Agserserbin iti Pudno a Dios ti Dati nga Opisial ti SS

Kas Insalaysay ni Gottlieb Bernhardt

Maysaak idi nga opisial ti German SS, ti bunggoy dagiti katan-okan a guardia ni Hitler, iti Wewelsburg Castle. Idi Abril 1945, nakaawatak iti bilin a mangpapatay kadagiti balud a pasig a Saksi ni Jehova iti asideg a kampo konsentrasion. Kinalikaguman ti SS ti naan-anay a panagtulnog iti autoridad. Agproblemaak idi no tungpalek wenno saan. Palubosandak a mangilawlawag.

NAIPASNGAYAK idi 1922 iti bario nga adda iti asideg ti Rhine River iti Germany. Nupay napeklan a Katoliko ti kaaduan iti lugarmi, ti pamiliami ket Pietista, maysa a narelihiosuan a grupo a nabuangay idi maika-17 a siglo. Idi 1933, nangrugi a nagturay ni Hitler iti Germany. Agtawenak idi iti 11. Sumagmamano a tawen kalpasanna, gapu ta nalaingak iti eskuelaan ken iti isport, napiliak nga agadal iti eskuelaan nga adda iti asideg ti Marienburg, nga itan ket Malbork idiay Poland. Ginasut a kilometro ti kaadayo dayta iti balaymi. Sadiay a natennebak iti ideolohia ti National Socialist, wenno Nazi. Naisuro kadagiti estudiante ti bambanag a kas iti dayaw, kinapinget, kinasungdo, kinatulnog, pannakarikna iti obligasion, ken panangipannakkel iti kina-Aleman.

Gubat Sangalubongan II ken ti SS

Idi nangrugi ti Gubat Sangalubongan II idi 1939, nagpasalistaak iti Leibstandarte SS Adolf Hitler, bunggoy dagiti katan-okan a soldado nga idadauluan a mismo ni Hitler. Aggapu iti bunggoymi dagiti agbalin a personal a guardia dagiti opisial ti gobierno ken maus-usar dayta kadagiti naisangsangayan nga operasion militar. Naimatangak ti rinnupak idiay Belgium, Francia, Netherlands, Romania, Bulgaria, ken Grecia. Bayat nga addaak idiay Bulgaria, tinabunuak ti misa nga indauluan ti padi dagiti soldado. Pinampanunotko no kasta met laeng ti ar-aramiden dagiti kabusormi. Insaludsodko met iti bagik: ‘Bendisionan ngata ti Dios ti gubat? Adda ngata dasdasiganna?’

Idi agangay, napiliak nga agadal iti Junkerschule, maysa nga eskuelaan a nairanta a pakasanayan dagiti agtutubo a lallaki nga agakemto kadagiti nangatngato a ranggo. Kalpasanna, natudinganak nga agbalin a kameng ti bunggoy a mangguguardia iti hedkuarter ti Reich idiay Berlin. Naminsan, nakitak sadiay ni Hitler a nangbugbugkaw iti nangato ti saadna a politiko iti imatang ti adu a tao. ‘Nagalas metten ti panagug-ugalina!’ kinunak iti un-unegko.

Idiay Berlin, naam-ammok ni Inge nga agtartrabaho met iti hedkuarter. Idi dandanikamin agkallaysa, ti nakaikamengak a bunggoy ket kellaat a nayeroplano a mapan iti beddeng ti Russia—nga awan man la ti maitutop a kawesmi para iti tiempo ti lam-ek! Naklaatkami amin ta nababbaba pay ngem -30°C ti temperatura iti tiempo ti lam-ek idi 1941/1942. Sadiay a naawatko ti maikadua nga Iron Cross kas pammadayaw. Kalpasan a nasugatanak iti nakaro, inyawiddak iti Germany. Nagkallaysakami ken Inge idi 1943.

Ti simmaganad a nakaidestinuak ket idiay Obersalzberg a hedkuarter ni Hitler iti kabambantayan ti Bavaria. Adda met sadiay ni Heinrich Himmler a panguluen ti SS. Inyurnosna a ti personal a masahista ken doktorna a ni Felix Kersten ti mangagas kaniak. Kalpasanna, naammuak nga adda kukua ni Kersten nga asienda a maawagan Hartzwalde iti asideg ti Berlin. Idi dandanin agpatingga ti gubat, kiniddawna ken Himmler a palubosanna dagiti Saksi ni Jehova iti asideg a kampo konsentrasion nga agtrabaho iti asiendana. Immanamong ni Himmler ket nagsayaat ti panangtrato ni Kersten kadagiti Saksi. Ti maysa a Saksi a trabahador ni Kersten idiay Sweden ket kanayon a mangikabil iti Pagwanawanan iti maleta ni Kersten agpaay kadagiti Saksi idiay Germany.a

Naam-ammok Dagiti Saksi ni Jehova

Idi arinunos ti 1944, pinagbalinnak ni Himmler a personal nga ayudante (adjutant) ti maysa a heneral ti SS a komandante ti Wewelsburg Castle, ti 400 a tawenen ti kabayagna a sarikedked iti asideg ti siudad ti Paderborn. Plano idi ni Himmler a pagbalinen ti Wewelsburg a sentro ti kulto ti ideolohia ti SS. Iti asideg ti sarikedked, adda bassit a kampo konsentrasion a napanaganan iti Niederhagen para iti naisangsangayan a grupo dagiti balud—dagiti Saksi ni Jehova, a maawagan met iti Estudiante ti Biblia.

Namin-adu nga immay ti balud nga agnagan iti Ernst Specht tapno agasanna dagiti sugatko. “Naimbag a bigatyo, Sir,” kunana no kua.

“Apay a saan a ‘Heil Hitler’ ti pagkablaawmo?” insaludsodko.

