4. Agpaliiwka No Manganka iti Ruar
Nasalun-at ken nabaneg ti 38 anyos a ni Jeff. Inrestawranna ti pamiliana iti asideg ti Pittsburgh, Pennsylvania, U.S.A. Kalpasan ti makabulan, natay gapu iti nakaro a panagpalia ti dalemna. Ti makagapu? Kontaminado iti hepatitis A ti lasona a rekado ti taraonna.
MAPAN kadagiti restawran ti dandani 50% iti amin a magasto para iti taraon iti maysa a pagilian iti Laud. Ngem iti dayta met la a pagilian, dagiti taraon iti restawran ti makagapu iti agarup 50% kadagiti nagwaras a sakit a naala iti kontaminado a taraon.
No ngamin manganka iti restawran, adda sabali a gumatang kadagiti ramen, agdalus iti kosina, ken agluto iti taraon. Ngem sika ti agdesision no panganam, ania ti kanem, ken no iyawidmo wenno saan ti teddam a taraon.
● Paliiwem ti aglawlaw.
“No damomi ti mapan iti maysa a restawran, kitakitaek no nadalus ken naurnos dagiti lamisaan ken mantelna, dagiti kubiertos, ken dagiti serbidor. No saan, agbirokkami iti sabali,” kuna ni Diane a taga-Brazil. Iti dadduma a pagilian, regular nga aginspeksion dagiti opisial ti salun-at sada graduan dagiti restawran sigun iti kinadalus dagita. Ipakaammoda dagiti resulta tapno maammuan ti publiko.
● Agannadka no agyawidka iti taraon.
Ibalakad ti Food and Drug Administration ti U.S.: “No dika pay a makaawid iti las-ud ti dua nga oras [wenno nasaksakbay no ti temperatura ket napudpudot ngem iti 32°C] kalpasan a nanganka, dimon iyawid dagiti tedda a taraon.” No adda teddam, agdiretsokan nga agawid kalpasan ti pannanganmo ken ikabilmo dagita iti refrigerator.
No surotem ti uppat a pamay-an a nadakamat iti daytoy nga agsasaruno nga artikulo, mapagbalinmo a nataltalged ti taraonmo.
[Kahon/Ladawan iti panid 7]
SANAYEM TI ANNAKMO: “Insuromi kadagiti annakmi a liklikanda ti taraon a kasla delikado a kanen.”—Noemi, Pilipinas