Ti Kadi Biblia Pudpudno a Sagut Manipud iti Dios?
“MAMATIAK a ti Biblia ti kasasayaatan pay laeng a sagut nga inted ti Dios iti tao.” Daytat’ sasao nga inyebkas ni Abraham Lincoln, ti maika-16 a presidente ti Estados Unidos.a Isut’ saan nga agmaymaysa iti panangapresiarna iti daytoy daanen a libro.
Ti maika-19-siglo nga estadista a Briton a ni William E. Gladstone insaona: “Ti Biblia ket mailadawan a maysa nga Espesialidad ti Namunganayan, ket ti maysa a di marukod a distansia ilasinna dayta manipud amin a sabsabali pay a libro.” Iti umas-asping a kapanunotan, ti maika-18-siglo nga estadista nga Americano a ni Patrick Henry kinunana: “Ti Biblia ket napatpateg ngem ti amin a sabsabali pay a libro a naimalditen.” Nalawag a napagsiddaaw babaen kadagiti Kasuratan, ni emperador a Pranses a Napoléon Bonaparte inkumentona: “Ti Biblia ket saan a maysa a gagangay a libro, ngem maysa a Nabiag a Parsua, nga addaan bileg a mangparmek amin a bumusor iti dayta.”
Kadagiti dadduma, ti Biblia ket naggubuayan ti tulong ken liwliwa. Ti heneral ti American Confederate a ni Robert E. Lee insaona: “Kadagiti amin a pakariribukak ken pakarigrigatak, pulos a di napaay ti Biblia a nangipaay kaniak ti lawag ken bileg.” Ken gapu iti panangapresiarna itoy a libro, kinuna ni John Quincy Adams a presidente ti E.U.: “Iti adun a tawtawen pinagbalinkon nga ugalik ti panangbasa ti intero a Biblia iti maminsan iti tunggal tawen.”
No ti Kangatuan Amin intedna ti Biblia iti sangatauan, rebbeng nga adda ebidensia a daytat’ nadiosan ti pannakaipaltiingna. Rebbeng a daytat’ natantan-ok ngem iti aniaman a sabali pay a libro. Ket tapno ti Biblia agbalin a pudpudno a gubuayan ti bileg ken pannakaisuro, masapul a daytat’ naan-anay a mapagtalkan. Gapuna, ngarud, adda pay maysa a saludsod, Pudno aya a ti Biblia sagut manipud iti Dios? Sumaganad nga intay sapulen ti sungbat iti dayta a saludsod.
[Footnote]
[Dagiti ladawan iti panid 3]
William E. Gladstone
[Credit Line]
Retrato ti U.S. National Archives
Abraham Lincoln
[Credit Line]
Retrato ti U.S. National Archives
Patrick Henry
[Credit Line]
Harper’s U.S. History
Napoléon Bonaparte
[Credit Line]
Inkur-it ni E. Ronjat
John Quincy Adams
[Credit Line]
Harper’s U.S. History
Robert E. Lee
[Credit Line]
Retrato ti U.S. National Archives