Kapitulo 16​—Pannakailasat Agturong ti Baro a Daga

Anianto ti Aramidenyo a Personal?

1. Ania a pangngeddeng ti aramidenyo a personal?

Ti pangngeddeng nga agserbi ken ni Jehova ket saan a maysa a pangngeddeng a mabalin nga aramiden ti maysa para kadakayo. No ti asawayo ket maysa a matalek nga adipen ti Dios, dayta ti nakapatpateg a bendision para kadakayo. Kasta met, no dagiti dadakkelyo inay-ayatda ni Jehova, addaka iti naparaburan a kasasaad. Dayta a kasasaad iti pagtaengan ti mabalin a mangparegta iti pannakilangen kadagidiay agdaydayaw ken Jehova “iti espiritu ken kinapudno.” (Juan 4:23, 24) Ngem kabayatanna dakayo ti masapul a mangaramid iti personal a pangngeddeng. Pudno aya nga inay-ayatyo ni Jehova ken tarigagayanyo ti agbalin a maysa kadagiti ad-adipenna? Pudno aya a tarigagayanyo ti agbiag iti maysa a lubong a sadiay naruayto ti kinalinteg?

2. (a) Apay a ti kababalin ti naganak maipapan iti panagserbi ken ni Jehova nangnangruna a napateg? (b) Aniada dagiti lima a bambanag a maaramid dagiti nagannak tapno makaipaayda iti nasayaat a pangrugian kadagiti annakda?

² No maysakayo a naganak, sigurado a tarigagayanyo a dagiti annakyo ti mangtagiragsak ti bendision a biag nga agnanayon iti sidong ti Pagarian ti Dios. Dikay mabalin a tenglen ti aramidendanto inton nataengandan a mangibalabala ti bukodda a kurso ti panagbiag. Ngem ti personal nga ar-aramidenyo iti pudno a panagdayaw addaan iti nabileg nga impluensia​—maipaay iti naimbag wenno dakes. No agsanudkayo nga agserbi ken Jehova, daytanto ti mangikkat kadagiti annakyo ti mabalin a kasayaatanto a gundawayda a mangirugi iti dalan nga agturong ti biag nga agnanayon. Wenno no mangaramidkayo iti dedikasion iti Dios ket kalpasanna dikay agbiag a maitunos iti dayta, daytoy ti mabalin a mangiturong iti naespirituan a didigra iti intero a pamilia, isu a pakapukawanto ti isuamin iti dakkel a rigat. Ngem no mangipakitakayo iti ulidan iti kinamatalek, no personal a tulonganyo dagiti annakyo nga agadal iti Sao ti Dios, no sukayanyo a mismo ken kadakuada ti panagayat ken Jehova ken panagraem iti makitkita nga organisasionna, no tulonganyo ida a mangbigbig no kasano a masalaknibanda babaen iti panangaramid iti pagayatan ti Dios, no ipakitayo kadakuada no kasano a masarakan ti rag-o iti sagrado a panagserbi, ngarud mangipapaaykayo iti nagsayaatan a pangrugian iti dalan nga agturong iti biag. Babaen laeng iti bendision ni Jehova a posible daytoy. (Idiligyo iti 2 Timoteo 1:5.) Kankanayon nga ikararagyo dayta. Adu a paanangikagumaan ti kasapulan iti biangyo. Ngem anian a makagunggonanto ti pagbanaganna!

3. (a) No mapasanguankayo iti pannakabusor manipud kadagiti miembro ti pamilia, ania ti mabalin a maaramidan? (b) Ngem ania ngay no agtultuloy ti panangbusor?

