Report Dagiti Manangiwaragawag ti Pagarian
Panangraem iti Kinasagrado ti Biag
IPAKITA ti Biblia a ti dara ket sagrado iti imatang ti Dios ket kondenarenna ti di umiso a panangusar iti dayta. (Levitico 17:14; Aramid 15:19, 20, 28, 29) Gapu kadagitoy a bilin ti Biblia, saan nga agpayalison ti dara dagiti Saksi ni Jehova.
Tapno matulongan dagiti doktor ken dagiti kameng ti ospital a makatarus iti narelihiusuan a takder dagiti Saksi ni Jehova iti daytoy a banag ken maawatanda nga akseptaren dagiti Saksi dagiti sandi nga agas, nangorganisar ti Watch Tower Society kadagiti Hospital Liaison Committee (HLC) kadagiti nadumaduma a pagilian. Bisitaen dagiti miembro dagitoy a komite dagiti ospital tapno makisarita kadagiti mangngagas. Itay nabiit, nasurok a 200 a miting ti naangay kadagiti 12 a siudad idiay Poland, a pakairaman dagiti nasurok a 500 a doktor, kaaduanna dagiti mangimaton ti klinika wenno ospital. Napasamak ti sumaganad bayat ti maysa a kasta a panagbisita:
“Naballigi unay ti maysa a miting iti Cardio-Surgical Clinic idiay Zabrze. Nanipud pay idi 1986 a saan nga agus-usar iti dara dagiti mangngagas iti dayta a klinika no kasta nga operaanda dagiti kakabsattayo. Itatta, adda 40 a kasta nga operasion ti naaramiden. Sisasagana ti klinika nga umawat kadagiti pasiente iti intero a Poland ken kasta met iti sabali a lugar. Kalpasan ti 50-minuto a panagsasarita, inyam-ammo ti deputy head ti maysa nga ospital dagiti miembro ti HLC iti maysa a grupo dagiti pasiente ket kinunana: ‘Dagitoy a tattao ket Saksi ni Jehova. Makikooperarda iti klinikatayo, ken tumulongda kadatayo. Saan laeng a dagiti kapammatianda no di pay ket dagiti amin a sabsabali pay a pasiente ti mabenepisiaran iti tulongda. Gapu kadagiti Saksi ni Jehova, nakumbinsirkami a posible ti operasion iti puso uray no di agusar iti dara.
“‘Kas pangarigan, inoperaanmi daytoy a babai [itudtudona ti maysa kadagiti pasientena] a dikam nagusar iti dara, ket inton Lunes rummuarton iti ospital. Kayatko nga ibaga a manmanon nga agusarkam iti dara gapu ta napeggad daytoy. Mainaig dayta iti HIV, hepatitis, ken mabayag a panagimbag.
“‘Maysaak a Katoliko, ngem iti pagtaenganmi saanmi a babalawen ti panangmatmat dagiti sabsabali. Naminsan limmabasak iti asideg ti Slaski Stadium a kaduak dagiti annakko. Dati a nabaybay-an daytoy nga estadium, ngem napaliiwmi a dakkel unay ti nagbalbaliwanna itan. Dinamagko iti maysa kadagiti trabahador no kasano a napasamak dayta. Kinunana a dandani awanen ti namnama ti management a matarimaan pay ti estadium, ngem naipaabang dayta kadagiti Saksi ni Jehova, ket tinarimaanda dayta.
“‘Isu nga adut’ masursurotayo kadagitoy a tattao. Iti daytoy nga ospital, ti kunak saan a rumbeng a babalawentayo ti panangmatmat dagiti sabsabali.’ Kalpasanna, intudona ti maysa a Saksi a maoperaan iti sumagmamano la nga aldaw, sana kinuna: ‘Daytoy a babai ket maysa kadagiti Saksi ni Jehova, ket maoperaanto a di mausar ti dara.’”
Nupay saan nga ipilit dagiti Saksi ni Jehova ti pammatida kadagiti sabsabali, sursurotenda a mismo ti ulidan dagiti apostol ken “agtulnog[da] a nangnangruna iti Dios kas agturay ngem kadagiti tao.” (Aramid 5:29) Ramanen daytoy ti panangraem iti dara. Apresiarenda no raemen dagiti sabsabali ti narelihiusuan a pammatida iti daytoy nga isyu.