Panangikkat ti Rugit iti Puso ken Panunot

SAAN nga inikkan ni Jehova dagiti tao iti tarigagay a mangrugit wenno mangdadael iti urnos. Nadisenio ti planeta a pagtaenganda a maysa a paraiso a nadalus, naurnos, ken napintas. Saan a pinanggep ti Dios nga agbalin dayta a naalas a pagbasuraan.​—Genesis 2:8, 9.

Nupay kasta, kalpasan ti panangilaksid ti tao iti panangiwanwan ti Dios, rinugianna nga ipasdek ti bukodna nga urnos iti lubong. Gapu ta awanan iti nadiosan a sirib ken kurang iti kapadasan, pinalpalarananna no ania ti kasayaatan a wagas ti panagbiag. Pasingkedan ti sekular a historia a pudno ti kuna ti Biblia nga awan ti tao a makaituray a sibaballigi iti bagina; iti rinibon a tawen, ti “tao addaan pannakabalin iti sabali a maipaay iti pagdaksanna.” (Eclesiastes 8:9; Jeremias 10:23) Dagiti nagduduma a kita ti kinarugit iti agdama ket bunga ti di umiso a panangituray ti tao.

Panangakseptar iti Panangmatmat ti Dios

Pagreggetan dagiti agtarigagay a mangay-ayo iti Dios ti agbiag a maiyannurot kadagiti pagalagadan ti Namarsua iti kinadalus. Gapuna, naipasango dagiti Saksi ni Jehova iti problema idi naituding a maangay ti maysa nga internasional a kumbension idiay Prague, Czechoslovakia, idi ngalay ti 1991.a Agarup 75,000 a tao ti tumabuno, maysa nga umariwekwek a malaon ti Strahov Stadium. Ngem lima a tawenen a saan a nausar ti stadium. Kasla din mabalin nga usaren gapu ta dinadael ti naranggas a panawen. Nasurok a 65,000 nga oras ti binusbos dagiti agarup 1,500 a Saksi ni Jehova iti panangtarimaan ken panangpintura iti dayta. Idi panawenen ti kumbension nakasaganan ti nadalus nga stadium a maipaay iti panagdayaw iti pudno a Dios, ni Jehova.

Aniat’ mangtignay kadagiti Saksi ni Jehova nga agbalin a naiduma, bayat nga ipakpakita ti kaaduan ditoy lubong ti bassit a panangipateg iti kinadalus ken kinaurnos? Ti panangapresiar iti balakad ti Biblia a masapul nga ikkaten dagiti Kristiano dagiti dakes a kababalin, kas ti panagimbubukod, kinaawan konsiderasion, kinaagum, ken kinaawan panagayat. “Uksobenyo ti daan a personalidad agraman dagiti aramidna,” kuna ti Biblia. Isukatyo ti “baro a personalidad, isu a mapabpabaro babaen ti umiso a pannakaammo nga umasping iti Daydiay namarsua kenkuana.” Awan lugar iti maysa a personalidad a mangipatpateg iti kinadalus, kinaurnos, ken pintas dagiti kababalin a mangrugit.​—Colosas 3:9, 10; 2 Corinto 7:1; Filipos 4:8; Tito 2:14.

Kalikaguman ti baro a personalidad a dagiti Kristiano masapul a maseknanda iti polusion, a saanda nga igaggagara ti mangrugit wenno manglabsing kadagiti linteg ti gobierno kontra iti polusion. Lapdanna ida nga agbalin a managiwara, agimbubukod, ken nasadut. Ti panangrespeto iti sanikua dagiti sabali lapdannatayo a mangsuratsurat iti dayta a sanikua, kas pagraragsakan man, wenno kas maysa a kita ti arte. Masapul a nadalus ti pagtaengan, kotse, kawes, ken bagi.​—Idiligyo ti Santiago 1:21.

No maipapan kadagidiay madi a mangikawes iti baro a personalidad, mababalaw aya ti Dios iti dina pananganamong kadakuada nga agbiag iti mapasungad a Paraiso? Ay ket saan. Siasinoman nga addaan pay laeng kadagiti pagannayasan a mangrugit a nakalemmeng iti puso wenno panunotna dadaelenna laeng ti pintas ti maipasdek a paraiso iti planeta a Daga, iti pagladingitan dagiti agtarigagay a mangtaginayon iti dayta. Nalinteg ken naayat ti panggep ti Dios a “mangdadael kadagidiay mangdaddadael iti daga.”​—Apocalipsis 11:18; 21:8.

Aktibo a Pannakipaset?

Nupay kasta, kayat kadi a sawen daytoy a masapul nga aktibo dagiti Kristiano a makipaset kadagiti programa a panagdalus wenno kontra iti polusion?

