Adda Kadi Nangdisenio?

Seda ti Lawwalawwa

◼ Nalaglag-an dayta ngem iti kapas, ngem ti kada onsa ket nalaglagda ngem iti asero. Pinulpullon a tawen nga inad-adal dagiti sientista ti seda a patpatauden ti sumagmamano a kita ti lawwalawwa. Adu ti naatrakar iti natibker a seda​—ti kalalagdaan kadagiti pito a seda a patauden dagitoy a lawwalawwa. Nalaglagda daytoy ken ad-adda a saan a maslep ngem iti seda a patauden ti igges, a gagangay a maus-usar kadagiti kawes.

Usigem: Tapno mapataud dagiti us-usaren ti industria a sag-ut kas iti Kevlar, masapul ti nakapudpudot a temperatura ken dagiti natural a pagrunaw. Ngem ti seda ti lawwalawwa masapulna laeng ti gagangay a temperatura ti kuarto, ken danum ti mausar a pangtunaw. Kasta met, nalaglagda ti natibker a seda ngem ti Kevlar. No mapadakkel dayta a kas iti pagay-ayaman iti football, maisalat ti tumaytayab a nagdakkel nga eroplano iti iket a natibker a seda!

Saan ngarud a nakaskasdaaw nga aginteres dagiti managsukisok iti kinalagda ti natibker a seda. “Kayat dagiti sientista ti mangpataud kadagiti kasta ti kalagdana a bambanag kas iti saan a masalput ti bala a vest agingga kadagiti kable dagiti rangtay,” kinuna ni Aimee Cunningham iti magasin a Science News.

Ngem narigat ti mangpataud iti natibker a seda, ta dayta ket patauden ti lawwalawwa iti uneg ti bagina ken saan pay a naan-anay a naammuan ti proseso. “Talaga a mamagpakumbaba ti kinapudno nga adu a nalaing a tattao ti mangpadpadas a mangpataud iti banag a kadawyan a patpatauden ti lawwalawwa a masarakan iti sirok ti balay,” kuna ti biologo a ni Cheryl Y. Hayashi, a naadaw iti magasin a Chemical & Engineering News.

Ania ti makunam? Ti kadi lawwalawwa ken ti sedana a kas kalagda ti asero naiparna laeng a timmaudda, wenno dagitoy ket parnuay ti nalaing a Namarsua?

[Ladawan iti panid 24]

Mikroskopiko a buya ti seda a patpatauden ti lawwalawwa

[Credit Line]

Copyright Dennis Kunkel Microscopy, Inc.