Agsaknap iti Intero a Lubong dagiti Bendision ti Edukasion iti Gilead
LIMITADO laeng ti pateg ti edukasion iti daytoy daan a lubong. Yantangay naibatay a nangnangruna kadagiti natauan a kapanunotan imbes nga iti kinapudno ti Dios, saan a makaited ti pudpudno a panggep iti biag. Ngem naiduma ti Eskuelaan ti Gilead. Iti panglukat a sasaona iti panagturpos ti maika-93 a klase ti Gilead, inyunay-unay ni Theodore Jaracz iti Bagi a Manarawidwid a mangipapaay daytoy nga eskuelaan iti edukasion nga addaan pudpudno a pateg. Kas kunaen ti Salmo 119:160, “Ti pakadagupan ti sao [ti Dios] isu ti pudno.” Isu a kasta unay ti gagar ti agarup 6,000 a nagimdeng iti programa ti panagturpos idi Setiembre 13, 1992.
Ti umuna a palawag iti agsapa, nga imparang ni Lon Schilling iti Watchtower Farms Committee, ket napauluan “Itultuloyyo a Parmeken ti Lubong ken ti Agturayna.” Sinalaysay ni Kabsat Schilling ti Apocalipsis 12:11 ket inlawlawagna a ti bersikulo ipakitana ti tallo a wagas ti panangparmek: (1) babaen ti dara ti Kordero, (2) babaen ti panangpaneknek, ken (3) babaen pannakaadda iti espiritu ti panagsakripisio. Pinalagipanna dagiti estudiante nga adu kadagiti adipen ni Jehova ti nangipakita iti kasta nga espiritu ken situtulokda pay a matay tapno maitalimeng ti kinasungdo ken kinatarnawda.
“Saluadan ti Nasayaat a Talekyo” ti tema a binukel ni John E. Barr iti Bagi a Manarawidwid. Iti nadungngo a timekna, inyarigna ti talek nga adda iti nagbaetan ni Jehova ken dagiti adipenna iti talek a mapatanor iti nasayaat a panagasawa. Babaen ti panangusarna kadagiti punto manipud 2 Timoteo 1:12, 13, ginutugotna dagiti estudiante a saluadanda ti naitalek kadakuada babaen ti panangipateg iti “pagwadan dagiti nasayaat a sao” iti Biblia. Indagadagna a masapul nga iramanda ti personal a panagadal iti inaldaw nga iskediolda ken siaanus a binalakadanna dagiti estudiante a saanda pulos koma palubosan dagiti komentoda kadagiti gimong nga agbalin a gagangay laeng no di ket kanayon koma a nabagas.
Impaay ni William Van De Wall iti Service Department Committee ti sumaruno a palawag, “Ipakitayo ti Naayat a Pannakaseknan kadagiti Kimmarnero a Tattao.” Sinaludsodna kadagiti estudiante no ania ti sapulenda iti maysa a doktor ti pamilia ket ginutugotna ida a mangsukay iti umasping a pannakipagrikna ken asi a tagipatgenda.
Sibabara a nagsarita ni Daniel Sydlik iti Bagi a Manarawidwid iti tema nga “Amin a Banag ket Posible iti Dios.” Pinalagipanna dagiti estudiante a kinatawaan da Abraham ken Sara ti kasla imposible a gundawayda a maaddaan iti anak idinto ta lakay ken baketdan. Adu kadagiti kari ti Dios ti kasla imposible iti panangmatmat ti tao; ngem kas insaludsod ti anghel ken ni Abraham, “adda aya banag a narikut unay ken Jehova?” (Genesis 18:14) Pinaregta ni Kabsat Sydlik dagiti estudiante nga ipakitada ti pammati iti pannakabalin ti Dios a mangaramid iti imposible, a dida pulos ipalubos nga agkupas wenno agalla-alla dayta a pammati, uray ania a suot ti masabetda.
Mangbalakad dagiti Instruktor
Dagiti dua nga instruktor ti Gilead ti simmaruno a nagsarita. Umuna, binukel ni Jack D. Redford ti tema a “Panangaramid ti Naimbag a Nagan iti Dios.” Kinunana a ti mamagbalin iti nagan a naimbag wenno dakes isu ti tao a mangaw-awit iti dayta. Pinaggidiatna dagiti nagan da Adan, Nimrod, Jezabel, Saul, ken Judas kadagiti nagan da Noe, Abraham, Ruth, Pablo, ken Timoteo. Naimbag ti pakasarsaritaan dagitoy bayat ti panagbiagda. Sinaludsodna kadagiti estudiante no ania a kita ti nagan ti kayatda a maadda kadakuada iti 10, 100, wenno 1,000 pay ketdi a tawen—managlusulos wenno managtanabutob wenno matalek a misionero? Binalakadanna ida a dagiti solusion ken kalat ti panunotenda a nangnangruna a saan ket a dagiti parikut.
“Kasano Kasayaat ti Panangsaluadyo iti Pammatiyo?” ti makasukisok-panunot a tema a binukel ni Ulysses V. Glass. Inyarigna ti natibker a pammati iti nasayaat a compass a kanayon a nakatudo iti umiso a direksion. Mabalin a maapektaran ti compass iti lugan babaen kadagiti dadduma a magnetiko a tay-ak malaksid iti daga, ket masapul a mapagbalin a neutral dagita a tay-ak. Umasping iti dayta, mangpatpataud daytoy daan a lubong ti adu nga impluensia a mangisin wenno mangpakapsut iti pammatitayo no palubosantay dagita. Bayat a pinagannadna kadagiti estudiante kadagita nga impluensia, kinomendaran met ida ni Kabsat Glass gapu iti panangikabilanganda kadagiti kababalin ken rikrikna dagiti sabsabali.
