Panangmatmat iti Lubong
◼ Iti naudi a 20 a tawen, uppat a daras ti immaduan ti natural a didigra iti intero a lubong. Nasurok a 250 a milion ti maap-apektaran iti kada tawen.—EL UNIVERSAL, MEXICO.
◼ “Ti dugudog nga isu ti kapigsaan nga angin iti Pacifico, inurnongna iti naglabas a tawtawen ti nagadu a tumtumpaw a basura.” Ti nasaknapan daytoy a basura ket kas kalawa itan ti Australia.—LA DÉPÊCHE DE TAHITI, TAHITI.
◼ Tapno mapataud ti 50 a litro a biofuel para iti pangpasahero a lugan, kasapulan ti 200 a kilo a mais, nga “umdas a makatawen a taraon ti maysa a tao!”—GAZETA WYBORCZA, POLAND.
Dagiti Biblia a Naipablaak Idiay China
“Maysa itan ti China kadagiti pagilian a mangipabpablaak iti kaaduan a bilang ti Biblia iti lubong,” kuna ni Ye Xiaowen, ti panguluen ti State Administration for Religious Affairs. Ti maysa a kompania a pagimprentaan a kukua dagiti Tsino a nakabase idiay Nanjing, kabesera ti Probinsia ti Jiangsu, ket nakaipablaaken iti maika-50 a milion a kompleto a Biblia iti pagilian. Sigun iti People’s Daily Online, “agarup 3 a milion a Biblia ti tinawen a mayim-imprenta [ti kompania] iti nabiit pay a tawtawen.” Idiay China, naipadamag nga umad-adu dagiti mangibagbaga a Kristianoda.
Mataktakaw Dagiti Imahen
“Iti naglabas a lima a tawen idiay Russia, nasurok a 1,000 a simbaan ti natakawan,” impadamag ti Russky Newsweek. Ti pannakatakaw ti agarup 40,000 nga imahen ket naireport iti Ministry of Internal Affairs ti Russia. Ita, nagtulag ti Ministry ken ti Russian Orthodox Church nga amin nga imahen iti simbaan ket makabilan iti naidumduma a marka a pakabigbigan, a makita laeng no masilawan iti ultraviolet. Dayta ti tumulong kadagiti imbestigador a mangammo iti pudpudno a makinkukua kadagiti napasubli a natakaw nga imahen. Kuna ti Russky Newsweek nga inanamongan ti Moscow Patriarchate dayta nga addang, “yantangay ti ‘naindagaan’ a marka a pakabigbigan ket dina mabaliwan ti milagro a maaramidan ti imahen.”
Pumangpanglaw ti Africa Gapu Kadagiti Gubat
“Sipud idi 1990 agingga 2005, 23 a pagilian iti Africa ti karaman kadagiti panaggugubat, ket agarup a US$300 a bilion ti nabusbos kadagita a gubat,” kuna ti International Herald Tribune. Kinuna ti presidente ti Liberia a ni Ellen Johnson-Sirleaf a dayta a “magasgastos ti Africa ket umdas koman a mausar a mangsolbar iti HIV ken AIDS iti Africa, wenno mangipaay iti edukasion, danum agraman iti pananglapped ken panangagas iti sarut ken malaria. Rinibu nga ospital, eskuelaan, ken kalsada ti mabalin a naaramid koman.” Inkomento ti periodiko a no awan la koma ti gubat, ti Africa ket “mabalin a maysa koma a narang-ay a kontinente imbes a ti kapanglawan iti lubong.”
Mabalin a Makapasayaat Kenka ti Panagridep
Ti panagridep iti aldaw iti di kumurang a tallo a daras iti kada lawas ket mabalin a kissayanna iti 37 a porsiento ti risgo nga ipapatay gapu iti atake iti puso. Dayta ti naammuan kalpasan ti panagadal a naaramid iti nasurok a 23,000 a Griego a lallaki ken babbai. Kastoy ti inlawlawag ni Dimitrios Trichopoulos, maysa a managsirarak ken epidemiologo iti Harvard School of Public Health, E.U.A.: “Dakkel ti pammaneknek a ti nakaro ken napaut a panagsikor ti mabalin a pakaigapuan ti sakit iti puso.” Innayonna a ti “panagridep iti malem ket mabalin a maysa a proseso a mangikkat iti sikor [ken] mangkissay iti bilang dagiti ipapatay gapu iti sakit ti puso.”