Dagiti Saludsod Manipud Kadagiti Managbasa
Aniat’ rebbengen dagiti Kristiano iti panangpabannayat iti pannakamulit ti aglawlawtayo—daga, baybay, ken angin?
Kas Saksi ni Jehova, maseknantay unay kadagiti adu nga ekolohikal a parikut a mangap-apektar ita iti daga a pagtataengantayo. Ad-adda nga apresiarentayo ngem ti kaaduan a tattao a ti daga ket naparsua tapno agbalin a nadalus, makapasalun-at a pagtaengan ti perpekto a natauan a pamilia. (Genesis 1:31; 2:15-17; Isaias 45:18) Impanamnama met ti Dios kadatayo a ‘dadaelennanto dagidiay mangdaddadael iti daga.’ (Apocalipsis 11:18) No kasta nainkalintegan laeng ti mangaramid ti natimbeng, rasonable a panagregget a liklikan ti panangpakaro iti agtultuloy a panangrarit ti tao iti lubongtayo. Nupay kasta, imutektekanyo ti sao a “rasonable.” Nainkasuratan a maitutop met a saan koma a napalalo ti pannakaseknantayo kadagiti ekolohikal nga isyu ken aramid.
Uray ti normal a panagbiag ti tao ket mamataud kadagiti rugit. Kas pangarigan, ti panangpatubo, panangproseso, ken pannangan kadagiti produkto a taraon masansan a mamataud iti rugit, nupay kaaduan kadagitoy ti agrunot. (Salmo 1:4; Lucas 3:17) Mabalin a nangparnuay iti asuk, dapo, ken nagsiitan dagiti ikan nga intono ni napagungar a Jesus nga agpaay kadagiti adalanna. (Juan 21:9-13) Ngem nadisenio dagiti adda biagna ken awan biagna a sistema wenno siklo ti daga tapno maaramid a kasta.
Di rumbeng nga iyaleng-aleng dagiti tattao ti Dios dagiti ekolohikal a bambanag. Impaannurot ni Jehova iti nagkauna nga ilina ti panangibelleng kadagiti rugit, addang a napateg iti ekolohia ken salun-at. (Deuteronomio 23:9-14) Ket yantangay ammotayo ti panangmatmatna kadagidiay mangdaddadael iti daga, rumbeng a ditay liwayan dagiti banag a maaramidantayo tapno mataginayon a nadalus ti aglawlaw. Maipakitatayo daytoy iti umiso a panangibelleng iti basura wenno rugit, kangrunaanna dagiti makasabidong a ramen. Sipipinget a makikooperartayo kadagiti recycling a programa aglalo no imbilin ni Cesar dagitoy. (Roma 13:1, 5) Ket mapnek dagiti dadduma iti panangala kadagiti kanayonan nga addang, a kas ti panangusar kadagiti nalaka nga agrunot a produkto imbes a dagiti mangnayon kadagiti nagabsuon a rugit iti daga ken iti uneg dagiti baybay.
Nupay kasta, maysa a personal a banag, malaksid no ipaalagad ti linteg, no kasano kasaknap ti panangsurot ti maysa a Kristiano iti daytoy a direksion. Nalawag manipud iti media a nakalaklaka nga agduyos dagiti imperpekto a tao iti kinamanaglablabes. Mayataday unay ti balakad ni Jesus: “Dikay agipato tapno dikayo maipato . . . Ket apay-apay matmatam ti puling nga adda iti mata ni kabsatmo, ket dika mabigbig ti pasanggir nga adda iti matam met laeng?” (Mateo 7:1, 3) Ti pananglaglagip iti daytoy nalabit tulongannatayo a sipapanunot iti sabali pay a napateg a banag.
Insurat ni mammadto Jeremias: “O Jehova, ammok a ti dalan ti tao saan nga agtaud kenkuana met laeng. Saan nga agtaud iti tao a magna ti panangiturong kadagiti addangna.” (Jeremias 10:23) Ti di panangikaskaso iti daytoy a prinsipio ti makagapu a naipasungalngal ti sangatauan iti “napeggad a panawen a narigat a pakilangenan,” kas mabasa idiay 2 Timoteo 3:1-5. Ket ti impairekord ti Dios idiay Apocalipsis 11:18 paneknekanna a saanto a naan-anay nga agballigi dagiti panagregget ti tao a mangrisut kadagiti dadakkel nga ekolohikal a parikut, agraman ti polusion, ditoy daga. Mabalin nga adda sumagmamano nga irarang-ay ditoy ken idiay, ngem ti laeng manayon a solusion isu ti ibaballaet ti Dios.
Gapuna ipamaysatayo dagiti panagreggettayo ken sanikuatayo iti solusion ti Dios, imbes nga ikagumaan nga alay-ayan dagiti akinruar a sintoma. No iti daytoy a banag, surotentayo ti ulidan ni Jesus, a nangbusbos iti kaaduan a paset ti ministeriona iti ‘panangpaneknek iti kinapudno.’ (Juan 18:37) Imbes a pinakanna ti lubong wenno inalay-ayanna ti nasaknap a saksakit ti kagimongan—agraman ti polusion—intudo ni Jesus ti naan-anay a solusion kadagiti parikut a mangsapsaplit iti sangatauan.—Juan 6:10-15; 18:36.
Nupay tignayennatayo ti panagayat kadagiti pada a tao a lumiklik iti panangmulit iti daga, atmospera, wenno danum, itultuloytayo ti mangpaneknek iti kinapudno. Ramanenna daytoy ti panangisuro kadagiti tattao a mangiyaplikar iti kinapudno ti Biblia ket iti kasta maliklikan ti pannakadadael dagiti bagbagida babaen ti asuk, sobra nga alkohol, wenno dagiti makadangran a droga. Bayat a riniwriw a kabbaro ti nagbalin nga adalan, nasursuroda ti agbalin a nadalus ken maseknan kadagiti sabsabali. Isu a literal a makatulong ti trabaho a pangasaba iti panangkissay iti pangkaaduan a parikut ti polusion ita. Ngem ti napatpateg isu ti panangikagumaan dagiti Kristiano nga adalan a balbaliwan ti personalidad ken ug-ugalida ita tapno maikarida iti nadalus a Paraiso a daga nga asidegen nga itden ti Dios kadagiti pudno nga agdaydayaw kenkuana.