Kabaelam nga Isardeng!

ITAN ti tiempo tapno “bumilegka ken agtignayka.” (1 Cronicas 28:10) Ania dagiti maudi nga addang a mabalinmo nga aramiden tapno dakdakkel ti posibilidad nga agballigika?

Mangikeddengka iti petsa. Irekomenda ti U.S. Department of Health and Human Services nga apaman a naikeddengmon ti sumardeng, rumbeng a dimon palabsen ti dua a lawas sakbay nga irugim ti din agsigarilio. Iti kasta, agtalinaed a natibker ti determinasionmo. Markaam dayta a petsa iti kalendariom, ibagam iti gagayyemmo, ken dimo baliwan dayta a petsa uray no agbaliw ti kasasaadmo.

Mangaramidka iti kard. Nalabit aglaon dayta kadagiti sumaganad nga impormasion ken dadduma pay a mabalin a mangpatibker iti determinasionmo:

● Dagiti rason a sumardengka

● Numero ti telepono dagiti tattao nga awagam no kumapuy ti determinasionmo

● Dagiti makapabileg a sasao—nalabit karaman dagiti teksto ti Biblia a kas iti Galacia 5:22, 23—a makatulong kenka a mangragpat iti kalatmo

Kanayonmo nga itugot dayta a kard sa mamin-adu a basaem iti agmalem. Uray no naisardengmon ti agsigarilio, itultuloymo a repasuen dayta a kard no makasigsigarilioka.

Liklikam ti aniaman a nainaig iti bisiom. Sakbay ti inkeddengmo a petsa ti panagsardengmo, rugiamon a baliwan dagiti nakairuamam a nainaig iti panagsigarilio. Kas pagarigan, no agsigarilioka apaman a bumangonka kada bigat, itantanmo dayta iti maysa nga oras wenno nasursurok. No agsigsigarilioka bayat ti pannangan wenno kalpasanna, isardengmo dayta. Liklikam dagiti lugar a pagsigarilioan. Ken no siksika, sanayem nga ibaga iti napigsa ti “Saanen, diakon agsigsigarilio.” Dakkel ti maitulong dagita tapno masaganaam ti aldaw ti panagsardengmo. Ipalagipda met kenka a dandanikan makaruk-at iti kawar ni sigarilio.

Agsaganaka. Bayat nga umas-asideg ti petsa ti panagsardengmo, isaganam dagiti usarem a kasukat ti sigarilio: carrot, chewing gum, nues, ken dadduma pay. Ipalagipmo kadagiti gagayyem ken kapamiliam ti petsa ti panagsardengmo ken no kasanodaka a matulongan. Sakbay dayta nga aldaw, ibellengmo dagiti pagarsangan, pagsindi, ken aniaman a pakasulisogam—kas kadagiti sigarilio nga adda iti balaymo, luganmo, bulsam, wenno iti pagtrabahuam. Sigurado a narigrigat ti dumawat iti sigarilio ti gayyemmo wenno gumatang ngem iti mangiruar iti indulinmo! Kanayon met nga ikararagmo ti tulong ti Dios, nangnangruna kalpasan ti maudin a panagsigariliom.—Lucas 11:13.

Adu a tattao ti “nakisinan” iti sinsinan ken naulpit a gayyemda idi—ti sigarilio. Kabaelam met dayta. Nasalsalun-at ken naragragsakkanto ta nawayawayaankan iti panangadipen ti sigarilio.

[Ladawan iti panid 9]

Kanayonmo nga itugot ti inaramidmo a kard sa mamin-adu a basaem iti agmalem