Panangmatmat iti Lubong
◼ “Maysa a grupo dagiti astronomo nga agus-usar iti Subaru ken Keck a teleskopio idiay Mauna Kea [Hawaii] ti nakadiskobre kadagiti nagtitipkel a galaksi a mangsaklaw iti 200 a milion a light-year iti law-ang. Silalawag a nakitada ti rukod dagita iti tallo nga anggulo.” Dagita a nagtitipkel a galaksi ti kadadakkelan pay laeng nga estruktura a nadiskobre.—SUBARU TELESCOPE WEB SITE, JAPAN.
◼ Inreport ti National Statistics Office ti United Kingdom a “ti bilang dagiti nagkallaysa [idiay England ken Wales] idi 2006 ti kababaan iti unos ti 110 a tawen. Umad-adu ti agkabbalay lattan uray dida nagkasar.”—THE GUARDIAN WEEKLY, BRITAIN.
◼ Sigun iti Pew Forum on Religion and Public Life, “44% kadagiti adulto ti nagbaliw ti relihionna, naaddaan iti relihion idinto ta dati ket awan relihionna, wenno pulos nga awanen ti relihionna.”—E.U.A.
Dagiti Kolehio ken ti Kasual a Pannakiseks
“Malaksid iti sumagmamano a narelihiosuan a kolehio . . . , awan unay ti nagdumaan dagiti publiko, pribado ken Katoliko a kolehio ken unibersidad no maipapan iti kasual a pannakiseks a gagangayen kadagiti kampus—ti kaugalian dagiti estudiante a makidenna iti nadumaduma a tattao.” Kasta ti kinuna ni Donna Freitas, teologo ken katulongan a propesor iti unibersidad, kalpasan ti panagsirarakna iti relihion ken seksual a kababalin kadagiti kolehio iti America. Sigun iti National Catholic Reporter, kinuna ni Freitas a ti kinaawan ti impluensia ti relihion iti moral nga estandarte no maipapan iti seksual a kababalin saanna laeng nga ipalgak “ti panagraira ti kasual a pannakiseks kadagiti kolehio,” no di ket ipalgakna pay “ti kinakapuy dagiti nalatak a relihion a mangsumra iti impluensia dayta a nalulok a kababalin.”
Mabayadan Dagiti Nagannak a Mangpadakkel iti Babbai nga Annak
Kuna ti BBC News a mangituktukon ti gobierno ti India iti katupag ti agarup ₱141,000 kadagiti napanglaw a nagannak a mangpadakkel kadagiti babbai nga annakda. Adda kantidad a maawat dagiti pamilia apaman a maipasngay ti anakda a babai ken bayat a dumakdakkel agingga nga agtawen iti 18. Nupay naiparit idi 1994 ti panagpili iti sikog ken panagparegreg kadagiti sikog a babbai, agraraira latta dayta. Kinapudnona, napattapatta nga iti napalabas a 20 a tawen, naiparegreg ti agarup 10 a milion a sikog a babbai isu nga iti dadduma a lugar, ad-adun ti lallaki ngem iti babbai. Sigun iti nasional a sensus idi 2001, adda 927 a babbai iti tunggal 1,000 a lallaki nga awan pay innem ti tawenda ken dumakdakkel dayta a naggidiatan. Iti maysa nga estado, 793 ti babbai iti tunggal 1,000 a lallaki.
Ti Reaksion Dagiti Billit iti Arimbangaw
Gapu iti arimbangaw kadagiti siudad, kasta unay ti panangikagumaan ti dadduma a billit tapno mangngegan ti unida. Para kadagiti tattao, mabalin a makapasikor ti arimbangaw, ngem nalabit “biag ken patay” ti kaipapanan dayta kadagiti billit, kuna ti magasin a New Scientist. Aguni ngamin dagiti kalakian tapno “makaatrakarda iti asawaenda ken makaipasdekda iti beddeng ti teritoriada.” Gapu ta napigpigsa ti nabangag nga arimbangaw iti siudad, addada billit a mangipangngeg iti kantada no rabii ken ipigpigsa wenno isingsinggitda dayta. Kuna ti magasin a saan la gayam a dagiti billit kadagiti siudad ti mangar-aramid iti kasta. Uray met dagiti adda iti asideg dagiti “dissuor ken naapres a karayan, nasingsinggit met ti panagkantada.”