Manipud Managbasatayo

Aborsion Ti seryeyo nga “Aborsion​—Ti Pannakabukel ken ti Panangkettel iti Biag” (Mayo 22, 1993) pinagsangitnak ken dinudogna ti pusok. No nabasak la koma daytoy nga impormasion walo a tawen a nasaksakbay, diak koma nagpairegreg. Ngangngani pito a tawen sakbay nga impudnok daytoy iti asawak, nga isu koma ti amana. Manginanamaak a dagitoy nga artikulo ket basaento ti asinoman nga agpangpanggep nga agpairegreg ken mabigbigna a ti biag ket napateg ken maysa a sagut a naggapu iti Dios.

G. D., Estados Unidos

Agtawenak iti 16, ket naisuro kadakami idiay eskuelaan maipapan ti aborsion. Ngem kaskasdi a diak naamiris ti saem iti biang ti ubing. Bayat a binasak daytoy a magasin, marurodak unay, ken diak namedmedan ti nagsangit. Apay a di unay ipatpateg dagiti tattao ti biag a siaasi nga ipapaay ni Jehova?

N. K., Japan

Intugotko daytoy a magasin idiay eskuelaanmi, ket nasdaawak ta nagustuan dayta dagiti estudiante! Napikapik ti puso dagiti kaklasek nga uray la nakasangit ti maysa kadakuada. Ngamin, sumagmamano laeng nga aldaw kasakbayanna, isut’ nagpairegreg.

L. S., Estados Unidos

Dagiti Helicopter Naallukoyak unay iti artikuloyo a “Lugan iti Tangatang” (Marso 8, 1993). Kas maysa nga inspektor iti natalged a panagpatayab ti Federal Aviation Administration ken instruktor iti panagpiloto/panagpatayab, maawatak a naannad unay ti umiso a pannakaputar ti artikulo. Kangrunaan nga apresiarek ti simple a panangilawlawagna.

J. R., Estados Unidos

Panagpakuttong Binasak ti artikulo a “No Kimmuttongak, Mabalinan ti Asinoman!” (Enero 22, 1993), ket nupay maragsakanak iti panangikagumaan ti mannurat nga agpakuttong, madanaganak di la ket ta ti artikulo paregtaenna ti adu a mangpanunot a dagiti nalukmeg basta agteppel ken agdietada laeng. Saan laeng a ti “1,200 inggat’ 1,500 a calorie iti kada aldaw” ti solusion ti parikutko. Maipapilit kaniak ti pannangan [kas] maysa nga agas. Itay la nabiit a naawatak a kas maysa a nataengan nga anak ti maysa nga alkoholiko, ikagkagumaak a penken ti wawko iti ayat ken pannakaipateg. Gapuna ti nainget a panagdieta ket saan a simple a solusion iti daytoy a komplikado nga isyu.

R. S., Estados Unidos

Apresiarenmi dagitoy a napudno a komento. Nupay kasta, ti artikulo ket naiturong a nangnangruna kadagiti saan a nasayaat ti pannanganda, saan a dagidiay makidangdangadang iti nakaro a saksakit iti pannangan. Mabalin a kasapulanda ti propesional a tulong tapno maparmekda dagiti pakarigatanda. Dagiti makatulong nga impormasion maipapan iti saksakit iti pannangan ket naipablaak iti ruarmi a Pebrero 22, 1992.​—ED.

Ti artikulo ket kas maysa a repaso iti saan a nasayaat a pannanganko. Makatulong unay dagiti singasing, ket iyap-aplikarko idan. Pagyamanan unay iti daytoy nga artikulo!

S. P., Brazil

Ti artikulo insuronak no kasano a pagbalinek a balanse ti pannanganko iti makapasalun-at a pamay-an. Daytoy a talaga ti kasapulak. Pagyamanan unay!

S. G., Estados Unidos

Dagiti Kabayo Tinignaynak ti artikulo a “Pagay-ayatko Dagiti Kabayo.” (Mayo 22, 1993) Sakbay a nagbalinak a Kristiano, inusarko ti ngangngani amin a nawaya a tiempok iti panagsakay ken panagtaraken kadagiti kabayo. Kalpasan ti panagadalko iti Biblia, binaybay-akon ti nangina a pagpalpaliwaak ken inrugik ti amin-tiempo a panangasaba. Uray kasta, pagay-ayatko pay laeng dagiti kabayo. Ti artikulo tinulongannak a mangbigbig a nasaranget met dagiti dadduma dagiti umasping a rikrikna.

G. V., Alemania