Tradisional a Panangpinta iti Kayo iti Russia
● Magustuan ti kaaduan a turista idiay Russia ti gumatang kadagiti aramid-ima a produkto a kas kadagiti munieka a matryoshka. Idi un-unana, kaaduan kadagita ket kayo nga inaramid dagiti nalaing nga artesano iti bario. Ti maysa a tradisional a panangpinta iti kayo ket maawagan iti khokhloma.
Iti ginasut a tawtawen, malukong a siaannad a nakitikitan ken napintaan ti pangpanganan dagiti Ruso. Nagusarda met kadagiti kayo a kutsara, tasa, ken dadduma pay a pagkargaan. Kadawyanna a mulmula wenno animal ti naidisenio kadagita. Adda dagiti bario a dandani amin nga umili ket agar-aramid iti nadumaduma a kayo nga alikamen.
Bayat ti napaut a tiempo ti lam-ek, makumikom dagiti bumario nga agaramid kadagita ta awan unay ti matrabahoda iti talon. Iti dadduma nga ili ken bario, napigsa a panguartaan ti panagaramid kadagita a produkto, nasurok a 200 a tawenen ti napalabas. Kas pagarigan, adda idi tiempo a ti amin nga umili ti Semënov ket simmardeng a nagtalon ta makatawen a nagaramidda iti dandani dua a milion a kayo a malukong, bandeha, tasa, ken kutsara.
Dagiti bumario iti asideg ti ili a Nizhniy Novgorod ket nakaimbento iti pamay-an tapno mapalagda ken mapasileng ti kalupkop dagiti napintaan a produktoda. Napataud dagiti naandur iti pudot a pintura ken barnis. Dagiti produkto a di pay pulido ket nayurno. Gapu iti nakabarbara a temperatura, agbalin a nasileng a maris balitok ti maris pirak a rabaw dagiti produkto. Maus-usar pay la ti kasta a proseso kadagiti paktoria ti khokhloma idiay Nizhniy Novgorod.
Ti sabsabong ken mulmula kadagiti kabakiran ken tay-ak ti Russia, kasta met dagiti tumatayab ken ikan, ket karaman kadagiti disenio a khokhloma. Masansan a maipinta dagiti agkawkawikaw a ruot ken bulbulong iti nagbabaetan ti nadumaduma a prutas. Kadawyan a nalabaga, nangisit, duyaw, ken berde dagiti kolor a mausar. Ita, dagiti lamisaan a panganan iti adu a lugar iti intero a lubong ket naarkosan kadagiti agkakapintas a maris ti away ti Russia babaen kadagiti produkto a napintaan iti khokhloma.