Report dagiti Manangiwaragawag ti Pagarian
Naiparangarang ti Panagkaykaysa ti Pagarian
PUDNO a naiparangarang ti panagkaykaysa ti pagarian kadagiti nabiit pay a kumbension dagiti Saksi ni Jehova idiay Nueva Zealanda ken idiay Filipinas. Idiay Nueva Zealanda, 13,408 ti timmabuno iti “Panagkaykaysa ti Pagarian” a kumbension ken 167 ti nabautisaran. Dagiti tallo a kumbension idiay Nueva Zealanda ti napagkokonektarda babaen kadagiti linea ti telepono kadagiti innem a kumbension ti Australia. “Adu kadagiti gagayyem nga addaan kakabagian kadagiti dadduma a kumbension a naisilpo ti nagkuna a kasla mailadladawanda ida nga ’dumdumngeg iti isu met laeng a palawag iti dayta met la nga oras ket daytat’ nangted ti nakaskasdaaw a rikna ti panagkaykaysa,” kuna ti report. Maysa a kabsat a babai a tuleng a tumabtabuno kadagiti kumbension iti 30 a tawtawenen ti nagkuna a ‘daytoy pay laeng ti damdamo nga adda nagun-odanna manipud iti programa,’ ta maigiddan iti palawag adda pay pagsasao ti senias a panangipatarus para kadagiti tuleng.
◻ Gaput’ panangapresiarda ti pannakasapul ti panagtatarip-nong, 120 ti nagdaliasat a napan iti kumbension idiay Auckland manipud Rarotonga, idiay Cook Islands, 1,800 a milia (2,900 km) ti kaadayona. (Hebreo 10:24, 25) Tapno mapaaddat’ kuarta para iti pleteda iti eroplano, nagaramid ken naglaklako dagiti kakabsat a babbai ti bestida, kurtina, kusion, kuintas a frangipani ken kuintas a shell. Dagiti kakabsat a lallaki nagmulada kadagiti natnateng nga ilakoda ken nagdaklisda ken nagan-anida tapno makakuartada para iti biahe. Nangngegan dagiti kongregasion idiay Nueva Zealanda maipapan ti panagkasapulan dagiti kakabsat idiay Cook Islands ket timmulongda iti kuarta a mangsupusop iti kurangda a gapu itoy ngangngani amin dagiti kakabsat idiay Cook Island nakaatenderda iti kumbension idiay Auckland. Dadduma a paset ti programa ti naipresentar iti pagsasao a Rarotongan agpaay kadakuada. Dagiti 17 a misionero a timmabuno kadagiti tallo a kumbension idiay Nueva Zealanda ti nakipagragsak kadagitoy amin a kakabsat bayat ti panagserserbida a sangsangkamaysa ken Jehova kas Ari.
◻ Dagiti 149,219 a timmabuno kadagiti 20 a kumbension idiay Filipinas ti naragsakan met a nagtataripnong a sangsangkamaysa kadagiti kakabsatda ken makita a 1,858 ti nabautisaran. Adut’ nangipakita ti determinasionda a tumabuno. Kas pangarigan, dagidiay aggigian idiay Davao del Sur, agraman sumagmamano a kakabsat iti tribo dagiti Manobo, ti nagnada iti 62 milias (100 km) tapno makalugan iti bus nga agturong iti kumbension idiay General Santos City sadi Mindanao. Maysa pay a grupo ti nagnagna a bimmallasiw iti bambantay 124 milias (200 km), iti uneg ti tallo nga aldaw. Kalpasanna nagluganda iti bilog a nagmalmalem pay a nagbiahe tapno makagtengda iti kumbension. Immanamongda amin a “maikari amin dayta iti nagun-odanda.”
Ti kumander ti Integrated National Police ti immay iti kumbension idiay Tuguegarao, Cagayan, ket kinumentuanna ti nagsayaat nga organisasion ti kumbension. Kunana: “Saanen a kasapulan dagiti Saksi ni Jehova ti polis iti kumbensionda ta kanayon a natalna ken naurnos ti panagtataripnongda.” Ti nakapaliiw ti kumbension idiay Binalonan, Pangasinan, ti nagkuna: “No amin a tattao iti komunidad ket Saksi ni Jehova da koma, saantayon a pagdanagan ti talna ken urnos kadagiti luglugar . . . dagiti annak kaduada dagiti dadakkelda nga agdengdengngeg . . . awan ti agsigsigarilio. Gapuna idi makasigsigarilioak siak ti rimmuar.”
Dagitoy a kapkapadasan ti makatulong kadatayo a mangapresiar iti panagkaykaysa ken rag-o dagitoy a manangiwaragawag ti Pagarian. Maysanto a nakaskasdaaw a panawen inton amin a tattao bigbigendan ni Jehova kas Ari ken agpasakopda iti panagturayna. Iti kasta ti kinaawan-panagkaykaysa ti banagton a naglabas.
[Dagiti Mapa/Dagiti ladawan iti panid 7]
(Para iti aktual a pannakaurnosna, kitaem ti publikasion)
NUEVA ZEALANDA
[Mapa]
FILIPINAS