APONG

Nagannak ti ama ken/wenno ina ti maysa a tao. Ti termino nga “apong,” kasta met ti “apong a lakay” ken “apong a baket,” manmano a masarakan kadagiti patarus ti Biblia. Ti ‘apong a baket’ iti 1 Ar-ari 15:10, 13 naipatarus manipud iti isu met laeng a sao a kas iti ‘ina’ ken mayanatup unay a maipatarus a kasta agsipud ta ni Maaca ket apong-a-baket ni Asa, saanna nga ina. (1Ar 15:1, 2, 8) Agparang a nagtultuloy ni Maaca kas ina a reyna bayat ti panagturay ni Asa agingga nga isu naikkat gapu iti idolatriana. (1Ar 15:13) Umasping unay, ti “ama” no dadduma impasimudaagna ti apong a lakay wenno inapo. (Ge 28:13; 2Sm 9:7) Natukoy met dagiti apong babaen iti sasao a kas iti “ama ni inam” ken ‘ama ni ina.’​—Ge 28:2; Uk 9:1.

Ti “annak wenno appoko,” kuna ti apostol, rumbeng nga “agtultuloyda a mangibayad iti maiparbeng a pangsubad kadagiti nagannakda ken kadagiti apongda [Gr., pro·goʹnois].” (1Ti 5:4) Ti sabali pay a porma ti isu met laeng a sao (pro·goʹnon) ket naipatarus a ‘dagidi amma’ iti 2 Timoteo 1:3. Ni Loida nga apong-a-baket (Gr., mamʹme) ni Timoteo nakomendaran gapu ta addaan ‘pammati nga awan aniaman a panaginsisingpetna,’ ket nalawag a timmulong iti pannakapatanor ti pammati ken naespirituan nga idadakkel ni Timoteo.​—2Ti 1:5; 3:14, 15.