Ti Kaiyulogan dagiti Damdamag

Panagsasarita dagiti Katoliko-Marxist

Idiay Budapest, Hungary, idi Oktubre 1986, 15 a teologo a Katoliko ken pilosopo ti nakiummong a kadua dagiti 15 a mamasirib a Marxist. Ti gimong ti inangay ti Vatican Secretariat for Unbelievers ken ti Hungarian Academy of Science tapno pagsasaritaan ti nagtaudan dagiti moral nga ipatpateg.

Mairaman kadagiti Katoliko nga adda isu da Pranses a Kardinal Poupard, tsirman iti Secretariat for Unbelievers, ken ti Austriano a Kardinal Koenig, maysa nga espesialista maipapan iti relasion ti Iglesia Katolika kadagiti komunista a nasnasion. Dagiti Marxists iramanna dagiti pangulo iti Hungarian Institute of Philosophy ken iti Soviet Institute of Scientific Atheism.

Ti inaldaw a pagiwarnak dagiti Pranses a Le Monde ti nangipadamag: “Dagiti mamasirib a Marxists bigbigenda a napasanguanda iti krisis dagiti moral nga ipatpateg, a ti kinaseriosona ti rukodenda babaen ti bilang dagiti panagbekkel, ti panagusar iti droga, ken ti panagusar iti alkohol. Sigun iti delegasion a Katoliko, iti panangsapulda iti solusion dagitoy [dagiti Marxists] agpannurayda iti kooperasion dagiti Kristiano nga ig-iglesia. Iti dasig ti Romano [Katoliko], ti nagkadua a panggep isu ti panangtingiting a nasaysayaat no kasano a ti tao ken dagiti kababalin maibagayda iti sosiedad a Marxists ken ti ‘panangsukimat ti moral a pangibatayan iti nalawag a panagkadua dagiti Kristiano iti Makindaya [komunista] a pagpagilian ken dagiti Marxists.’”

Ti pudpudno a solusion iti moral a parparikut iti tiempo saan a masarakan kadagiti kumperensia iti nagbabaetan dagiti agsusuppiat a kapanunotan. Imbes ketdi, dayta ti masarakanto inton ti Pagarian ni Jehova iti im-ima ti Anakna, ni Jesus, baliktadenna ti agdama a sistema dagiti bambanag, ket mangibangon iti lugarna ti maysa a baro a lubong iti sidong dayta a nailangitan a Pagarian.​—Daniel 2:44; Apocalipsis 21:4, 5.

Pudpudno a Pannakawayawaya?

Teolohia ti Pannakawayawaya​—maysa a movimiento a mangipalubos iti kinaranggas a kas pamay-an a “mangwayawaya kadagiti napanglaw ken mailupitlupit,” nangnangruna iti Rumangrang-ay a Pagpagilian, ti agbalbalinen a nalatak. Daytoy ti tema iti panagsasarita idiay Second International Assembly of the Ecumenical Association of Third World Theologians naaramid idiay Oaxtepec, Mexico, idi Disiembre 8-13, 1986. Apay a dagitoy a relihiuso nga eskolar ad-adda a determinadoda no maipapan iti kalatda a maipaay iti sosial a panagbalbaliw ngem idi?

Nupay no ti Vaticana nangiruar ti maysa nga instruksion idi 1985 a mangkondenar iti teolohia ti pannakawayawaya, ti Instruction on Christian Freedom and Liberation a naipatulod idi 1986 kinunana a “naan-anay a nainkalintegan nga agtignay dagidiay nga agsagaba iti pannakailupitlupit iti biang dagiti babaknang wenno dagiti mannakabalin iti politika.” “Ti naarmasan a pannakidangadang” ket maanamonganen a kas ti “maudi a pamusposan.”

Nupay kasta, idi adda pay ditoy daga, naikiraman kadi ni Jesus kadagiti sosial a movimiento ti lubong? Maisuppadi iti dayta, saan, ta idi a ni apostol Pedro inlayatna “ti kampilan” a mangidepensa iti Anak ti Dios, ni Jesus ti nangtubngar kenkuana a kunkunana: “Ipulangmo ta kampilanmo iti kalubanna, ta isuamin dagiti mangaramat iti kampilan mataydanto iti kampilan.” (Mateo 26:52) Ikari ti Biblia a ti pudno a wayawaya dumteng babaen iti pannakibiang ti Dios inton pukawenen ti Dios iti lubong saan laeng a ti kinapanglaw, internasional a panagdadangadang, panangidumduma iti rasa, ken pannakailupitlupit no di ket kasta met ti amin a lulua, rigrigat, panagladingit, ken ti ipapatay. (Apocalipsis 21:4) Pudno unay, daytoyto ti pudno a wayawaya!

Di Maawat ti Pannakabautisar dagiti Ubbing

Maysa nga Aleman a ministro iti Protestante manipud Frankfurt ti di pay nabayag a nangipakaammo kadagiti autoridad iti iglesia a manipud itan dinan awaten “ti panangbautisar kadagiti ubbing iti parukona.” Iti panangilawlawagna no apay a ti pannakabautisarna a mismo kas maysa nga ubing ket saan a maikari a maawagan iti bautismo, ti 58-años a ni Klaus Hoffmann kinunana: “Pulos a dina tinungpal ti umuna a kasapulan iti panangbautisar iti Biblia, nga isu ti pammati, wenno dayta ket addaan iti umiso a simbolo, kayatna a sawen ti pannakaitaneb.” Kas panangpaneknek iti panangmatmatna, pinilina ti mabautisaran manen ket iti kasta “naglasat iti naibatay iti Biblia a pannakabautisar babaen iti pannakaitaneb,” kuna ti Aleman a pagiwarnak a Frankfurter Allgemeine Zeitung.

Idi damo, dagiti opisiales iti iglesia sinuspenderda ni Hoffmann manipud kadagiti amin nga annongenna, ngem ti pangngeddeng ti nasukatan iti “panagsardeng iti tallo a bulan a maipaay iti panggep a panangsukimat.” Ket ania dagiti nagbanaganna? Ipadamag ti pagiwarnak a ti ad-adda pay a panagsukimatna maipapan iti banag ti nangpaneknek laeng “nga iti Biblia awan ti pannakasuportar ti panangbautisar kadagiti maladaga. Kasta met, dagiti sursurat dagiti immuna a Kristiano saanda a dakdakamaten ti pannakaiserrek ti aramid agingga idi maikatlo a siglo.”

Saan ngarud a nakaskasdaaw, a dagiti autoridad iti relihion isitarda ti tradision a kas ti pakaibatayan daytoy nga aramid. Nupay kasta, nupay adda dagitoy a kinapudno, agtultuloy a maar-aramid ti panangbautisar kadagiti maladaga kadagiti adu iti intero a Kakristianuan. Ti kadi kasta a panangsuportar dagiti klero ti mamagbalin iti dayta a pudno? Binilin ni Jesus dagiti pasurotna a mangbautisarda, saan a kadagiti maladaga, no di ket dagiti manamati a nasursuruan a mangaramid kadagiti amin a bilbilinna. Isu a mismo ket saan a maladaga no di ket “agarup tallopulo a tawenna” idi isut’ naitaneb kadagiti dandanum ti Karayan Jordan.​—Lucas 3:21-23; Mateo 28:19, 20.