³ Nalabit ti kasasaad a sangsanguenyo a ta dagiti dadduma a miembro ti pamiliayo saanda a makiraman iti panagayatyo ken Jehova. Padpadasendakayo kadi nga upayen manipud iti “pannakairamanyo” iti dayta? Wenno adda kadi ti panangbusor? Ania ti maaramidanyo a tumulong kadakuada tapno makiramanda iti rag-oyo iti pannakaawat iti panggep ti Dios? Masansan dagiti lapped ti mabalin a mapagballigian babaen ti panangawis kadagiti miembro ti pamilia a kumuyog kadakayo idiay Kingdom Hall a mangkita a mismo no ania ti maar-aramid sadiay. Bayat ti kaaddada sadiay mabalin a makisaritada iti maysa kadagiti panglakayen tapno malawlawagan dagiti salsaludsodda maipapan kadagiti pammati ken ar-aramid dagiti Saksi ni Jehova. Ngem ania ngay no agtultuloy ti panangbusor? Ngarud masapul nga imtuodenyo ti bagiyo: ‘Pudno kadi nga inay-ayatko ni Jehova ken ti Anakna a ni Jesu-Kristo ket agyamyamanak unay kadagiti amin a bambanag nga inaramidda maipaay kadatayo ket situtulokak nga agibtur iti rigat tapno ipakitak ti ayatko ken panagyamanko? Inay-ayatko aya ti bukodko a pamilia tapno makaipaayak iti umiso nga ulidan tapno, no mabalin, isuda met ti matulongan a mangpetpet iti probision ti Dios a maipaay iti agnanayon a biag?’​—Mateo 10:36-38; 1 Corinto 7:12, 13, 16.

TI WAGAYWAY A PAGTURTURONGANEN DAGITI NASNASION

4. Kasano a maipakitatayo a pudno nga inay-ayattayo ni Jehova?

⁴ Maipapaayen ti gundaway kadagiti tattao iti sadinoman a mangipakita iti ayatda ken ni Jehova babaen ti panangilineada iti bagbagida iti Mesianiko a Pagarianna. Dayta a gobierno isu ti pamay-an a pakaitan-okanto ti nagan ni Jehova. Ti kababalintayo iti Pagarian ti mangipaay iti pammaneknek no kasano ti panagriknatayo maipapan ken Jehova a mismo.

5. (a) Idiay Isaias 11:10, ania ti naipadto a maipaay iti kaaldawantayo? (b) Ania ti kaipapanan dayta?

⁵ Pinaltiingan ni Jehova ti mammadtona a ni Isaias nga agsurat: “Ket maaramidto iti dayta nga aldaw a ti ramut ni Jesse agtakderto nga agpaay a maysa a wagayway kadagiti inilin-ili. Isu ti sapulento dagiti nasnasion, ket ti paginanaanna nadayagto.” (Isaias 11:10) Dayta a “ramut ni Jesse” isu ti nadayag nga Apo Jesu-Kristo. Idi rinugianna ti naarian a pannakabalinna, kas ti makaited-biag a “ramut” isut’ nangited iti baro a regta kadagiti linea dagiti Mesianiko nga ar-ari a nagtaud ken Jesse babaen iti anakna nga Ari a ni David. (Apocalipsis 5:5; 22:16) Nanipud idi 1914 isut’ “nagtakderen kas wagayway kadagiti inilin-ili,” maysa a pakaurnonganto dagiti tattao nga agtarigagay iti nalinteg a gobierno. Ni Jehova a mismo ti nangibangon kenkuana kas Wagayway, ti pudno a Mesianiko nga Ari.​—Isaias 11:12.

6. (a) Ania ti nakatulong tapno makapagurnong dagiti tattao iti aglawlaw ti nailangitan nga Ari? (b) Kas banag ti ‘panagimtuodda’ iti “wagayway,” ania ti naammuan dagiti tattao?

⁶ Ngem kasano a dagiti tattao ditoy daga matiptiponda iti aglawlaw ti maysa a nailangitan nga Ari? Masapul a maipaayanda iti impormasion manipud iti Biblia tapno isut’ makitada babaen iti mata ti pannakaawat. Iti sidong ti panangiturong ti nasantuan nga espiritu, ti natda iti naespirituan nga Israel sipipinget nga imbanagnan daytoy a trabaho, a panangiwaragawag iti isuamin a daga ti naimbag a damag iti naipadseken a Mesianiko a Pagarian ti Dios. Dagiti indibidual manipud kadagiti isuamin a nasnasion dimngegdan a buyogen iti panangapresiar. Nagimtuoddan maipapan iti nadiosan a kasapulanda tapno agbalin nga iturayan ti Pagarian, a mangtagiragsak iti agnanayon a biag iti Paraiso a daga. Babaen ti pannakapnekda kadagiti sungbat a naipaay manipud iti Biblia, nagtignayda a maitunos kadagitoy ket innaladan ti takderda iti dasig ti Mesianiko a Pagarian ni Jehova. Naaramidanyon aya dayta?

