MAKKEDA

Naarian a siudad dagiti Canaanita nga adda iti Sefela. Iti rukib ti Makkeda ti naglemmengan ti lima nga ar-ari a nagaaliansa maibusor kadagiti Gabaonita ken idiay met laeng a temporario a nakulongda agingga a napapatayda. Kalpasan dayta, daytoy a rukib ti nagbalin a tanemda amin, ket babaen ti panangidaulo ni Josue kinautibo ti buyot dagiti Israelita ti Makkeda sada dinadael dayta. Idi tiempo ti pannakabingbingay ti Naikari a Daga, ti Makkeda ket naited iti tribu ni Juda.​—Jos 10:5-29; 12:7, 8, 16; 15:20, 33, 41.

Saan a masigurado ita no sadino ti eksakto nga ayan ti Makkeda. Naikuna nga isu dayta ti Khirbet el-Kheishum, agarup 4 km (2.5 mi) iti amianan nga amianan-a-daya ti Azeca, nupay saan a sigurado. Dagiti nakaad-adu a rebba ken dagiti kabangibang a rukib ti agserbi a pagilasinan iti ayanna.