Sitataktika a simmungbat, “Kristianokayo kadin sipud idi ubingkayo?”

“Wen, Pietistaak sipud idi ubingak,” kinunak.

“No kasta,” intuloyna, “ammoyo a ni laeng Jesu-Kristo ti ikarkari ti Biblia a pakaisalakanan (heil). Dayta ti gapuna a diak maibaga ti ‘Heil Hitler!’”

Gapu ta nasdaawak ken nagutugotak iti imbagana, dinamagko, “Apay nga addaka ditoy?”

“Maysaak nga Estudiante ti Biblia,” kinunana.

Natukay ti pusok iti pannakisarsaritak kada Ernst ken ti barbero a padana a Saksi a ni Erich Nikolaizig. Ngem maiparit ti pannakisarita kadagiti balud maipapan iti relihion, isu a binilinnak ti komandantek a diakton ul-uliten dayta. Nupay kasta, pinampanunotko a no kas koma kadagiti Saksi ti kababalin ti amin nga umili iti Germany—a maibilbilang a Kristiano a pagilian nga addaan iti minilion a miembro ti simbaan—awan koma ti gubat. ‘Mapadayawanda koma, saan ket a maidadanes,’ kinunak iti un-unegko.

Iti dayta a tiempo, adda madandanagan a balo a nagtelepono nga agkidkiddaw no mabalin nga ibiahe ti anakna, a nasken unay a maikkat ti appendix-na. Insigida nga imbilinko ti pannakaibiahena ngem linapdan dayta ti komandantek. Ngamin, daydi asawa dayta a babai ket napapatay gapu ta miembro ti grupo a nanggandat a mangpapatay ken Hitler idi Hulio 1944. Natay ti ubing nga awan man la ti naaramidak. Agingga ita, makonkonsiensaak pay laeng gapu iti dayta.

Nupay nasurok pay la idi a 20 ti tawenko, naawatakon ti pudno a kasasaad ti biag—saan a kas iti isursuro ti propaganda dagiti Nazi. Maigiddato iti dayta, dumakdakkel ti panangapresiarko kadagiti Saksi ni Jehova ken kadagiti isursuroda. Gapuna, inaramidko ti kapatgan a desision iti biagko.

Idi Abril 1945, umas-asidegen dagiti Aliado a buyot, ket nagtalawen idiay Wewelsburg ti komandantek. Simmangpet ti maysa a bunggoy a binilin ni Himmler a mangdadael iti sarikedked ken mangpapatay kadagiti balud. Ti komandante iti asideg a kampo konsentrasion intedna kaniak ti listaan dagiti balud a mapapatay—pasig a Saksi. Apay? Ammoda kano ngamin ti ayan dagiti sinamsam ti Third Reich nga agkakapateg a gapuanan ti arte a naidulin iti sumagmamano kadagiti pasdek. Saan a mabalin a maibutaktak dayta a palimed! Ania ngaruden ti aramidek iti bilin a panangpapatay?

Inasitgak ti komandante ti kampo ket kinunak: “Umas-asidegen ti buyot dagiti Americano. Saan ngata a nasaysayaat no aglibaskayon ken dagiti tattaoyo?” Dagus a kasta ti inaramidna! Kalpasanna, inaramidko ti di pulos aramiden ti maysa nga opisial ti SS—sinukirko ti bilin isu a nakalasat dagiti Saksi.

Pribilehiok ti Maawagan a Kabsatda

Kalpasan ti gubat, sinapulmi ken Inge dagiti Saksi ni Jehova ket sipapasnek nga inadalmi ti Biblia. Tinulongannakami ti maysa a babai a Saksi a ni Auguste ken dagiti kapammatianna. Narigat ti biag gapu kadagiti sugat a nalak-amko kabayatan ti gubat ken iti krisis kalpasan dayta. Kaskasdi, indedikarmi ken Jehova ti biagmi nga agassawa ket nagpabautisarkami—siak idi 1948 ken ni Inge idi 1949.

Idi dekada 1950, ti sumagmamano a Saksi nga adda idi idiay Wewelsburg bayat ti gubat ket nagsubli sadiay tapno agkikitada manen. Karaman kadakuada ni Ernst Specht, Erich Nikolaizig ken ti maysa pay a balud a ni Max Hollweg. Pribilehiok ti maawagan a kabsatda ta dagitoy a natutured nga adipen ti Dios inrisgoda ti biagda tapno makasabaandak. Adda met sadiay ni Martha Niemann a sekretaria idi idiay Wewelsburg. Nagustuanna met unay ti kababalin dagiti Saksi isu a nagbalin a dedikado nga adipen ni Jehova.

No lagipek ti napalabas, nakitak ti adu a pammaneknek a “ti intero a lubong adda iti pannakabalin [ni Satanas a Diablo],”—banag a diak idi naawatan kas inosente ken idealistiko nga agtutubo. (1 Juan 5:19) Nakitak met ti nagdakkel a nagdumaan ti panagserbi kadagiti naulpit nga agturay, kas ken Hitler, ken ti panagserbi ken Jehova. Impapilit ni Hitler ti basta panagtulnog, idinto ta kayat ni Jehova nga agserbitayo kenkuana maigapu iti ayat a naibasar iti umiso a pannakaammo maipapan iti personalidadna ken kadagiti panggepna kas naipalgak iti Biblia. (Lucas 10:27; Juan 17:3) Wen, ni Jehova ti pagserbiak bayat a sibibiagak.

[Footnote]

[Ladawan iti panid 19]

Idi nagkallaysakami, Pebrero 1943

[Ladawan iti panid 19]

Ti Wewelsburg Castle ti sentro idi ti ideolohia dagiti SS

[Ladawan iti panid 20]

Dakami ken Inge ita