‘AGDENGNGEGDA NGEM DIDA AGARAMID’

7. Ania a panagtignay iti mensahe ti Biblia ti naipadto idiay Ezequiel 33:30-33?

⁷ Gapu iti kinaregta dagiti Saksi ni Jehova, masansan nga isuda ti pagsasaritaan dagiti tattao. Ngem kasano ti panagrikna dagitoy a tattao maipapan iti mensahe nga iwaragawag dagiti Saksi ni Jehova? Ti tignay dagiti adu ket kas iti tignay dagiti kayaw a pada ni mammadto nga Ezequiel idiay Babilonia. Maipapan kadakuada, kinuna ni Jehova: “Ket no maipapan kenka, anak ti tao, dagiti annak ti ilim agsaodanto a maipapan kenka . . . a kunada, ‘Dawatek kenka umayka ket denggenta no ania ti sao a rumuar nga aggapu ken ni Jehova.’ Ket umayda kenka, a kas ti iyaay ti umili, ket agtugawda iti sanguanam ngem saanda ida a tungpalen, ta kadagiti ngiwatda iparangda ti adu nga ayat, ngem ti pusoda mapan a sumurot iti gunggonada. Ket, adtoy! maipaay kadakuada sika ti kas naimas a kansion ti maysa nga addaan makaay-ayo a timekna, ken makatokar a naimbag iti pagtokaran. Ta mangngegda dagiti saom, ngem saanda ida a tungpalen. Ket intono daytoy mapasamak​—adtoy! umay​—mabigbigdanto nga adda idi mammadto iti nagtengngaanda.”​—Ezequiel 33:30-33.

8. Kasano ti panangpaneknek ti dadduma a tattao iti dayta a kababalin?

⁸ Addada adu a tattao a mangdayaw kadagiti Saksi ni Jehova ken mangayat kadagiti literaturada iti Biblia. Mabalin pay nga awatenda ti tukon a libre a panagadal iti Biblia iti pagtaengan. Dadduma ti makikadua kadagiti gagayyemda kadagiti naisangsangayan a gimong nga ar-aramiden dagiti Saksi. Iti tinawen a Memorial iti ipapatay ni Jesu-Kristo, kas pangarigan, saan a nakaskasdaaw a ti bilang dagiti timmabuno ti doble ngem iti bilang dagiti aktibo a saksi ni Jehova. Kadagiti dadduma a dagdaga, ti tumabtabuno ti maminlima pay a daras ngem ti bilang dagiti Saksi. Ngem ania ti aramidenda kadagiti kinapudno ti Biblia a mangngeganda? Nasurok a tallo a milion ti personal a nangipapuso kadagitoy ket intunosda ti biagda kadakuada. Ngem dadduma ti mangibilang iti dayta a kas laeng iti maysa a makaay-ayo a kanta, maysa a banag a mangliwliwa kadakuada. Uman-anamongda laeng, nalabit mangipaayda kadagiti sasao a pammaregta ngem saanda met a mangaramid iti panangidedikar iti biagda iti Dios ken saanda a makiraman iti sagrado a serbisiona.

9. Imbes nga agduaduada ken aguray, ania ti aramiden dagiti nasirib a tattao?

⁹ Ania ti magun-odan iti panagduadua ken panagur-uray? Pudno a saan a ti anamong ken pannalaknib ni Jehova bayat ti umay nga aldaw ti panangibales. Tapno mairaman kadagiti mailasat, masapul a mangipaaykayo iti makakumbinsir a pammaneknek ita a ‘nakikaduakayo ken Jehova’ ken kukuanakayo.​—Zacarias 2:11; Mateo 7:21.

NAGARAMIDDA ITI UMISO A PANGNGEDDENG

10, 11. (a) Sino ni Hobab, ken ania nga awis ti naipaay kenkuana? (b) Kasano ti pannakaammotayo no ania a pangngeddeng ti inaramidna?

