No Apay a Rumbeng a Tumabunokayo
MAKAGUN-ODKAYO iti naespirituan a pannursuro iti uppat a makagunggona nga aldaw iti “Nadiosan a Panangisuro” a Kumbension Distrito. Idiay Estados Unidos laeng, nasurok a 150 kadagitoy a panagtataripnong ti naangay a nasaksakbay itoy a tawen. Kaaduanna, mangrugi ti programa iti Huebes iti 1:20 t.m. ken aggibus iti Domingo iti 4:10 t.m. Maitampok iti dadduma a kumbension dagiti report nga ipaay dagiti misionero, a natulongan nga agawid iti pagilianda para itoy naragsak nga okasion.
Nataengankay man wenno agtutubo—asawa a lalaki, asawa a babai, ama, ina, agtutubo, wenno ubing—makagun-odkayo iti pannursuro a maidatag iti nalawag, makaay-ayo a pamay-an a makagunggona kadakayo. Kas pangarigan, adu ita ti agsalsaludsod, Ania ti panggep ti biag? Iti agsapa ti Biernes, matagiragsakyo ti dumngeg iti pannakasalaysay daytoy a saludsod ken maragsakankayto iti maawatyo a mausaryo a tumulong kadagiti dadduma a makatarus iti dayta a suheto.
Iti malem ti Biernes, itampok ti programa dagiti paset a “Panangtaginayon iti Panagasawa,” “Aramidenyo ti Amin a Kabaelanyo Tapno Maisalakan ti Sangakabbalayanyo,” ken “Nagannak—Kasapulan Dagiti Annakyo ti Naipangruna a Pannakaasikaso.” Kalpasan unay dagitoy, maikkan iti espesipiko nga atension dagiti parikut a pakaipasanguan dagiti agtutubo ken no kasano a masarangetda dagitoy. Rumbeng a maparegtada iti moderno-aldaw a drama a napauluan Agtutubo a Silalagip iti Namarsuada Itan.
Iti Sabado, itampok ti programa ti padto ni Jesus maipapan iti maudi nga al-aldaw, nangruna ti sasaona a: “Maigiddatonto iti kalpasan ti rigat kadagita nga aldaw a ti init agsipngetto.” (Mateo 24:29) Kayatyo la ketdi a mangngegan no kaano a mangrugi ti rigat. Repasuen met ti programa iti Sabado ti pakasaritaan dagiti Saksi ni Jehova iti moderno a panawen ken ipakitana no ania ti nagapuananda.
Iti Domingo, salaysayen ti maysa pay a drama, a napauluan Dikay Maallilaw Wenno Rabrabaken ti Dios, ti karit iti kinatarnaw ti maysa a Kristiano gapu kadagiti popular a video ken musika ita. Itampok ti palawag publiko iti malem ti tema a “Makatulong a Pannursuro iti Napeggad a Panawentayo.” Aggibus ti programa iti pammagbaga nga “Itultuloyyo a Salimetmetan a Sititibker ti Nadiosan a Pannursuro.”
Sigurado a magunggonaankayo no tumabunokayo iti uppat nga aldaw! Naimpusuan a maawiskayo a tumabuno. Tapno masarakanyo ti lugar a kaasitgan iti pagtaenganyo, makiumankayo iti lokal a Kingdom Hall dagiti Saksi ni Jehova wenno agsuratkayo kadagiti manangipablaak iti daytoy a magasin wenno kitaenyo ti Disiembre 8 a ruar ti Agriingkayo!, a naglaon iti direksion dagiti lugar a pakaangayan dagiti amin a kumbension iti Filipinas.