Manipud Kadagiti Agbasbasa
Dagiti Bendision a Napatpateg Ngem iti Kinabaknang (Marso 2009) Dinakamat daytoy nga artikulo ti kinuna ni Kostas: “Saan a kayat ti Dios nga agbalintayo a nabaknang unay ken naluho.” Ti ammok ket saan a kedkedngan ni Jehova no kasano kaadu wenno kabassit ti ikutan dagiti agserserbi kenkuana no la ket ta Isu ti ipangpangrunada. Dakes kadi ti agbiag a naluho bayat a simamatalek nga agserserbi ken Jehova?
J. D., Estados Unidos
Sungbat ti “Agriingkayo!”: Ti Biblia dina kondenaren ti kinabaknang. Kinapudnona, nabaknang ti adu kadagiti nagkauna nga agserserbi iti Dios. (Genesis 25:5; 26:12-16; Job 1:1-3) Nupay kasta, nasayaat no laglagipen dagidiay nabaknang a “ti panangiparammag iti sanikua a pagbiag ti maysa—saan nga agtaud iti Ama, no di ket agtaud iti lubong.” (1 Juan 2:16) Kinuna met ni apostol Pablo: “Ti ayat iti kuarta isu ti ramut dagiti amin a kita ti makadangran a bambanag.” Napaliiwna a gapu iti tarigagay ti dadduma a bumaknang nga uray la nabaybay-andan ti panagdaydayawda iti Dios, ‘nayaw-awanda iti pammati ket sinalputda ti intero a bagbagida iti adu nga ut-ot.’ (1 Timoteo 6:10) Saan met ketdi nga ibaga ti Biblia a rumbeng a makonsiensia dagiti nabaknang gapu ta ad-adu ti ik-ikutanda ngem iti sabsabali. Maparparegta dagiti Kristiano nga “agbalinda a naparabur, sisasagana a mangiranud,” kasano man kabassit wenno kaadu ti sanikuada.—1 Timoteo 6:18.
Naulimek Ngem Mangngeg (Oktubre 2008) Talaga a naparegtaak iti daytoy nga artikulo maipapan ken Hillary nga addaan iti Rett syndrome. Ti lima ti tawenna nga apokok ket saan a makakita, makangngeg, makapagna, makasao, wenno makatugaw. Mangnamnamaak itan a no kantaak, ibasaak, kasaritak, ken aprosak wenno masahiek isuna, adda mapaspasamak iti utekna. Nagsangitak idi nabasak ti kinuna ti ina ni Hillary: “Uray diak mangngeg ti ibagbagana, mangmangngeg dayta ni Jehova.” Gapuna, naamirisko a nupay di makasao ti apokok, ammo ni Jehova ti linaon ti pusona.
M. A., Japan
Agtawenen iti 43 ti balasangko ngem daytoy pay la ti artikulo a nangipaawat kaniak iti pudno a kasasaadna ken kadagiti makagapu iti sakitna. Makipagriknaak ken Hillary, iti nanangna, ken iti manangna. Nupay adayo ti pagnanaedanda, maawatak ti kasasaadda ken apresiarek ti mapagwadan a pammati, ayat, ken panagibturda.
T. Y., Ghana
Aborsion—Saan a Pudno a Solusion (Hunio 2009) Pagyamanan ti agsasaruno nga artikuloyo maipapan iti aborsion. Nagparegregak idi agarup 25 anyosak, ket napalalot’ babawik iti dayta nga inaramidko. Awan koman ti namnamak no diak naammuan ti kinapudno. Agyamanak unay ta naaddaanak iti namnama ken naammuak ti kinamanangpakawan ni Jehova.
Impailimedna ti naganna, Estados Unidos
Agimtuod Dagiti Agtutubo . . . Kasanok a Mailiwliwag ti Ipapatay ni Tatang Wenno ni Nanangko? (Agosto 2009) Agtawenak laeng iti 22. Bigla ken di ninamnama ti ipapatay ni tatangko isu a napalalot’ leddaangko. Kas dinakamat ti artikulo, awanto isunan a makipagrag-o kaniak kadagiti napateg a kanito iti biagko. Tallo a tawenen ti napalabas ngem kaskasdi a marigatanak a mangiliwliwag iti marikriknak a saem. Nupay kasta, liniwliwanak unay ti artikulo. Dagiti singasing no kasano nga iliwliwag ti ladingit ket narigat nga iyaplikar ngem epektibo gayam. Pagyamanan ti nagsayaat nga ar-aramidenyo.
N. P., Francia