Report dagiti Manangiwaragawag ti Pagarian
Dagiti “Manangsalimetmet Kinatarnaw” a Kumbension Idiay Filipinas
TI 1985 a serie dagiti 23 a “Manangsalimetmet ti Kinatarnaw” a Kumbension a naangay idiay Filipinas ti dakkel a balligi iti isuamin a pamay-an. Ti dagup dagiti timmabuno a 213,734, ket maysa a 27-porsiento nga irarang-ay no idilig iti bilang idi napan a tawen, ket daytat’ nasurok a dua ket kagudua a daras iti dagup a bilang dagiti agibumbunannag iti pagilian. Daytoy ti mangipakpakita nga adu pay ti tattao nga interesado a tumabtabuno iti kumbension. Kasta met, 2,223 dagiti nabautisaran, a ngimmato iti 14.5 a porsiento iti napalabas a tawen.
Idiay Tuguegarao, Cagayan, ninamnama a 12,000 ti tumabuno iti kumbension, ngem 24,327 ti immay! Ti estasion ti radio ti nangibrodkas iti 30-minuto a panagsalsaludsod kadagiti kakabsat, nga awan duadua isu ti nakatulong iti nagsayaat a bilang dagiti timmabuno. Insaludsod ti managsaludsod no kasanotayo a matagtaginayon ti talna ken urnos kadagiti kumbensiontayo. Nailawlawag nga amin dagiti kameng ti organisasiontayo pagregreggetanda a sukayen dagiti bungbunga ti Biblia nga ayat ken talna. Gapuna kada addaantay ti kumbension a kas iti daytoy, awan ti panagaapa. Nagsiddaaw ti agsalsaludsod ket kunana: “Anian a nagsayaat ti organisasionyo! Dagiti dadduma nga organisasion saanda a maaramidan daytoy. Tunggal addaanda ti umariwekwek a tattao a kas iti daytoy, kanayon nga adda dagiti dakes a pasamak.”
Iti daytoy met laeng a kumbension, maysa a mangisursuro idiay Cagayan State University ti nagkuna: “Aglaplapusanan dagiti timmabuno; disiplinado dagiti delegado; adda ti kooperasion kadakuada; mangipakpakitada ti naan-anay a dedikasion iti ministerio. Agpapan pay ti dakkel a bilang dagiti delegado, ti lugar ti nakadaldalus; adda urnos ken awan dagiti dakes a pasamak a daytat’ mangpaneknek a tungtungpalen dagiti Saksi a simamatalek ti maad-adalda manipud kadagiti Kasuratan.”
Ti addaan kontrata nga aglako idiay Rizal Memorial Stadium ti Manila ti nagkomento bayat ti kumbension: “Dayawek ti urnos ti asambleayo. Ti sosiedadyo ti organisado, ket ita laeng a maimatangak daytoy a kita ti kinaurnos dagiti Saksi agsipud ta ita laeng a nakakitaak ti asamblea a kas iti daytoy.”
Iti kumbension idiay Calbayog City, 7 nga agibumbunannag ti timmabuno manipud iti maysa a naiputputong a grupo, ket nangikuyogda ti 14 nga interesado a tattao. Iti panangapresiarda iti pannakasapul ti kaaddada iti daytoy naespirituan a rambak, maysa a pamilia manipud Palawan ti nangbusbos iti agarup 20 porsiento iti tinawen a sapulda tapno makatabuno idiay Puerto Princesa City.
Adu a ganggannaet a delegado ti nagdaliasat nga immay iti kumbension idiay Manila, ket agarup 80 porsiento kadagitoy ti adda iti maysa a porma iti amin-tiempo a serbisio. Makaparagsak ti pannakakita no kasano a naparegta dagiti kakabsat iti drama a Ti Masanguananyo—Karit Dayta, a daytat’ maipapan iti amin-tiempo a serbisio. Idiay Iloilo City, tallo kadagiti nakipaset iti dayta a drama ti natignay unay bayat kadagiti panaginsayoda a nangipatulodda ti aplikasion nga agpaay iti regular a panagpayunir uray pay sakbay a mangrugi ti kumbension. Idiay Ormoc City, insalaysay ti tsirman ti kumbension a kalpasan dayta a drama, innem nga agibumbunannag ti nagkalikagum kadagiti aplikasion maipaay iti regular a panagpayunir.
Pudno unay a ti espiritu ni Jehova ti mangtigtignay iti ilina a “mangipaay a situtulok iti bagbagida” kadagiti maudi nga al-aldaw. (Salmo 110:3) Dagiti “Manangsalimetmet ti Kinatarnaw” a Kumbension idiay Filipinas ti nangparegta unay kadagiti kakabsat ken kadagiti interesado a tattao sadiay.