DAMDAMAG ITI LUBONG
Lubong
Ti panangranggas kadagiti babbai ket nagbalinen a “nakasaksaknap a sangalubongan a problema iti salun-at,” sigun iti World Health Organization (WHO). “Agarup 35% iti amin a babbai ti ranggasan ti asawa wenno kabkabbalayda, wenno ti dida kaan-ano,” kuna ti WHO. “Ti gagangay unay a kita ket ti panangranggas ti asawa wenno kabkabbalay . . . , a mangap-apektar iti 30% kadagiti babbai iti intero a lubong.”
Britain
Idi nasurbey ti 64,303 a tattao, 79% ti nagkuna a ti “relihion ti makagapu iti adu a rigat ken panagbibinnusor iti lubong ita.” Natakuatan met ti 2011 a sensus ti England ken Wales a 59% laengen iti populasion ti mangibagbaga a Kristianoda, nababbaba ngem iti dati a 72% idi 2001. Iti dayta met la a tiempo, ngimmato iti 15% agingga iti 25% ti bilang dagiti agkunkuna nga awan relihionna.
China
Sigun kadagiti report ti media, ti nabiit pay a nabaliwan a linteg obligarenna dagiti adulton nga annak a bisitaen ken asikasuenda dagiti “emosional a kasapulan” ti lumaklakay ken bumakbaketen a nagannakda. “Awan ti dusa nga ipataw” dayta a linteg kadagiti annak a saan nga agtungpal.
Europe
Pekpekien itan dagiti sindikato uray dagiti gagangay a tagilako a kas kadagiti kosmetiko, sabon a paglaba, ken uray taraon. “Posible a mapeke payen uray ti nalaka ti presiona nga ingrediente,” kuna ti presidente ti maysa a kompania a mamalbalakad maipapan iti kinatalged dagiti taraon. Tinantiar ti maysa nga eksperto a 10% kadagiti magatang a taraon kadagiti narang-ay a pagilian ket nalaokan iti peke nga ingrediente.