ilesha.

Nagdaliasatak iti 16 a pagilian iti Europa, Asia, ken Africa tapno agsapul iti kinabaknang. Nagbanaganna, sinalputko ti bagik iti adu nga ut-ot. (1 Timoteo 6:9, 10) No lagipek ti napalabas, pagbabawyak unay ti panangsayangko iti nagdakkel a paset ti kinaagkabannuagko gapu iti droga ken imoralidad. Pagladingitak ti saem nga impariknak ken Jehova a Dios ken iti pamiliak. Kaskasdi, agyamanak ta nagnakemak sakbay a naladaw ti amin. Determinadoakon nga agtalinaed a nasungdo ken ni Jehova ken agserbi kenkuana iti agnanayon.

[Footnote]

[Ladawan iti panid 13]

Rebeliosoak idi nga agtutubo

[Ladawan iti panid 15]

Idi aldaw ti bautismok

[Ladawan iti panid 15]

Dakami ken Ruth a baketko