Dagiti Saludsod Manipud Kadagiti Managbasa

◼ Kasano nga agbalin ni Jesus a “maysa a dios” a pinarsua ni Jehova, idinto ta idiay Isaias 43:10 kuna ni Jehova: “Awan idi ti nabukel a Dios nga immun-una ngem siak, ket awanto met ti sumaruno kaniak”?

Pagaammo unayen nga isursuro dagiti Saksi ni Jehova manipud iti Biblia a ni Jesus ti naparsua nga anak ti Dios ket ngarud nababbaba ngem ni Amana. (Juan 14:28; 1 Corinto 11:3) Kaskasdi, kas Maysa a mannakabalin nga agserserbi kas Pannakangiwat ti Dios, wenno Logos, mabalin met nga isu ti matukoy a “maysa a dios.” Ti sumagmamano a bersion ti Biblia ti mangipaulog iti Juan 1:1 kas agkunkuna a ti Logos ket “maysa a dios.” Kas pangarigan, ti Das Evangelium nach Johannes (1979) ni Jürgen Becker ti mabasa: “ . . . und der Logos war bei dem Gott, und ein Gott war der Logos.” (Patarus iti Iloko: “ . . . ket ti Logos adda iti Dios, ket maysa a Dios idi ti Logos.”)a

Ngem, kas ipamatmat ti agsalsaludsod, kasla daytoy ti maisuppiat iti Isaias 43:10, 11, a kunana: “‘Dakayo dagiti saksik,’ kuna ni Jehova, ‘ken ti adipenko a pinilik, tapno maammuanyo ken patiendak, ken maawatanyo a siak Daydiay. Awan idi ti nabukel a Dios nga imun-una ngem siak, ket awanto met ti sumaruno kaniak. Siak​—siak met laeng ni Jehova, ket no saan a siak awan ti mangisalakan.’”

Ti napasnek nga estudiante ti Biblia ti matulongan babaen iti panangtarusna a naimbag kadagiti konteksto dagidiay a sasao. Igidgiddiat ti Dios a Mannakabalin-amin a ni Jehova ti bagina iti aramid-tao a didiosen dagiti nasnasion a nanglawlaw iti Israel. Insaludsod ni Jehova: “Asino ngarud ti pangipadisanyo iti Dios, wenno ania a kaasping ti iyaspingyo kenkuana?” Nalawag a saan nga iti maysa a ladawan nga aramid iti maysa a mammanday wenno nangsukog manipud iti maysa a kayo. (Isaias 40:18-20; 41:7) Dagita a “didiosen” ket saanda a ‘naiyaplag dagiti langlangit kas maysa a tolda, kas ti panangaramid ni Jehova. (Isaias 40:21-26) Mainayon pay, maipadles ni Jehova ti masanguanan; siempre dagiti didiosen dagiti nasnasion ket saanda a ‘maipablaak dagiti bambanag nga umay iti masakbayan, tapno maammuanda a didiosda.’ (Isaias 41:23) Daytoy a kapanunotan ti naiyulit idiay Isaias 43:9, a sadiay kuna ni Jehova: “Maurnong koma dagiti amin a nasnasion. Asino kadakuada ti makabalin a mangipalgak itoy? Wenno mangiparang kadagiti imun-una a bambanag kadatayo? Iyegna koma dagiti saksida.” Nainkalintegan, maikuna ti Mannakabalin-amin: “Siak ni Jehova. Dayta ti naganko; ket ti dayagko diakto ited iti sabali, ket diak met ited ti dayawko kadagiti kinitikitan a ladladawan.”​—Isaias 42:8.

Ngarud ti konteksto ipasdekna a ti Mannakabalin-amin ket karkaritenna dagiti makunkuna a didiosen dagiti nasnasion. Kas didiosen laeng nga awan dagiti nadiosan a pannakabalinda, kaawatan a saanda a disiosen a pagdayawan, isudat’ awan kaes-eskanda. Intuloy a kinuna ni Jehova: “Adda aya sabali a Dios a saan a siak? Wen, awan ti Bato. Awan ti ammok. Dagiti mangbukel iti kinitikitan a ladawan isuda amin ubbawda, ket dagitoy a bambanag a pagay-ayatanda [a nasukog manipud metal wenno nakitikitan manipud kayo] saanto a manggunggona.” (Isaias 44:8-17) Gapuna, pagbalinen a nalawag ti konteksto ti Isaias 43:10 a ni Jesus ket saan a maus-usig ditoy; dagiti “didiosen” a maus-usig isuda dagiti awan pannakabalinda a didiosen dagiti nasnasion.

Ti sao a “Dios” wenno “dios” gagangay a maus-usarda maipapan iti maysa a napigpigsa ngem tao a pakaipapaayan ti panagdayaw. Gapuna, iti is-isip dagiti adu a tattao, ti “dios” mabalin a kaipapananna (1) ti Kangatuan a Persona, ti Mannakabalin-amin, wenno (2) maysa nga ulbod a dios, kas iti maysa a ladawan. Nupay kasta, ti Biblia ti mangipalubos pay met iti sabali nga usarna. Makitatayo daytoy manipud Salmo 82:1, 2. Sadiay Daydiay Nadiosan (ni Jehova a Dios) ti maigidgiddiat manipud kadagiti natauan nga uk-ukom nga inawagan ti salmista a kas “didiosen.” Ni Jesus mismo iti kamaudiananna dinakawatna daytoy a pagsasao. Agsipud ta nasaona a ni Jehova a Dios ti Amana, dadduma kadagiti Judio tarigagayanda nga uboren. Iti pammabasolda a ‘pagbalbalinenna ti bagina a dios,’ simmungbat ni Jesus: “Saan aya nga adda a naisurat iti Lintegyo, ‘siak kinunak: “Dakayo didioskayo”’? No ninaganna ida [dagidiay natauan nga uk-ukom] ti ‘didios’ . . . kunaenyo aya kaniak a ti pinagsanto ti Ama ken imbaonna ditoy lubong, ‘Agtabbaawka,’ agsipud ta kinunak, siak ti Anak ti Dios?”​—Juan 10:31-36.

Awan duadua adda laeng maymaysa a Dios a Mannakabalin-amin, a kas ti insurat ni apostol Pablo: “Ta uray no adda dagiti naganenda a ‘didios,’ idiay langit wenno ditoy daga, a kasla ket tay aduda dagiti ‘didios’ ken adu dagiti ‘ap-appo,’ ngem kadatayo adda maymaysa a Dios ti Ama, a paggappuan dagiti isuamin a banag, . . . ken maymaysa nga Apo, ni Jesu-Kristo, a gapu kenkuana adda dagiti isuamin a bambanag, ken gapu kenkuana addatayo.” (1 Corinto 8:5, 6) Ni Apo Jesu-Kristo ket saan a maysa nga ulbod a Dios, saan a demonio a Dios, saan met a basta ladawan. Isu ‘ti raniag ti dayag ni Jehova a Dios.’ (Hebreo 1:3) Gapuna maiyanatop para iti Juan 1:1 a bigbigen kas “maysa a dios,” wenno “kas iti dios” (Johannes Schneider).

[Dagiti Footnote]