No Apay a Mangranggas ti Dadduma
NI Joseba a taga-Espania ket napagsaludsodan no apay a nakimiembro iti militante a grupo. “Saanmi ngaminen a maibturan idi ti panangirurumen ken kaawan hustisia,” kinunana. “Iti pagnanaedak a dakkel a siudad ti Bilbao, sumrek lattan dagiti polis sada agkabil ken agaresto.”
Intuloy ni Joseba: “Maysa nga agsapa, naarestoak gapu iti imbagak maipapan kadagita a pamay-an dagiti polis. Makapungtotak unay! Kayatko a solbaren ti kasasaad, uray iti naranggasen a pamay-an no isu ti kasapulan.”
Gapu iti Pannakairurumen ken Panagibales
Nupay ti kinaranggas ket di ikalintegan ti Biblia, bigbigenna a ‘ti panangirurumen mapagtignayna a simamauyong ti masirib,’ kayatna a sawen, agtignay a simamaag. (Eclesiastes 7:7) Adu ti maluksaw unay no mamaltratoda gapu iti puli, relihion, wenno nasionalidadda.
Kas pagarigan, kinuna ni Hafeni, a nadakamat iti immuna nga artikulo: “Inagawda ti dagami. Lumabanto pay dagiti animal no adda agbasakbasak iti teritoriada, natural laeng a lumabankami met para iti daga ken kalinteganmi.” Iti mensahe ti maysa a suicide bomber a naipablaak kalpasan a natay, kinunana: “Agingga a diyo isardeng ti mangbomba, mangpapatay babaen iti gas, mangibalud ken mangparigat kadagiti kailiak, dimi isardeng daytoy a laban.”
Gapu iti Relihion
Nupay di nainaig iti relihion ti kaaduan a manggutgutugot kadagiti militante, masansan a mangranggasda gapu kadagiti narelihiosuan a rason. Adda lider ti maysa a pagilian a nakaawat iti daytoy a mensahe manipud iti pannakangiwat dagiti militante: “Saankami nga agmauyong wenno agbibisin iti pannakabalin. Agserserbikami iti Dios isu a determinadokami iti ilablabanmi.”
Mainaig iti papel ti relihion, insurat da Daniel Benjamin ken Steven Simon iti libroda a The Age of Sacred Terror: “Iti lubong nga agbalbalin a mas relihioso, umad-adu a miembro dagiti kangrunaan a relihion ken baro a kulto ti mamati a ti kinaranggas ket masapul a paset ti panagserbida iti Dios.” Kalpasan nga inusig ti sabali pay a managsirarak ti sumagmamano nga inawaganna iti “nakaal-alingget nga aramid ti terorismo iti intero a lubong,” kinunana: “Mamati ti amin a terorista nga an-anamongan ken imbilin pay ketdi ti Dios dagiti ar-aramidenda.”
Ngem adu a relihioso a militante ti addaan kadagiti di nainkalintegan a panangmatmat a di maitunos iti gagangay a pannursuro ken prinsipio ti relihion a nakaikamenganda.
Gapu iti Nayukuok a Gura
Ni Joseba, a nadakamat iti rugi, ket naglak-am iti nakaro a pannakaabuso idi naaresto. Kinunana: “Gapu ta nakaul-ulpitda, nakombinsirak a nainkalintegan laeng ti gura a marikriknak. No kasapulan a matayak tapno mapasamak dagiti panagbalbaliw, saan a sayang dayta.”
Dagiti maisursuro iti grupo ti masansan a mangrubrob iti rikna dagiti miembroda a mangranggas. Kinuna ni Hafeni: “Bayat ti kaaddami kadagiti refugee camp, adda dagiti taripnong a nangimula iti panunotmi a kanayon nga ikagkagumaan dagiti puraw a dominaran dagiti nangisit.” Ania ti resultana?
“Kimmaro ti gurak kadagiti puraw,” innayonna. “Diak agtalek kadakuada amin. Idi diak makaibturen, napanunotko a masapul nga adda aramiden ti henerasionmi.”
Ngem iti laksid ti nayukuok iti pusoda a gura ken di panagtalek, inwaksi da Joseba ken Hafeni dagita. Ania ti namagbalbaliw iti isip ken pusoda? Dayta ti ilawlawag ti sumaganad nga artikulo.
[Blurb iti panid 6]
“Gapu ta nakaul-ulpitda, nakombinsirak a nainkalintegan laeng ti gura a marikriknak. No kasapulan a matayak tapno mapasamak dagiti panagbalbaliw, saan a sayang dayta.”—Joseba