Ti maudi a palawag iti agsapa ket imparang ni Albert D. Schroeder, kameng ti Bagi a Manarawidwid. Pinaregtana dagiti estudiante a “Taginayonen ti Espiritu ti Panagmisionero,” a kinomendaranna ida gapu iti panangipakitada iti umasping nga espiritu ti panagmisionero a kas iti umuna a klase idi 1943, idi isu ti registrar ti eskuelaan. Impabigbigna a nasanayda a makilangen kadagiti tattao, kaay-ayoda ti mangasaba, a tarigagayanda ti paidalan iti espiritu ti Dios. Ginutugotna ida nga itultuloyda a parayrayen dayta nga espiritu, nga usarenda a naimbag ti New World Translation iti personal a panagadal. Kas pangserra, bersikulo-por-bersikulo a sinalaysayna ti Salmo 24 kas ehemplo.
Kalpasanna, nagraduar met laengen dagiti estudiante ti Gilead! Naiyawat kadakuada dagiti diplomada bayat a maibasbasa iti napigsa ti pakaibaonanda, a dinanggayan ti naaweng a palpalakpak manipud kadagiti timmabuno.
Iti malem, indauluan ni Calvin Chyke iti Factory Committee ti Panagadal ti Pagwanawanan. Simmaruno ti makaay-ayo a programa dagiti estudiante a nangiparang kadagiti kapadasanda iti tay-ak bayat ti lima-bulan a kurso ken naipabuya met dagiti slide ti dadduma kadagiti pagilian a nakaitudinganda. Mainayon pay, nainterbiu iti nataenganen nga agassawa, ket inramanda ti dadduma a sirib ken kapadasan a nagun-odda iti adu a tawen a panagserbida kas misionero. Nagngudo ti malem iti naintiempuan a drama a napauluan Dikay Koma Maallilaw wenno Rabaken ti Dios.
Naragsak a pimmanaw dagiti timmabuno, a naay-ayoda a makakita iti maaramidan ti edukasion iti kinapudno ti Dios ken makaammo nga agtultuloy nga agsaknap iti intero a lubong dagiti gunggona ti kasta nga edukasion. Bayat ti panagsisina dagitoy 48 a misionero nga agturong kadagiti destinoda, adu a kararag ti sumurot kadakuada, a mangiyeb-ebkas ti naimpusuan a namnama ken panagtalek nga agbalin dagitoy matalek a misionero a bendision kadagiti tattao ti Dios sadinoman ti papananda.
[Kahon iti panid 19]
Estadistika iti Klase
Bilang ti nairepresentar a pagilian: 7
Bilang dagiti pagilian a nakaitudingan: 18
Bilang dagiti estudiante: 48
Bilang dagiti naasawaan: 24
Promedio nga edad: 32.8
Promedio a tawen iti kinapudno: 15.3
Promedio a tawen iti amin-tiempo a ministerio: 10.4
[Kahon iti panid 20]
DAGITI NAGTURPOS ITI KLASE TI GILEAD EXTENSION
Idi Hunio 21, 1992, maysa a grupo dagiti 24 a misionero ti nagturpos iti maikapat a klase ti Gilead Extension School idiay Selters/Taunus, Alemania. Ti klase, a buklen ti 11 a naasawaan ken 2 nga awan asawana a kakabsat a babbai a naggapu iti pito a pagilian, ket addaan iti promedio nga edad a 32, 14 a tawen nanipud pannakabautisar, ken 8.5 a tawen a panagserbi iti amin-tiempo a trabaho a panagebanghelio. Nasurok a 2,000 ti timmabuno iti panagturpos.
Linuktan ni Kabsat Jaracz ti programa babaen ti panangsalaysayna iti Proverbio 11:24, a kunana: “Adda agiburay ket sumanikua pay ketdi.” Kinunana nga iti mabiit maiburayton dagiti estudiante ket sigurado nga agbunga daytoy iti irarang-ay.
Dagiti makaparegta a nainkasuratan a palawag ket imparang da Richard Kelsey, coordinator ti Branch Committee ti Alemania; Wolfgang Gruppe iti Service Department; Werner Rudtke ken Edmund Anstadt, a kamkameng met ti Branch Committee; ken dagiti dua nga instruktor, da Dietrich Förster ken Lothar Kaemmer. Impaay ni Albert Schroeder iti Bagi a Manarawidwid ti makapainteres a tampok a diskurso a napauluan “Itultuloyyo ti Mangbiruk kadagiti Naespirituan a Gameng.” Ti tampok ti programa isu ti pannakaiyawat ti destinoda iti 11 a pagilian idiay Africa, Central America, ken Makindaya nga Europa, kalpasanna imbasa ti maysa a nagturpos ti surat ti klase a naiturong iti Bagi a Manarawidwid a mangiyeb-ebkas iti naimpusuan a panagyaman.
[Ladawan iti panid 18]
Maika-93 a Nagturpos a Klase iti Watchtower Bible School of Gilead
Iti listaan iti baba, nabilangan dagiti binatog manipud sango nga agpalikud, ket dagiti nagan nailistada manipud kannigid nga agpakannawan iti tunggal binatog.
(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.