Panangmatmat iti Lubong

“Datayo nga Americano patientayo pay laeng ti Dios dagiti Kristiano, ngem nakapkapuyen ti impluensiana iti politika ken kulturatayo no idilig iti napalabas.”—NEWSWEEK, U.S.A.

“Ti panagsuek ti ekonomia ken rigat ti panagbiag ket addaan iti baro a grupo dagiti biktima: Dagiti agassawa a di makabael nga agdiborsio. Kadagitoy a tiempo ti rigat, adu a tattao ti mangibilang a nalaklaka ti agtipon latta, uray no didan agkatunosan.”—THE WALL STREET JOURNAL, U.S.A.

Sigun iti surbey idiay Germany, 1 iti tunggal 3 nga ina a nasurbey ket makasursuro iti balasangna—no maipapan iti uso, pannakigayyem, panagbalin a naragragsak, wenno ad-adda a panagkompiansa iti bagi.—BERLINER MORGENPOST, GERMANY.

Adda Pay Laeng Dagiti Antibody

“Siam a dekada sipud idi 1918 a panagpatingga ti kakaruan a trangkaso, ti nakapigpigsa a panglaban iti dayta a virus ket adda pay laeng iti dara dagiti nakalasat. Dayta ti mangipakita a naisangsangayan ti kinapigsa ti resistensia ti tao,” kuna ti International Herald Tribune. Idi naeksamen ti dara dagiti nataenganen a nakalasat iti trangkaso Espaniol, natakuatan dagiti sientista nga “adda pay laeng dagiti antibody a nakasagana a mangpapatay iti dayta a kita ti virus.” Babaen kadagita nga antibody, dagiti managsirarak nakaaramidda iti bakuna a makaagas iti utot a naineksionan iti virus dayta a makapapatay a trangkaso. Nasdaaw dagiti managsirarak iti memoria ti sistema ti imiunidadtayo. Kinuna ti maysa kadakuada: “Ti Apo pinaraburannatayo kadagiti antibody a di mapukaw bayat a sibibiagtayo! Ti dimo pakatayan ti mangpappapigsa kenka.”

Salsaludsod Para iti Dios

“Apay nga agsagabaka uray no nasingpetka?” Dayta ti maysa kadagiti umuna a kayat a damagen dagiti taga-Sweden nga estudiante iti kolehio no adda koma gundawayda nga agimtuod iti Dios, kuna ti Dagen a diario iti dayta a pagilian. Sigun iti surbey, ti dadduma pay a gagangay a saludsod ket: “Ania ti panggep ti biag?” ken “Ania ti mapasamak kalpasan ti ipapatay?” Ti Sweden ket pagaammo kas saan a relihioso a pagilian. Ngem kinuna ti pannakabagi ti nagsurbey nga organisasion dagiti Kristiano nga estudiante nga “adda pay laeng dagiti mangisalsaludsod kadagita. . . . Pampanunoten dagiti agtutubo dagiti kasta a kita ti saludsod.”

Pisikal a Depekto—Ad-adda a Paragsakenna ti Agassawa

“Naipadamag a naragragsak ti panagasawa agpadpada dagiti lallaki ken babbai—aniaman ti edadda—kalpasan nga isuda a mismo ket naaddaan iti pisikal a depekto,” kuna dagiti managsirarak. Makapasikor no dimon kabaelan nga aramiden dagiti inaldaw nga aktibidad, ngem mabalin met a mangpasinged dayta kadagiti agassawa. Sigun kadagiti lallakay, ad-adun ti de kalidad a tiempoda para iti assawada. Kinuna ni Karen Roberto a direktor ti Center for Gerontology iti Virginia Tech, U.S.A.: “Ti panangibaklay kadagiti baro wenno nadagdagsen a responsabilidad ken nadumaduma a pamay-an ti panangaywan ti nangipaay kadagiti lallaki iti gundaway a mangsuporta ken mangbusbos iti ad-adu a tiempo kadagiti assawada. Nagbanaganna, ad-adda nga immuneg ti panangapresiarda iti kaingungotda.”