JERBO

[Heb., ʽakh·barʹ].

Ti Hebreo a sao nga ʽakh·barʹ, a nadumaduma ti pannakaipatarusna kas “marabutit,” “bukat,” “jerbo,” ken “aglaglagto a managkibkib,” itarusan ti adu nga eskolar kas posible a mangiraman iti amin a kita ti bukat, sangio, ken dagiti nainaig nga animal kas ti jerbo. Nupay kasta, ti Hebreo ken Aramaiko a leksikon da Koehler ken Baumgartner ipaayna ti kaipapanan ti Hebreo a termino kas “jerbo.”

Ti jerbo ket aglaglagto a managkibkib nga adda umarngianna iti bassit a kangaroo ket masalaw pay laeng kadagiti natikag a paset ti Makintengnga a Daya. Ti jerbo ti desierto (Jaculus jaculus) addaan iti kaatiddog ti bagi a manipud 10 agingga iti 15 cm (4-6 pul.) ken agdagsen iti 50 agingga iti 70 g (1.8-2.5 oz). Dadakkel dagiti lapayag ken matada. Ababa dagiti kamauna, ngem ti dua a kamaudi agrukod iti agarup dua a kakatlo ti dagup a kaatiddog ti ulo ken bagi. Ti ipus ti kaatiddogan a paset ti animal ket kasla bassit a brutsa ti murdongna. Daytoy nga animal nga aktibo iti rabii kaykayatna ti desierto a dagdaga, a busbosenna ti nadagaang nga aldaw iti abutna iti uneg ti daga ngem agdakiwas bayat ti nalamlamiis a rabii tapno agsapul iti taraon.

Nupay dagiti Arabo nga agnanaed iti desierto ti Siria pagtaraonda ti jerbo, narugit dayta kadagiti Israelita sigun iti linteg. (Le 11:29) Ngem agparang a dagiti apostata nga Israelita saanda nga inkankano daytoy a panangiparit ti Linteg.​—Isa 66:17, Rbi8 ftn.

Dagiti jerbo dadaelenda ti bukbukel ken dadduma pay a maapit. Bayat ti tiempo a ti sagrado a Lakasa adda iti teritoria dagiti Filisteo, ti nadibinuan pannakaipagtengna a saplit dagiti jerbo dinadaelna ti daga.​—1Sm 6:4, 5, 11, 18.