LEKSION 23

Kasano a Maisursurat ken Maipatpatarus Dagiti Literaturami?

Agtrabtrabaho iti Writing Department, U.S.A. — Writing Department, U.S.A.

Maysa a grupo dagiti agipatpatarus iti South Korea — South Korea

Lalaki idiay Armenia a nakaiggem iti libro nga impatarus dagiti Saksi ni Jehova — Armenia

Agtutubo a babai idiay Burundi a nakaiggem iti libro nga impatarus dagiti Saksi ni Jehova — Burundi

Babai idiay Sri Lanka a nakaiggem kadagiti magasin nga impatarus dagiti Saksi ni Jehova — Sri Lanka

Tapno maaramidmi ti amin a kabaelanmi a mangipakaammo iti “naimbag a damag . . . iti tunggal nasion ken tribu ken lengguahe ken ili,” mangipabpablaakkami kadagiti literatura iti nasurok a 900 a lengguahe. (Apocalipsis 14:6) Kasanomi nga ar-aramiden daytoy narigat a trabaho? Babaen ti tulong dagiti mannurat iti nagduduma a pagilian ken dagiti napasnek nga agipatpatarus—nga aminda ket Saksi ni Jehova.

Maisurat iti Ingles ti orihinal a material. Ay-aywanan ti Bagi a Manarawidwid ti aktibidad ti Writing Department iti sangalubongan a hedkuartermi. Iyur-urnos daytoy a departamento ti aramiden dagiti mannurat nga agserserbi iti hedkuarter ken iti sumagmamano a sanga nga opisina. Nagduduma a pagilian ti ayan dagiti mannurat isu a naglaon dagiti publikasionmi kadagiti topiko a paginteresan ti tattao, aniaman ti pagilian wenno kulturada.

Maipatulod ti material kadagiti agipatpatarus. Apaman a ma-edit ken maaprobaran dayta, maipatulod iti elektroniko a pamay-an kadagiti grupo dagiti agipatpatarus iti intero a daga. Ipatarus, korehiren, ken basaenda ti naipatarus. Ikagkagumaanda a pilien ti “umiso a sasao ti kinapudno” a mangipatarus iti eksakto a kaipapanan ti Ingles.—Eclesiastes 12:10.

Dagiti kompiuter ti mangpapartak iti proseso. Saan a masukatan ti kompiuter dagiti tattao a mannurat ken agipatpatarus. Ngem mapapartak ti trabahoda babaen kadagiti elektroniko a diksionario, computer program, ken bambanag a mausar iti panagsirarak. Nangdisenio dagiti Saksi ni Jehova iti program a maaw-awagan iti Multilanguage Electronic Publishing System (MEPS) a pakaiserrekan dagiti naipatarus iti ginasut a lengguahe, mainayon kadagiti ladawan, sa maurnos tapno mayimprenta.

Apay nga ar-aramidenmi daytoy, uray kadagiti lengguahe ti sumagmamano la a ribu a tattao? Gapu ta pagayatan ni Jehova a “maisalakan koma ti amin a kita ti tattao ken maaddaanda iti umiso a pannakaammo iti kinapudno.”—1 Timoteo 2:3, 4.

Kasano a maisursurat dagiti publikasionmi?
Apay nga ipatpatarusmi dagiti literaturami iti nagadu a lengguahe?