Tabunuanyo ti “Nadiosan a Panagbuteng” a Kombension Distrito!
Nakaplanokay kadin a tumabuno iti “Nadiosan a Panagbuteng” a Kombension Distrito dagiti Saksi ni Jehova iti 1994? Awan duadua a magunggonaankayto iti kaaddayo iti tallo nga aldaw! Nasurok a 42 a kombension ti nayeskediul iti laeng Pilipinas, ket mabalin a maangayto ti maysa a kombension iti lugar nga asideg iti pagnanaedanyo.
Adda buteng a mangpakapsut iti tured ken mangdadael iti namnama; nupay kasta, iti agsapa ti Biernes, ilawlawag ti pannulbek a palawag ti kaipapanan ti nadiosan a panagbuteng ken salaysayenna ti adu a gunggona nga itden dayta. Kinapudnona, itampok ti intero a programa ti kombension dagitoy a gunggona.
Iti malem ti Biernes, mangngeganyonto no kasano a mapatibker ti nadiosan a panagbuteng ti panagasawa ken biag ti pamilia, kasta met no kasano a matulonganna dagiti agtutubo nga agtalinaed a natibker iti kinasungdoda iti Dios. Aggibus ti sesion iti malem babaen ti makaliwliwa a palawag a “Liwliwa Maipaay Kadagiti Napanawan.” Sigurado nga apresiarenyonto ti praktikal nga impormasion a maipaay kabayatan dayta a palawag a makatulong kadagidiay napukawan iti patpatgen gapu iti ipapatay.
Ipakita ti programa iti Sabado no kasano a mapatibker ti nadiosan a panagbuteng ti panangsurottayo iti panangidalan ni Jehova maipanggep iti kongregasion ken iti ministeriotayo. Iti palawag nga “Inaldaw a Basaenyo ti Sao ti Dios, ti Nasantuan a Biblia,” makaawat dagiti delegado kadagiti praktikal a singasing iti panagbasa ken panagadal iti Biblia. Aggibus ti programa iti Sabado babaen ti palawag iti makapainteres a tema nga “Asidegen ti Nakaam-amak nga Aldaw ni Jehova.”
Maitampokto iti programa iti Domingo ti palawag nga “Addanto Panagungar Dagiti Nalinteg.” Iti sumaruno a diskurso, “Maisalakan a Sibibiag iti Dakkel a Rigat,” mailawlawag ti nakaskasdaaw a kari ni Jesus maipanggep kadagidiay pulos a dinto matay.—Juan 11:26.
Aggibus ti sesion iti agsapa ti Domingo babaen ti mamagpanunot nga 40-minuto a drama a napauluan Dagiti Panagpili a Naipasango Kenka. Maipalagipto kadagiti tumabuno ti kaaldawan ni Josue ken mabuyadanto ti pannakailadawan ti natibker a pangngeddengna nga agserbi ken ni Jehova. Maiparangto met ti pannubok iti apuy idi kaaldawan ni Elias, ket adut’ leksion a maadaw kadagitoy a pasamak a makatulong kadagiti delegado a mangiparangarang iti nadiosan a panagbuteng kadagitoy a tiempo. Iti malem, maitampok iti kombension ti palawag publiko nga, “Apay nga Agbutengkayo iti Pudno a Dios Itan.”
Iplanoyo itan ti itatabunoyo. Tapno maammuanyo ti pakaangayan [ti kombension] a kaasitgan iti pagtaenganyo, makiumankayo kadagiti Saksi ni Jehova iti lokal a Kingdom Hall-da wenno agsuratkayo kadagiti manangipablaak iti daytoy a magasin. Nailanad met iti Disiembre 8 a ruar ti Agriingkayo! ti pakaangayan dagiti amin a kombension iti Pilipinas.