Kasano nga Apektaran ti Teknolohia ti Panagpampanunotmo?

Agtultuloy nga agsursuro dagiti tattao—para man iti eskuelaan, trabaho, wenno dadduma pay a rason. Makatulong ti teknolohia. Nakalaklaka itan ti makaala iti nakaad-adu nga impormasion, uray addaka laeng iti balayyo wenno agtugtugawka laeng.

Ngem nakita dagiti sobra ti panagusarda iti teknolohia a . . .

marigatanda nga agpokus no agbasbasada.
nalakada a masinga iti ar-aramidenda.
nalakada a maboring no agmaymaysada.

TI MASAPUL A MAAMMUAM

Agtutubo nga aggigiddan ti ar-aramidenna. Agteteks, ka-video call-na ti gayyemna, ken agus-usar iti kompiuter ken textbook nga agadal.

PANAGBASA

Palabsan lattan ti dadduma ti artikulo a basbasaenda imbes a basaenda a naimbag tapno maalada ti kangrunaan a punto.

Nasayaat met dayta no agdardaraska a mangbirok iti sungbat ti maysa a saludsod. Ngem saan a nasayaat no kayatmo a maawatan a naimbag ti maysa a topiko.

PANUNOTEM: Maanusam kadi ti agbasa iti atiddog nga artikulo? Kasano a makatulong dayta tapno ad-adu ti masursurom?—PROVERBIO 18:15.

PANAGPOKUS

Ipagarup ti dadduma a kabaelanda a paggiddanen ti dua a trabaho babaen ti teknolohia, kas iti panag-text kadagiti gagayyem bayat nga agad-adalda. Ngem no nabingay ti atensionda, mabalin a saan a nasayaat ti panangaramidda kadagita nangruna no agpada nga agkasapulan dagita iti konsentrasion.

Kasapulan ti disiplina iti bagi tapno makapagpokuska, ngem sulit dayta. Kuna ti tin-edyer a ni Grace: “Basbassit ti kamalim ken saanka unay a ma-stress. Nasursurok a nasaysayaat no agpokusak iti maysa a banag imbes a paggigiddanek ti trabahok.”

PANUNOTEM: Marigatanka kadi a mangtarus ken manglagip iti inadalmo no paggigiddanem dagiti ar-aramidem?—PROVERBIO 17:24.

PANAGMAYMAYSA

Alusiisen ti dadduma no agmaymaysada iti naulimek nga aglawlaw isu nga agusarda iti teknolohia tapno saanda a maboring. “Maboringak iti uneg ti 15 a minuto no saanko a kitaen ti selpon wenno tablet-ko, wenno no saanak nga agbuya iti TV,” kuna ti babai nga agnagan Olivia.

Ngem ti panawen a panagmaymaysa ket nagsayaat a gundaway para iti panagutob. Nagsayaat dayta a paset ti panagsursuro, saan laeng a para kadagiti ubbing no di ket uray kadagiti adulto.

PANUNOTEM: Us-usarem kadi ti panawenmo nga agmaymaysa tapno agutob?—1 TIMOTEO 4:15.

TI MABALINMO NGA ARAMIDEN

USIGEM TI PANAGUSARMO ITI TEKNOLOHIA

Kasanom nga usaren ti teknolohia tapno ad-adda a makasursuroka? Kasano a lapdan ti teknolohia ti abilidadmo nga agpokus ken agsursuro?

PRINSIPIO TI BIBLIA: “Salaknibam ti praktikal a sirib ken abilidad nga agpanunot.”—PROVERBIO 3:21.

ISALUDSODMO ITI BAGIM . . .

Marigatanak kadi nga agpokus no atiddog ti basbasaek iti gadyetko? No wen, ania ti masansan a makasinga kaniak?
Ania ti mabalinko nga aramiden tapno makissayan wenno maikkat dagita a pakasingaan?

Tip: Rugiam babaen ti panagbasam iti ababa pay laeng sa in-inut a nayonam dayta. Pigsaam ken in-inayadem ti agbasa tapno makapagpokuska iti basbasaem.

Ania dagiti mabalinko a balbaliwan tapno umdas ti tiempok nga agpanunot ken mangutob iti binasak?

Tip: Usarem ti maudi a sangapulo a minuto iti tiempom nga agadal a mangrepaso kadagiti nasursurom.

Kadagiti ania a situasion a masulisogak nga agaramid iti aggigiddan a trabaho?
Ania dagiti mabalinko a balbaliwan tapno makapagpokusak iti maysa laeng a trabaho?

Tip: Nadalimanek koma ti lugar a pagadalam tapno saanka a masulisog nga agaramid iti sabali pay a trabaho.

PRINSIPIO TI BIBLIA: “Gun-odem ti sirib, gun-odem ti pannakaawat.”—PROVERBIO 4:5.