Nalawag a makadangran ti polusion iti salun-at ken kinatalged dagiti tao. Maseknan ni Jehova kadagita a bambanag, kas ipamatmat dagiti linteg nga intedna kadagiti Israelitas. (Exodo 21:28-34; Deuteronomio 22:8; 23:12-14) Ngem nikaanoman a binilinna ida nga allukoyenda dagiti dadduma nga agtungpal kadagiti paglintegan iti kinatalged ti publiko; ket saan met a naibilin kadagiti Kristiano idi umuna a siglo nga aramidenda ti kasta.

Itatta, nalaka laeng nga agbalin nga isyu iti politika dagiti bambanag a mainaig iti aglawlaw. Kinaagpaysona, sumagmamano a partido ti politika ti nabuangay nga addaan panggep a mangrisut kadagiti parikut iti aglawlaw. Saanen a maikuna a neutral ti Kristiano a makidasig kadagita nga isyu iti politika. Nangidatag ni Jesus iti prinsipio kadagiti adalanna: “Saanda a paset ti lubong a kas met kaniak a saanak a paset ti lubong.” Ti Kristiano a di mangitaltalek iti dayta a pagannurotan idasdasigna ti bagina kadagiti “agturay daytoy a sistema dagiti bambanag, isuda a mapukawto.”​—Juan 17:16; 1 Corinto 2:6.

Saan a pinadas ni Jesus a risuten dagiti amin a sosial a parikut idi kaaldawanna; ket dina met binilin dagiti adalanna nga aramidenda ti kasta. Ti imbilinna kadakuada isu daytoy: “Inkayo ngarud ket pagbalinenyo nga ad-adalan dagiti amin a nasion, a bautisaranyo ida . . . , nga isuroyo kadakuada ti amin a bambanag nga imbilinko kadakayo.” Awan ti imbilinna kadakuada maipapan kadagiti pagalagadan iti panangsaluad iti aglawlaw.​—Mateo 28:19, 20.

Iti panangilawlawagna no aniat’ rumbeng nga iyun-una ti maysa a Kristiano iti biagna, kinuna ni Kristo: “Itultuloyyo ngarud a biruken nga umuna ti pagarian ken ti kinalintegna.” (Mateo 6:33) Inton ipatungpal ni Jehova dagiti nalinteg a prinsipiona iti intero a daga babaen ti Mesianiko a Pagarian, agnanayon a maikkatton dagiti parikut iti aglawlaw iti pakapnekan ti amin.

Gapuna, natimbeng ti takder dagiti Saksi ni Jehova. Kas ipakita ti Roma 13:1-7, masapul a sipapasnek a tungpalenda dagiti linteg ti gobierno iti panangsaluad iti aglawlaw. Mainayon pay, ti nadiosan a panagayat iti kaarruba tignayenna ida a mangrespeto iti sanikua dagiti sabali​—publiko wenno pribado​—babaen ti saan a panangperdi iti dayta ken saan a panangiwara iti rugit. Ngem silalawag a saanda a nabilin nga idauluanda dagiti nailubongan a programa a panagdalus. Nainkalintegan nga ipangpangrunada ti panangikaskasaba ti mensahe ti Pagarian ti Dios, ta ammoda a daytoy ti mangipaay iti agnanayon a pagimbagan.

Naespirituan a Panagdalus

Maulit-ulit a naballaagan dagiti nagkauna nga Israelitas maipapan iti pagbanaganda no rugitanda ti daga babaen ti panangibukbok iti dara, babaen ti imoral a panagbiag, wenno babaen ti di panagraem kadagiti sagrado a bambanag. (Numeros 35:33; Jeremias 3:1, 2; Malakias 1:7, 8) Paliiwenyo a makondenarda gapu itoy naespirituan a kinarugit, a saan ket a gapu iti pisikal a kinarugit a mabalin a nakairamananda met.b

Gapuna, ti naespirituan a polusion wenno kinarugit ti kangrunaan a liklikan ita dagiti Kristiano. Maaramidanda daytoy babaen ti panangikawesda iti “baro a personalidad,” a mangikkat kadagiti pagannayasan a mangrugit nga adda iti puso ken panunot. Nasurok nga uppat a milion a Saksi ni Jehova ti magunggonaan iti daytoy naespirituan a panagdalus, a mabigbigbigda a nadalus iti relihion ken iti moral, kasta met iti pisikal.​—Efeso 4:22-24.

Itan ti panawen para iti kampania a naespirituan a panagdalus. Sumarunonto iti naituding a panawen ti pisikal a panagdalus iti intero a daga ket salbarennanto ti taengtayo manipud iti panagbalinna a sangalubongan a pagbasuraan babaen ti panangipaayna iti nadalus nga aglawlaw a kaikarianna.​—Eclesiastes 3:1.

[Dagiti Footnote]