Napalalo a Panaggusto iti Kinaranggas

MAGUSGUSTUAN ita ti lubong ti kinaranggas. Kinapudnona, kanayon a maitamtampok dayta kadagiti paglinglingayan. Ngem “iti kallabes a tawtawen,” kuna ti Media Awareness Network, “adda nagbalbaliw maipapan iti kinaranggas iti media. Ti maysa ket ad-adun dayta.” Nagbalin payen a “lallalo a mas detalyado, lallalo a nagargartem iti sekso, ken lallalo a nasadsadistiko.” Usigem ti sumaganad.

Musika: Kuna ti nadakamat a reperensia nga “iti industria ti musika, nagbalinen a gagangay” dagiti kanta a napnuan iti naranggas unay a liriko. Babaen iti naalas a sasao, itandudo ti sumagmamano a kanta ti panangpapatay ken panangrames, uray iti assawa ken inna.

Video Game: “Makapadanag dagiti video game ta napnuanda iti pinnatayan,” kuna ti maysa a magasin idiay Britania a para kadagiti mahilig iti video game. Innayonna: “Uray kaskasano, no pagay-ayat ti maysa dagiti video game, pagay-ayatna la ketdi ti kinaranggas.” Kas pagarigan, iti maysa a nalatak a game, pagbalinenna dagiti agay-ay-ayam a kasla aktual a mangmalmalo iti babbai babaen kadagiti baseball bat agingga a matay. Patien ti dadduma nga autoridad a gapu ta dagiti agay-ayam ti mismo a mangkontrol kadagiti video game, napigpigsa ti impluensia dagita kadagiti ubbing ngem iti TV.

Pelikula: Ipakita dagiti panagadal nga immadu unay ti kinaranggas, seks, ken naalas a panagsasao kadagiti pelikula. Saan metten a mapagpannurayan dagiti movie rating. Kasta met a saan laeng a dagiti “kontrabida” ti naranggas. Sigun iti maysa a panagadal, dagiti “bida” ti nangaramid iti dandani 50% a kinaranggas a mabuya iti TV, pelikula, ken music video.

Damdamag: “No nadara, ad-adu ti agbuya.” Dayta ti prinsipio a pampandagan ti adu a producer ti damdamag iti TV. Dakkel a negosio ti panagipadamag, ken ammo dagiti agipadpadamag a ti kinaranggas ket magusgustuan dagiti agbuybuya. No adu ti agbuya, maatrakar dagiti advertiser nga aggasto para kadagiti programa iti TV iti adu a pagilian.

Web Site: Iti Internet, makita dagiti aktual ken pinartuat a ladawan ti panangparigat, panangputed wenno panangdadael iti paset ti bagi, ken panangpapatay. Adu nga ubbing ti mangluklukat kadagita a site.

Maimpluensiaannaka Kadi ti Kinaranggas iti Media?

Ti kadi kinaranggas iti TV, pelikula, libro, musika, ken dadduma pay a kita ti paglinglingayan ket makaimpluensia kadagiti tattao? Dagiti aggangganar gapu iti kinaranggas iti media ket masansan nga irasonda a di makadangran dagita. Ngem panunotem daytoy: Tapno maimpluensiaan ti isip ti tattao, agbayad dagiti negosiante iti binilion a doliar para kadagiti patalastas a nalabit 30 segundo laeng ti kapaut ti tunggal maysa kadagita. Nainkalintegan kadi ngarud nga ipapan a ti 90 minuto a pelikula a mabalin nga imoral ken naranggas dagiti bidana ket bassit laeng wenno awan pay ketdi ti epektona, nangruna iti naganus a panunot dagiti ubbing?

Adayo nga ad-adu ti ammo ti Namarsua kadatayo a ni Jehova a Dios maipapan iti katataotayo. Ania ti imbagana kadatayo maipapan iti pannakikadua kadagiti naranggas agraman kadagidiay, no ar-arigen, ket manglinglingay kadatayo babaen iti popular a media? Panunotem dagitoy a teksto iti Biblia:

● “Ni met laeng Jehova sukimatenna daydiay nalinteg kasta met daydiay nadangkes, ket ti asinoman a mangay-ayat iti kinaranggas pudno unay a guraen ti kararuana.”​—Salmo 11:5.

● “Dika makikadua iti asinoman a managunget; ket dika sumrek a kadua ti tao nga addaan kadagiti irarasuk ti pungtot, tapno saanmo a maammuan unay dagiti danana ket pudno unay a makaalaka iti silo maipaay iti kararuam.”​—Proverbio 22:24, 25.

Siempre, ditay maliklikan ti maisarang iti amin a dakes nga impluensia. Ngem mabalintay a pilien ti paglinglingayantayo ken ti tattao a pakikaduaantayo. Isu nga isaludsodmo iti bagim: ‘Ania a kita ti tao ti kayatko a pagbalinan?’ Makikaduaka ngarud kadagidiay addaan kadagiti prinsipio ken kalat a kas met laeng kadagiti kayatmo a maadda kenka.​—Proverbio 13:20.

Malaksid kadagiti pilientayo a kakadua ken paglinglingayan, adda pay dadduma a mabalin a makaimpluensia iti panangmatmattayo iti kinaranggas? Ania dagita?

[Ladawan iti panid 5]

Ti paglinglingayan a pilientayo mabalin nga impluensiaanna ti panangmatmattayo iti kinaranggas