‘Nakaskasdaaw ti Pannakaaramidmo!’
NO PANUNOTEM dagiti naisangsangayan nga abilidad ti nadumaduma nga animal, umapalka kadi no dadduma? Kas pagarigan, kayatmo kadi ti tumayab a kas iti albatross, aglangoy a kas iti dolphin, kumita a kas iti agila, wenno tumaray a kas iti cheetah?
Talaga nga adda dagiti nakaskasdaaw nga abilidad dagiti animal. Ngem uray datayo! Kinapudnona, nadeskribir ti bagi ti tao kas perpekto a makina. Siempre, ad-adu nga amang ti maaramidantayo ngem iti makina. Kabaelantayo ti agpartuat, agarapaap, agipamuspusan, ken agusioso isu a makaimbentotayo kadagiti makina a makatulong iti panagaramid iti dandani amin a mapanunottayo. Makatayabtayo, a naparpartak pay ngem iti uni; makapagdaliasattayo iti rabaw wenno uneg dagiti nalawa a taaw; makitatayo ti law-ang agingga iti kaadayo nga agarup 14 bilion a light-year; masukimattayo ti sibibiag a selula; ken makaaramidtayo kadagiti agas, terapi, ken teknolohia a makatulong kadatayo a mangdayagnos ken mangagas kadagiti sakit.
Uray no awan ti teknolohia, nakaskasdaaw latta dagiti maaramidan ti nasalun-at ken eksperto a tattao. Kas pagarigan, iti Olympic Games, agamanga dagiti agbuybuya gapu iti nakaskasdaaw a kinasiglat, kinaartistiko, kinamanagpartuat, ken kinangayed dagiti gymnast, high diver, ice-skater, skier, ken dadduma pay.
Ap-apresiarem kadi dagiti espesial nga abilidadmo kas maysa a tao? Uray no saanka nga atleta iti Olympics, adu ti abilidadmo a rumbeng a pagyamanam. Babaen ti kanta, inyebkas ti maysa a mannurat iti Biblia idi ugma ti panangapresiarna iti Dios: “Idayawkanto agsipud ta iti nakaam-amak a pamay-an nakaskasdaaw ti pannakaaramidko.”a (Salmo 139:14) Panunotem dagita bayat a basaem dagiti sumaganad nga artikulo. Ad-adda a detalyado ti panangusigda iti sumagmamano kadagiti nakaskasdaaw a paset ti bagim, agraman iti dadduma pay a napatpateg nga amang a galad a talaga a mangiduma kadatayo iti sabsabali.
[Footnote]
a Kadagiti interesado a mangammo no ania ti pudno—ti panamarsua wenno ebolusion—mabalinyo a basaen dagiti broshur a Naparsua Kadi ti Biag? ken The Origin of Life—Five Questions Worth Asking. Mabalin a magun-odan dagita kadagiti Saksi ni Jehova iti lugaryo wenno kadagiti mangipabpablaak iti daytoy a magasin.
[Kahon iti panid 3]
NADISENIO TAPNO MAKAINUT ITI PIGSA
Yantangay tumakder ken magnatayo babaen iti dua a sakatayo, nainut ti bagitayo iti pigsa. Bassit la ngamin a puersa ti kasapulan dagiti masel a mangsuporta iti nakatakder a posision ti bagitayo. Kinapudnona, “7% laeng nga ad-adu a pigsa ti kasapulantayo no nakatakdertayo ngem no nakaiddatayo,” kuna ti managsirarak iti neuroscience a ni John R. Skoyles. Kinunana pay nga agarup 70% nga ad-adu a pigsa ti kasapulan ti maysa nga aso no nakatakder (iti uppat a sakana) ngem no nakaidda.