Ti Kaiyulogan dagiti Damdamag
Aglalasin a Balay
Kinuna ni Jesus a “no ti maysa a balay aglalasin a maibusor met la kenkuana,” dinto mataginayon dayta a balay. (Marcos 3:25) Kastoy ti pakasarakan ti United Church of Canada, ti kadadakkelan nga Iglesia a Protestante iti nasion, iti bagina met laeng maipapan iti isyu ti homoseksualidad ken ti pannakaorden dagiti lallaki ken babbai a homoseksual.
Maysa a resolusion nga inanamongan ti maika-32 a General Council it United Church iti Canada ti nangipalubos kadagiti homoseksual nga agakem a kas klero. Sigun iti The Globe and Mail, maysa a pagiwarnak iti Canada, kuna ti resolusion nga aniaman ti seksual a kasasaadda, siasinoman “nga agkuna a mamati ken ni Jesu-Kristo ken agtulnog Kenkuana ket maawatda nga agbalin a naan-anay a miembro iti Iglesia,” ket “amin dagiti miembro iti Iglesia ket maikarida a maibilang a maipaay iti pannakaorden iti ministerio.” Maysa a 125-panid a report ti United Church kunaenna: “Addada nagduduma a seksual a kasasaad: homoseksual, biseksual, heteroseksual. Dagitoy masapul a matmatan a kas gagangay a sagut manipud iti Dios.”
Iti panagkomentona maipapan iti pangngeddeng ti iglesia a mangawat kadagiti homoseksual a kas klero, inlawlawag ti Globe a “ti nasaknap nga isyu isu ti pannakalasat ti iglesia.” Nanipud idi 1972, ipalgak dagiti report, ti iglesia kankanayonen ti pannakapukawna kadagiti miembrona ket addaanen iti parikut iti pinansial. Ti rason? Insitar ti klero a ni John Tweedie “ti agtultuloy nga iruruar dagiti tattao manipud iti iglesia ta makitkitada dayta nga umad-adayo manipud kadagiti Nakristianuan a nagtaudanna.” “Gapuna,” kuna ti The Post iti Canada, “ti panangawatda kadagiti bambanag a kas ti homoseksualidad, ti panagdenna iti ruar iti singgalut ti panagasawa, aborsion no kalikaguman, ken ti mabalin a mawaswas a panagasawa ket maysa a panangawis iti agtutubo a kaputotan.”
Nupay kasta, ti kadi panagtulnog ken Kristo ipalubosna ti panangikompromiso kadagiti prinsipio ti Biblia? Maisuppadi iti dayta, nalawag ti Sao ti Dios: “Dikay koma allilawen ti bagiyo met laeng; dagiti imoral a tattao. . . dagiti managdakdakes a homoseksual. . . awan kadagitoy ti agtawidto iti Pagarian ti Dios.”—1 Corinto 6:9, 10, Today’s English Version.
Panangusar iti Pagbaot
“Iliklikyo ti Pagbaot, ngem Paliiwenyo ti Pagbanaganna” isu ti paulo ti maysa nga artikulo a nagparang iti The Natal Mercury, maysa a pagiwarnak iti Sud Africa, nga agsensennaay iti moderno a pagannayasan a panangiliklik iti pisikal a panangdusa kadagiti ubbing idiay pagtaengan ken idiay eskuelaan. Sino ti makinrebbeng iti daytoy a nagbalbaliw a kababalin iti panangbaot? Ni Propesor Smythe, maysa a pediatrician idiay University of Natal, Sud Africa, ti direkta a mangpabasol kadagiti sikologo dagiti ubbing. “Gagangay iti panangsukimat iti nagtaudan ti emosional nga isyu,” inlawlawag ni Smythe, “masarakan ti maysa ti panagbalbaliw iti kababalin a mangrugi iti sikolohikal a sursuro. Iti damo siraranggas dayta a maibusor iti aniaman a porma iti pisikal a panangdusa, kalpasanna gaput’ masdaaw iti pagbanagan iti saan a panangdisiplina nga agbanag iti pammati nga awan ti pannakapaay ken awan ti pananglapped.”
Intandudo ni Smythe ti kinatimbeng. “Ti panaglablabes iti kinalulok ket kas iti kinadakes ti panangdusa,” kunana, “ngem ti kinapudno a nalaklaka ti panangiremedio iti nalabes a panangdisiplina ngem ti kurang a panangdisiplina ad-adda nga anamonganna ti dasig ti panangdisiplina no adda panagduadua.” Ti propesor ipaganetgetna a ti motibo iti panangipaay iti pisikal a panangdusa ket isu koma ti naayat a pannakaseknan a maipaay iti pagimbagan ti ubing ita agdama ken iti masanguanan.
Ti kasta a balakad ket saan a kabbaro no di ket maysa a panagsubli iti di agbiddut a panangiwanwan ti Biblia: “Ti mangiliklik iti pagbaot kagurana ni anakna, ngem ti agayat kenkuana saplitenna a siannad.”—Proverbio 13:24; kitaenyo met ti Proverbio 23:13, 14.