3. Isaganam ken Idulinmo a Naimbag
MAYSA a di naannad a paraluto iti nagkauna nga Israel ti nagpuros lattan kadagiti balang a tabungaw a dina “pagaammo” sana inlaok iti linutona a gisado. Nagbuteng dagiti nangan di la ket ta adda sabidong ti taraon isu nga impukkawda: “Adda patay iti banga.”—2 Ar-ari 4:38-41.
Kas ipakita daytoy a salaysay, rumbeng nga agannadtayo iti taraon a di naisagana a naimbag, ta mabalin a makadangran wenno makapapatay pay ketdi. Tapno ngarud dika agsakit gapu iti kontaminado a taraon, sursuruem ti naannad a panangisagana ken panangidulin iti taraon. Usigem dagitoy uppat a singasing:
● Dimo basta paluknengen ti nagyelo a karne iti kalkalainganna a temperatura.
“Nupay natangken pay laeng ti tengnga [ti karne] bayat a marunrunaw ti yelona,” kuna ti U.S. Department of Agriculture, “mabalin a delikado ti makinruar a pasetna. Alisto nga umadu ti bakteria iti temperatura nga adda iti nagbaetan ti 4°C ken 60°C.” Paluknengem ngarud ti nagyelo a karne iti uneg ti refrigerator, microwave, wenno isupotmo iti awan abutna a plastik sa iyupermo iti nalamiis a danum.
● Lutuem a naimbag.
Sigun iti World Health Organization, “ti umiso a panagluto ti mangpapatay iti kaaduan iti amin a napeggad a nagbabassit nga organismo.” No aglutoka, nangruna iti sopas ken gisado, siguraduem a di kumurang a 70°C ti kapudotna.a Yantangay narigat nga ammuen ti makin-uneg a temperatura ti dadduma a putahe, adu a kosinero ti agus-usar iti termometro para iti karne.
● Idasarmo a dagus.
Tapno saan a mabangles ti naluto a taraon, saan koma a mabaybay-an a bumaaw iti nabayag. Rumbeng ngarud a maidasar a dagus uray kaad-adaw pay laeng. Pagtalinaedem a nalamiis ti taraon a nairanta a makan a nalamiis ken napudot ti taraon a nairanta a makan a napudot. Mapagtalinaedmo ti kapudot ti karne iti oven a nai-set iti agarup 93°C.
● Siguraduem nga umiso ti pannakaidulin ti tedda a taraon.
Ni Anita a maysa nga ina idiay Poland idasarna a dagus ti kaaduan a linutona a putahe. Ngem no adda matda, kunana, “kalpasan a naisaganak, bingayek iti saggabassit sa i-freezer-ko tapno nalaka a ma-defrost.” No idulinmo dagiti tedda iti refrigerator, kanem dagita iti las-ud ti 3 wenno 4 nga aldaw.
No agrestawranka, masapul nga agtalekka iti mangisagana iti taraonmo. Kasano ngarud a maprotektaram ti pamiliam no mangankayo iti ruar?
[Footnote]
a Ti dadduma a taraon a kas iti karne ken itlog ti manok ket nasken a maluto iti nangatngato a temperatura.
[Kahon iti panid 6]
SANAYEM TI ANNAKMO: “No agluto ti annakko, ipalagipko kadakuada a basaen ken surotenda dagiti instruksion iti pakete ti taraon.” —Yuk Ling, Hong Kong