Pannakasarak iti Naan-anay a Solusion
TI Sao ti Dios, ti Biblia, saritaenna ti maysa a tiempo inton ti nailangitan a gobierno ti Dios narisutnanton ti amin a parikut ti sangatauan, nga ita iramanna ti parikut iti polusion gapu kadagiti lugan. Daytoy kadi Mesianiko a Pagarian, a naisuro iti adu nga ikararagda, mangipaayto iti nasayaat a solusion babaen ti panangpataudna iti naan-anay nga awanan iti polusion a lugan? Wenno maibanagto kadi ti nasayaat a solusion babaen ti pannakaikkat ti amin a de motor a lugan iti daga? Yantangay awan ti eksakto nga isungbat ti Biblia kadatayo, awan ti maaramidantayo no di ti basta aguray ket kitaento.—Mateo 6:9, 10.
Ngem masiguradotayo daytoy: Saanto a palubosan ti gobierno ti Dios ti polusion a mangdadael iti kinapintas ti nakaparsuaan iti naisubli a Paraiso nga iyegto ti Pagarian.—Isaias 35:1, 2, 7; 65:17-25.
Tangay masansanayen dagidiay a mangipangag iti Sao ti Dios maipaay iti biag iti awanan ti polusion a baro a lubong, aniat’ rumbeng a mariknada maipapan iti panangusar kadagiti lugan ita? Tinaming ti Agriingkayo! a Hunio 22, 1987, ti tema nga “Aniat’ Mapaspasamaken kadagiti Kabakirantayo?” Impadamagna a pagarupen ti dadduma a sientista nga adda pakainaigan dagiti mangmulit iti angin nga adda kadagiti tambutso ti lugan ken dagiti matmatay a kabakiran. Daytoy ti nangtignay iti maysa a maseknan a managbasa nga agsurat iti Watchtower Society nga agim-imtuod no gapu iti daytoy a kinapudno umiso para kadagiti Kristiano ti agmaneho iti kotse. Pampanunotenna no ti panangaramid iti kasta ipakitana ti di panagraem iti panamarsua ni Jehova.
Nasungbatan ti suratna, iti pasetna, kas iti sumaganad: “Simamatalek a tungtungpalen dagiti Saksi ni Jehova dagiti paglintegan ti aglawlaw nga impaulog dagiti agtuturay ti gobierno tapno makissayan ti polusion. (Roma 13:1, 7; Tito 3:1) Ti panangaramid iti addang a nalablabes ngem ti kalikaguman ti gobierno ti ikeddeng ti indibidual. No ikeddeng ti maysa ti saanen a panagmaneho iti kotse, adda kenkuana daytan. Nupay kasta, impakita ti artikulo ti Agriingkayo! no kasano ti panagrikna ti dadduma a tattao, babaen ti panagkunana iti panid 8: ‘Adu ti mangar-aramid kadagiti praktikal nga addang a mangpabassit iti panangrugit ti angin iti kalalainganna. Nabambannayaten ti panagmanehoda, basbassiten ti panagbiaheda, makiluglugandan, mangus-usardan iti awan bulína a gasolina, ken tungtungpalendan dagiti pagalagadan nga ipapaalagad ti gobierno a maibusor iti pannakarugit ti angin.’”
Nakristianuan a Kinatimbeng
Imparangarang daytoy a sungbat ti Nakristianuan a kinatimbeng. Masapul a laglagipen a saan laeng a dagiti kotse ti mangmulmulit. Dagiti eroplano ken tren—kinapudnona, kaaduan a moderno a pamay-an ti transportasion—mangmulitda. Ngem dagitoy a kita ti transportasion saanda a napataud gapu iti nalawag a panggep a mangmulit. Ti resultana a polusion ti maysa a dakes nga epektona, nakalkaldaang ngem maigapu iti limitado a pannakaammo ken dagiti imperpekto a kababalin.
Sinalaysay Ti Pagwanawanan nga Enero 1, 1993, panid 31, daytoy a banag, a kunkunana: “Kas Saksi ni Jehova, maseknantay unay kadagiti adu nga ekolohikal a parikut a mangap-apektar ita iti daga a pagtataengantayo. Ad-adda nga apresiarentayo ngem ti kaaduan a tattao a ti daga ket naparsua tapno agbalin a nadalus, makapasalun-at a pagtaengan ti perpekto a natauan a pamilia. (Genesis 1:31; 2:15-17; Isaias 45:18) . . . No kasta nainkalintegan laeng ti mangaramid ti natimbeng, rasonable a panagregget a liklikan ti panangpakaro iti agtultuloy a panangrarit ti tao iti lubongtayo. Nupay kasta, imutektekanyo ti sao a ‘rasonable.’ . . . Di rumbeng nga iyaleng-aleng dagiti tattao ti Dios dagiti ekolohikal a bambanag. Impaannurot ni Jehova iti nagkauna nga ilina ti panangibelleng kadagiti rugit, addang a napateg iti ekolohia ken salun-at. (Deuteronomio 23:9-14) Ket yantangay ammotayo ti panangmatmatna kadagidiay mangdaddadael iti daga, rumbeng a ditay liwayan dagiti banag a maaramidantayo tapno mataginayon a nadalus ti aglawlaw. . . . Nupay kasta, maysa a personal a banag, malaksid no ipaalagad ti linteg, no kasano kasaknap ti panangsurot ti maysa a Kristiano iti daytoy a direksion. . . . Nakalaklaka nga agduyos dagiti imperpekto a tao iti kinamanaglablabes. . . . Saanto a naan-anay nga agballigi dagiti panagregget ti tao a mangrisut kadagiti dadakkel nga ekolohikal a parikut, agraman ti polusion, ditoy daga. Mabalin nga adda irarang-ay ditoy ken idiay, ngem ti laeng manayon a solusion isu ti ibaballaet ti Dios. Gapuna ipamaysatayo dagiti panagreggettayo ken sanikuatayo iti solusion ti Dios, imbes nga ikagumaan nga alay-ayan dagiti makinruar a sintoma.”
Natimbeng dagiti Kristiano bayat nga alagadenda dagiti prinsipio ti Biblia, a laglagipenda ti nadiosan a komision nga inawatda a mangikasaba iti mensahe ti Pagarian ti Dios iti intero a lubong. (Mateo 24:14) Awanen ti napatpateg wenno nagangganat pay! No makatulong ti moderno a pamay-an ti transportasion ken komunikasion kadagiti Kristiano a mangtungpal iti daytoy nga obligasion, addaanda iti amin a rason a mangusar kadakuada. Maigiddato a liklikanda ti awan arnasna wenno inggagara a panangmulit. Iti kasta salimetmetanda ti naimbag a konsiensia agpadpada iti imatang ti tao ken iti Dios.
Gapuna nupay no datayo ita pudno a ditayo ammo no kasano a masolbarto kamaudiananna ti parikut iti polusion ken lugan, ammotayo a masolbarto. Kinapudnona, asideg unayen ti nasayaat a solusion.
[Kahon iti panid 9]
Pannakidangadang iti Polusion
• Pannagna wenno panagbisikleta no mabalin
• Pannakilugan
• Kanayon a panangmantener iti kotse
• Sipapanunot iti nadalus a gasolina
• Liklikan ti di kasapulan a panagbiahe
• Panagmaneho iti kalalainganna a kapartak a di agbaliwbaliw ti kapartak
• Panangusar iti transportasion ti publiko no posible ken rasonable
• Panangiddep iti makina imbes nga agan-andar latta iti uray ania a kawatiwat ti tiempo