Agragsakkayo iti Nadalus a Daga nga Asidegen!

ANIAN a ragsaktayo a ni Jehova, Dios ti urnos ken kinadalus, tungpalennanto ti orihinal a panggepna a pagbalinen ti daga a maysa a sangalubongan a paraiso! (Isaias 11:6-9) Inkarina: “Ti sao a rummuar iti ngiwatko . . . dinto agsubli kaniak nga awan ti pagmamaayanna, no di ket tungpalennanto ti pagayatak.” “Di mabalin nga agulbod ti Dios,” gapuna a mapagtalkan dagitoy a sasao.​—Isaias 55:11; Hebreo 6:18.

Mabang-arantayo ta siaayat a bumallaetto ni Jehova sakbay a ti polusion a pinarnuay ti tao dadaelenna a naan-anay ti ekolohia!​—Apocalipsis 11:18.

Ikkatento ni Jehova dagiti di agbabawi, sipapakinakem nga agrugrugit ken dagiti nasukir a tattao a di mangikankano kadagiti prinsipiona iti kinaurnos ken kinadalus. Awanto ti mapalubosan a mangperdi iti maipasdek a Paraiso.​—Proverbio 2:20-22.

Bayat ti panagturay ti Pagarian ti Dios, iti sidong ti panangiwanwan ni Kristo Jesus, masursuruanto dagiti tao no kasano ti panangikkat iti aniaman a nabati a pagtaudan ti pisikal a kinarugit. Iti daytanto a tiempo​—saan nga ita​—nga obligado dagiti amin nga adipen ti Dios maysa a siaaktibo a makiraman iti personal ken ragup a panagregget a tumulong iti awan kapadana a sangalubongan a panagdalus.​—Idiligyo ti Ezequiel 39:8-16.

Makiramanto dagiti makalasat iti panungpalan ti agdama a dakes a sistema dagiti bambanag iti daytoy programa a pisikal a panagdalus a buyogen ti isu met la a kinapasnek ken regget nga ipapaayda iti kampania a naespirituan a panagdalus itatta.​—Salmo 110:3.

Sigurado nga umay ti nadalus a daga, kalpasan ti kasaknapan a panagdalus nga ibanag ti Pagarian ti Dios. Maikkatto ti amin a kita ti kinarugit. Awanton makitayo a pasdek a nasuratsuratan. Awanton dagiti basura a botelia, lata, plastik a supot, chewing-gum ken balkot ti kendi, diario, ken magasin nga agkaiwara iti igid ti baybay wenno iti paraiso a disso.

Agragsakkayo iti nadalus a daga nga asidegen!

[Ladawan iti panid 7]

Makiramankayto aya iti mapasungad a sangalubongan a panagdalus?