Nadisenio Kadi?
Ti Sistema ti Nabigasion ti Pawikan
● Sigun kadagiti managsirarak, ti panagdaliasat ti pawikan manipud iti lugar a pangpangananna agingga iti pagitloganna nga aplaya ket “maysa kadagiti naisangsangayan unay nga aramid iti pagarian dagiti animal.” Adun a dekada nga ad-adalenda daytoy a reptilia.
Usigem: Kada dua agingga iti uppat a tawen, sumanglad ti kabaian a pawikan tapno agitlog—agarup 100 iti maysa nga abut—sana gaburan iti darat. Apaman a mapessaan, agpataawen dagiti babassit pay a pawikan. Sadiay a rugianda ti nakaskasdaaw a panagdaliasat, a no dagupen, mabalin nga agarup 12,900 a kilometro ti kaadayona. Kalpasan ti adu a tawen, dagiti adulton a kabaian a pawikan ket agsubli tapno agitlog—iti isu met la nga aplaya a nakapessaanda!
Kasano nga ammo dagiti pawikan ti pagdaliasatanda? “Kasla nakatawidda iti maysa a kita ti magnetiko a mapa,” kuna ti biologo a ni Kenneth Lohmann iti University of North Carolina iti United States, kas impadamag ti National Geographic News. Natakuatan dagiti managsirarak a mabalin a madlaw ti pawikan ti anggulo ken kapigsa ti magnetiko a puersa ti daga isu nga ammona ti lokasionna. Gapu iti daytoy a makapaamanga nga abilidad dagiti babassit pay ken awan gawgawayna a kappessa, makapagdaliasatda iti 12,900 a kilometro iti Atlantico “nga is-isuda ken awan ti sursurotenda a sabali a pawikan,” kuna ni Lohmann.
Ania ti makunam? Naiparna la kadi ti abilidad dagiti pawikan nga agdaliasat, wenno nadisenio dayta?
[Kahon iti panid 25]
MAKAPAINTERES NGA IMPORMASION
● No nakaitlogen ti pawikan, gaburanna ti abut sa panawannan.
● Tapno makaruar ti kappessa iti itlog, usarenna ti espesial a ngipen a maawagan iti caruncle, a mapusinto met laeng.
● Iti taaw ti pangbusbosan dagiti pawikan iti 90% ti biagda.
[Picture Credit Line iti panid 25]
© Masa Ushioda/WaterF/age fotostock