¹⁰ Dagiti amin a nagbalinen a managdaydayaw ni Jehova kas paspasurot ni Jesu-Kristo nangaramiddan iti personal a pangngeddeng a mangaramid iti kasta. Pudno daytoy kadagiti amin nga agtawid iti nailangitan a Pagarian. Itan ti nagpateg a gundaway ti silulukat kadagiti dadduma a mangaramid iti panagpilida, nga addaan iti namnama a makalasat iti dakkel a rigat ken agbiag iti kinanaan-anay ditoy daga. Ni Hobab nangipaay iti ulidan a nagsayaatan a tuladen.

¹¹ Ni Hobab kayong ni Moises. Isut’ saan nga Israelita ngem miembro iti tribo dagiti Cineo nga agnanaed iti teritoria ti Madian. Kalpasan a ti Israel inawatna ti Linteg babaen ken Moises ken nabangonnan ti sagrado a tabernakulo a maipaay iti panagdayaw ken Jehova, dimteng ti tiempo ti iyaakarda nga agpaamianan iti Naikari a Daga. Ti monmon nga ulep a mangiladawan ti kaadda ni Jehova ti umuna kadakuada a mangipakita ti dalan a surotenda ken no sadino ti pagkampuanda. Ngem makatulong kadakuada ti kaadda ti maysa a makaammo iti kasasaad ti lugar ken no sadino ti pakasarakan kadagiti bambanag a kasapulan iti panagkampo. Inawis ni Moises ni Hobab a makikadua kadakuada, ngem idi damo nagkedked ni Hobab a pampanunotenna a nasaysayaat ti pannakipagnaedna a kadua dagiti kakabagianna iti lugar a nakaiyanakanna. Nupay kasta, pinaregta ni Moises nga usigenna manen ti banag ket makikadua kadakuada tapno “agserbi a pannakamata” ti Israel ket iti kasta mailinea a makiraman kadagiti bendision nga ipaay ni Jehova iti ilina. Sisisirib nga inaramid ni Hobab ti kasta, kas ipamatmat ti Oc-ocom 1:16.​—Numeros 10:29-32.

12. (a) Sino ita ti kas ken ni Hobab, ken iti ania a pamay-an? (b) Ania nga awis ita ti kas iti awis ni Moises ken Hobab?

¹² Addada tattao ita nga inladawan ni Hobab. Nupay saanda a naespirituan nga Israelitas, nakikaduada kadagitoy bayat nga agdaliasatda nga agturong iti Baro nga Urnos ti Dios. Tapno maaramidda daytoy, masapul a pugsatenda ti pannakaisinggalutda kadagiti nailubongan a kakabagianda ken ti natauan a gobgobierno. Iti sidong ti panangidaulo ti Dakdakkel a Moises, ni Jesu-Kristo, siraragsak nga agserserbida a kadua ti natda kadagiti “kakabsat” ni Kristo, a masansan a mangus-usat kadagiti kabbaro a teritoria a maipaay iti panangasaba iti naimbag a damag. Adu kadakuada ti immakar kadagiti luglugar a dakkel ti pakasapulan kadagiti manangiwaragawag iti Pagarian, masansan kas payunir wenno misionero, a mangus-usar a naan-anay iti tiempoda a mangipablaak ti Pagarian ti Dios kas ti kakaisuna a pudno a namnama. Addada pay adu a gundaway a pakiramanan iti kasta a sagrado a serbisio. Dagiti kualipikado a tattao maawisda a mangipaay iti bagbagida ket iti kasta makiramanda kadagiti bendision a maikuyog iti kasta a dakdakkel a panagserbi. Mabalinanyo kadi?

13. (a) Sino ni Jael, ket ania ti sasaaden ti asawana maipapan kadagiti ad-adipen ni Jehova? (b) Kasano a naipasango ti maysa a pannakasubok ni Jael?

¹³ Iti uneg ti 180 a tawtawen kalpasan ti panangikeddeng ni Hobab a makikadua iti Israel, maysa kadagiti kaputotanna, ti lalaki a managan Heber, ti agnanaed a kadua ti asawana, ni Jael, saan nga adayo manipud Megido. Simmina ni Heber kadagiti dadduma a Cineo ket nakikappia ken ni Jabin, maysa nga ari a Canaanita a nangidadanes iti kasta unay iti Israel. Idi imbangon ni Jehova ni Barac a manangisalakan ti Israel, ti kangrunaan a hepe ti armada ni Jabin, ni Sisara, inurnongna ti armadana ken dagiti siam a gasut a luglugan a linandokan. Ngem ni Jehova nakidangadang a maipaay iti ilina, a riniribukna ti kampo ti kabusor, ken pinaglayusna a kellaat isu a nangiyanod kadagiti lugluganda. Pinanawan ni Sisara a mismo ti luganna ket pimmanaw a nagnagna a napan iti tolda ni Jael nga asawa ni Heber. Kas ninamnama ni Sisara isut’ nangawis kenkuana nga umuneg.​—Oc-ocom 4:4-17; 5:20, 21.

14. Ania a pangngeddeng ti inaramid ni Jael, ket ania ti impaay daytoy a pammaneknek?

¹⁴ Itan adtoyen ti pannakasubok. Anianto ti aramidenna iti daytoy a kabusor ti ili ni Jehova? Inabbonganna iti ules, pinainumna iti gatas ket naguray agingga a makaturog. Idin “innalana ti pasok ti tolda ket iniggamanna ti maysa a martilio. Ket siinayad a napan kenkuana ket impalokna iti pispisna daydi pasok, ket isu inlansana iti daga, ta isu idi nargaan iti turog. Iti kasta napasag ket natay.” Ti inaramidna kasapulanna ti tured, ken ti panagayat ken Jehova ken iti ilina. Dayta ramanenna met ti positibo a panagtignay ken ti pinget iti biangna.​—Oc-ocom 4:18-22; 5:24-27, 31.

15. Kasano a pampaneknekan dagiti tattao ita a kasda la ken ni Jael?

¹⁵ Kas pudno met kadagiti dadduma a di Israelita a managdaydayaw ken Jehova, ni Jael iladawanna dagiti “sabsabali a karnero” a mangaramid iti naimbag kadagiti naespirituan a kakabsat ni Kristo. Aniaman ti nasinged a singgalut dagiti kakabagianda iti lubong ken dagiti agtuturayna, dagiti “sabsabali a karnero” dida anamongan ti panangidadanes dagiti agtuturay ti lubong iti ili ni Jehova. Ti kinasungdoda ket maipaay iti Dakdakkel a Barac, ni Apo Jesu-Kristo, ken kadagiti pudno a paspasurotna. Dagitoy a klase Jael saanda a personal nga itag-ay dagiti im-imada a maibusor kadagiti agtuturay ti lubong, ngem usarenda ti aniaman nga adda a mabalinda nga usaren tapno sarangten ti pannakaidadanes dagiti ad-adipen ni Jehova. Saanda nga agkedked a mangipakaammo a naan-anay a makitunosda iti panggep ni Jehova a mangdadael kadagiti amin a kabusorna.

16, 17. (a) Ania nga ulidan a naitutop a tuladentayo ti nailanad idiay Aramid kapitulo 8? (b) Kalpasan dayta ania ti masapul nga itultuloytayo nga aramiden?

¹⁶ dikay sayangen ti tiempo. No pudno nga addaankayo iti pammati ken ni Jehova ken iti Mesianiko a Pagarianna ken no naitunosyon ti panagbiagyo iti sapulen ti Biblia, ngarud, dikay agtaktak, a mangipanayag iti dayta. Iparangarangyo ti espiritu ti eunuko nga Etiope a naisalaysay idiay Aramid kapitulo 8. Idi a naawatannan no ania ti kasapulan kenkuana, dinawatna ken Felipe, isu a nangilawlawag kenkuana ti naimbag a damag maipapan ken Jesus: “Ania ti makapawil kaniak a mabautisaran?” Ket dagus a naitaneb iti danum.

¹⁷ No nakaaramidkayon iti nasayaat a pangrugian, nga inaldaw a pabpabilgenyo ti relasionyo ken Jehova, sapulenyo dagiti pamay-an a mangiyaplikar iti Saona nga ad-adda pay iti biagyo, ken naan-anay a makiraman no mabalin iti nasken a trabaho a panangiwaragawag iti Pagarian a maar-aramiden bayat ti maudi nga al-aldaw daytoy a sistema dagiti bambanag.